អន្តរជាតិ: មន្ត្រីជាន់ខ្ពស់នៃក្រសួងដឹកជញ្ជូន ប្រទេសហ្វីលីពីន (DOTr) បានប្រកាសថា គម្រោងសាងសង់ប្រព័ន្ធផ្លូវរថភ្លើងក្រោមដី ដំបូងបង្អស់របស់ប្រទេសហ្វីលីពីន នៅទីក្រុងម៉ានីល សម្រេចបានវឌ្ឍនភាពយ៉ាងគាប់ប្រសើរ។
គម្រោងរថភ្លើងក្រោមដី “Metro Manila Subway” ត្រូវបានគេចាត់ទុកថា ជាគម្រោងហេដ្ឋារចនាសម្ព័ន្ធ ដ៏មានមហិច្ឆតាបំផុតរបស់ប្រទេសហ្វីលីពីន ស្ថិតក្រោមរដ្ឋបាលគ្រប់គ្រងរបស់លោកប្រធានាធិបតី Ferdinand Marcos Jr.។
លោក Timothy John R. Batan អនុរដ្ឋលេខាធិការក្រសួងដឹកជញ្ជូន បានថ្លែងទៅកាន់វេទិកាមួយ នាពេលថ្មីៗនេះថា “គិតត្រឹមដំណាច់ខែឧសភា គម្រោងរថភ្លើងក្រោមដីខាងលើ បានបញ្ចប់គោលដៅរបស់ខ្លួនចំនួន១៤,៤៨ភាគរយ”។
ក្រៅពីគម្រោងរថភ្លើងក្រោមដី Metro Manila Subway ហើយនោះ លោក Batan ក៏បានលើកឡើងផងដែរ អំពីវឌ្ឍនភាព ក្នុងគម្រោងសាងសង់ហេដ្ឋារចនាសម្ព័ន្ធ ផ្នែកផ្លូវដែកផ្សេងទៀត ដែលរួមមានដូចខាងក្រោម៖
គម្រោងបង្កើតស្ថានីយ៍ផ្លូវរថភ្លើងលើអាកាស Grand Central Station ក្នុងរដ្ឋធានីម៉ានីល គិតត្រឹមខែឧសភា បានបញ្ចប់ការសាងសង់ចំនួន៨១,៤២ភាគរយ។ស្ថានីយ៍នេះនឹងតភ្ជាប់ផ្លូវរថភ្លើងចំនួន៤ខ្សែ រួមមានខ្សែ LRT 1 បម្រើអ្នកដំណើរនៅភាគខាងលិច និងភាគខាងត្បូងនៃរដ្ឋធានី ព្រមទាំងតភ្ជាប់ខ្សែ MRT 3 បម្រើតំបន់កណ្តាលទីក្រុង និងខ្សែ MRT 7 បម្រើភាគខាងជើងទីក្រុង និងតភ្ជាប់គម្រោងរថភ្លើងក្រោមដី ដើម្បីបម្រើផ្នែកខាងកើតនៃទីក្រុង។
ជាមួយគ្នានេះ គម្រោងពង្រីក និងស្តារឡើងវិញនូវសមត្ថភាពផ្លូវរថភ្លើងMRT3 សម្រេចបានវឌ្ឍនភាពចំនួន៨៣,១១ភាគរយ។ បន្ទាប់ពីការស្តារឡើងវិញ ត្រូវបានបញ្ចប់រួចរាល់ ខ្សែរថភ្លើងនេះ នឹងអាចកាត់បន្ថយពេលវេលា ធ្វើដំណើរពី១ម៉ោងនិង១៥នាទី មកនៅត្រឹម៤៥នាទីប៉ុណ្ណោះ និងបង្កើនសមត្ថភាពដឹកអ្នកដំណើរ ពី៣០ម៉ឺននាក់ ទៅដល់៦០ម៉ឺននាក់ក្នុងមួយថ្ងៃ។
ចំណែក គម្រោងពង្រីកផ្លូវរថភ្លើង LRT 1 Cavite គិតត្រឹមថ្ងៃទី៣១ ខែឧសភាបានបញ្ចប់ការសាងសង់ ចំនួន៧៣,៥០ភាគរយ។ គម្រោងនេះ គឺជាការពង្រីកបន្ថែមទៀតនូវខ្សែរថភ្លើងធុនស្រាល “Line 1” ដែលមានស្រាប់ និងការសាងសង់ផ្លូវដែកបន្ថែមចម្ងាយ១១,៧គីឡូម៉ែត្រ ដែលមានស្ថានីយចំនួន៨ ដើម្បីតភ្ជាប់សង្កាត់ Pasay ក្នុងរដ្ឋធានីម៉ានីល ទៅកាន់ទីក្រុង Bacoor ក្នុងខេត្តCavite ជាប់ព្រំប្រទល់ជាមួយទីក្រុងម៉ានីល។
រីឯ គម្រោងផ្លូវរថភ្លើង North-South Commuter Railway គឺជាខ្សែរថភ្លើងប្រវែង១៤៧គីឡូម៉ែត្រ ដែលនឹងតភ្ជាប់តំបន់ចំនួន៣ នៅក្នុងកោះ Luzon រួមទាំងទីក្រុងម៉ានីលផងដែរ។ ខ្សែរថភ្លើងនេះ ត្រូវបានគេរំពឹងថា នឹងផ្តល់អត្ថប្រយោជន៍ដល់អ្នកដំណើរប្រមាណ៨០ម៉ឺននាក់ជារៀងរាល់ថ្ងៃ។
គិតត្រឹមដំណាច់ខែឧសភាកន្លងទៅ ការកសាងកំណាត់ផ្លូវដែករវាងសង្កាត់ Tutuban នៃទីក្រុងម៉ានីល ទៅកាន់ទីក្រុង Malolos ក្នុងដែនកោះLuzon បានបញ្ចប់៤២,១០ភាគរយ៕ប្រភព: PNA.gov៕
