អន្តរជាតិ: មូលនិធិ ដែលប្រទេសអារ៉ាប៊ីសាអូឌីតបានបង្កើតឡើង ដើម្បីផ្តល់ហិរញ្ញប្បទាន ដល់ការសាងសង់អគារខ្ពស់ជាងគេបំផុតរបស់ពិភពលោក ត្រូវបានទិញយកនៅក្នុងទំហំទឹកប្រាក់ចំនួន១,៨ពាន់លានដុល្លារអាមេរិក។
តួយ៉ាង ក្រុមហ៊ុន Kingdom Holding Company និងក្រុមហ៊ុន Sumuo Holding Company បានបង្កើតសម្ព័ន្ធភាព និងបានឈានទៅចុះកិច្ចព្រមព្រៀងរួមគ្នា ដើម្បីទិញយកភាគហ៊ុនពីមូលនិធិ Al Inma Jeddah Economic Fund ដែលគ្រប់គ្រងដោយក្រុមហ៊ុន Jeddah Economic Company (JEC)។
យោងតាមលក្ខខណ្ឌនៃកិច្ចព្រមព្រៀងនេះ ក្រុមហ៊ុន Kingdom Holding Company នឹងកាន់កាប់ចំណែកភាគហ៊ុនចំនួន៤០ភាគរយ នៅក្នុងមូលនិធិខាងលើ ខណៈក្រុមហ៊ុន Jeddah Economic Company នឹងកាន់កាប់ភាគហ៊ុនត្រឹមតែ៤,១%ប៉ុណ្ណោះ។ នេះបើយោងតាមឯកសារបង្ហាញនៅលើផ្សារហ៊ុន Tadawul ។
ដោយបង្កើតឡើងក្នុងឆ្នាំ២០០៩ ក្រុមហ៊ុន JEC កើតចេញពីការបណ្តាក់ទុនរួមគ្នា រវាងក្រុមហ៊ុន Kingdo m Holding Company ក្រុមហ៊ុន Abrar Holding Company ក្រុមហ៊ុន Qila’a Jeddah Company និងក្រុមហ៊ុន Saudi Binladin Group ។
មូលនិធិនេះត្រូវបានបង្កើតឡើង ក្នុងគោលដៅផ្តល់ហិរញ្ញប្បទាន ដល់ការស្ថាបនាគម្រោងអគារ ខ្ពស់ជាងគេបំផុតនៅលើពិភពលោក Jeddah Tower ដែលមានកម្ពស់ប្រមាណ១.០០០ម៉ែត្រ។ នៅពេលសាងសង់រួចរាល់ អគារនេះនឹងវ៉ាដាច់អគារ Burj Khalifa នៅទីក្រុងឌូបៃ ប្រទេសអារ៉ាប់រួម(UAE) ។
អគារខ្ពស់ជាងគេបំផុត នៅលើពិភពលោក Jeddah Tower មានទីតាំងស្ថិត នៅក្នុងសង្កាត់ Obhur ភាគខាងជើងទីក្រុង Jeddah ប្រទេសអារ៉ាប៊ីសាអូឌីត។ អគារមានទំហំផ្ទៃក្រឡាសរុបប្រហែល១,៧លានម៉ែត្រការ៉េ ហើយនឹងមានសណ្ឋាគារ Four Seasons ផ្សារទំនើប ការិយាល័យពាណិជ្ជកម្ម និងលំនៅដ្ឋានប្រណីត៕ប្រភព: Gulf News៕
