អន្តរជាតិ: ទីផ្សារអចលនទ្រព្យលក់រាយ ដូចជា ផ្សារទំនើបជាដើម នៅតំបន់អាស៊ានបានបង្ហាញ សញ្ញាប្លែកពីគ្នាអាស្រ័យទៅលើបរិបទបច្ចុប្បន្ន របស់ប្រទេសនីមួយៗ គួបផ្សំនឹងកត្តាខាងក្រៅ ដូចជា បញ្ហាសេដ្ឋកិច្ចសកល និងការដំឡើងអត្រាការប្រាក់។
ខាងក្រោមនេះ គឺជាស្ថានភាពតម្លៃជួលទីតាំងលក់រាយនៅទីក្រុងចំនួន៣ ក្នុងតំបន់អាស៊ានរបស់យើង គិតត្រឹមត្រីមាសទី២ ឆ្នាំ២០២៤៖
ទី១៖ ទីក្រុងហ្សាការតា ប្រទេសឥណ្ឌូនេស៊ី
ការផ្គត់ផ្គង់ទីតាំងលក់រាយ នៅទីក្រុងមួយនេះ បានកើនឡើងដល់១៧៥.៩០០ម៉ែត្រការ៉េ គិតត្រឹមត្រីមាសទី២ ខណៈតម្រូវការបានធ្លាក់ចុះ មកនៅត្រឹម៣១.៧២៣ម៉ែត្រការ៉េ។នេះបើយោងតាមរបាយការណ៍ ពីក្រុមហ៊ុនប្រឹក្សាអចលនទ្រព្យ Colliers។
ចំណែកអត្រាទីតាំងលក់រាយ ដែលគេទុកទំនេរចោលបានស្ថិតក្នុងរង្វង់២៨,៥ភាគរយ ខណៈតម្លៃជួលជាមធ្យមនៅទូទាំងទីក្រុង បានស្ថិតនៅទ្រឹងត្រឹម៤៧៥.៨៧៤រូពៀ (ប្រហែល២៩,៣២ដុល្លារ)ក្នុងមួយម៉ែត្រការ៉េ។
ទី២៖ ទីក្រុងបាងកក ប្រទេសថៃ
ស្តុកទីតាំងលក់រាយសរុបកម្រិត A នៅតំបន់កណ្តាលទីក្រុងបាងកក បានស្ថិតនៅទ្រឹងត្រឹម៩៨៦.២១៨ម៉ែត្រការ៉េ ក្នុងឆមាសទី១ ឆ្នាំនេះ។នេះបើយោងតាមរបាយការណ៍ពីក្រុមហ៊ុនប្រឹក្សាអចលនទ្រព្យ Cushman & Wakefield។
តម្លៃជួលជាមធ្យម បន្តមានស្ថិរភាពក្នុងរង្វង់៣.៥៩៦បាត(ប្រហែល៩៩,៥៣ដុល្លារ) ក្នុងមួយម៉ែត្រការ៉េ ក្នុងមួយខែក្នុងឆមាសទី១។ អត្រាទីតាំងលក់រាយ ដែលគេទុកទំនេរចោលនៅតំបន់ខាងលើ បានកើនឡើងដល់៣,៣៨%ក្នុងឆមាសទី១ ឆ្នាំនេះ បើធៀបនឹង៣,១១% នៅក្នុងឆមាសទី២ ឆ្នាំមុន។
ទី៣: ទីក្រុងហាណូយ ប្រទេសវៀតណាម
អត្រាទីតាំងលក់រាយ ដែលគេទុកទំនេរចោល នៅតំបន់កណ្តាលទីក្រុងហាណូយ បានថយចុះមកនៅត្រឹម៣,៧%នៅត្រីមាសទី២។ ចំនួននេះមានការធ្លាក់ចុះអស់០,២ភាគរយ បើធៀបនឹងត្រីមាសទី១ ឆ្នាំ២០២៤ ដោយសារតែស្ថិរភាពនៃតម្រូវការ ខណៈការផ្គត់ផ្គង់ថ្មីនៅមានកម្រិត។ នេះបើយោងតាមរបាយការណ៍ ពីសមាគមអចលនទ្រព្យវៀតណាម(VAR)។
នៅក្នុងត្រីមាសទី២ ឆ្នាំ២០២៤នេះ តម្លៃជួលទីតាំងលក់រាយ នៅឯតំបន់ពាណិជ្ជកម្មកណ្តាល របស់ទីក្រុងហាណូយ បានស្ថិតនៅទ្រឹង មកនៅត្រឹម៦៥,៤ដុល្លារអាមេរិក នៅក្នុងមួយម៉ែត្រការ៉េក្នុងមួយខែ៕ប្រភព: Hanoi Times៕
