បាងកក: កាលពីពេលកន្លងទៅ រដ្ឋាភិបាលថៃបានប្រកាសផែនការ ពង្រីកសិទ្ធិជួលដីរយៈពេលវែង ដល់រយៈពេល៩៩ឆ្នាំ និងបង្កើនកូតាកម្មសិទ្ធិទិញខុនដូ ដល់៧៥ភាគរយសម្រាប់ជនបរទេស។
តើការពង្រីកកម្មសិទ្ធិអចលនទ្រព្យ ដល់ជនបរទេសមានគុណសម្បត្តិ និងគុណវិបត្តិអ្វីខ្លះសម្រាប់សេដ្ឋកិច្ច និងវិស័យអចលនទ្រព្យនៅប្រទេសថៃ?។
ទី១៖ការទប់ស្កាត់ការប្រើប្រាស់ឈ្មោះអ្នកដទៃដើម្បីទិញអចលនទ្រព្យ
កន្លងមក គេសង្កេតឃើញមានករណី ក្រុមហ៊ុនខាងផ្នែកគណនេយ្យ និងបណ្តាក្រុមហ៊ុនផ្នែកច្បាប់ មួយចំនួនបានកាន់កាប់ដីជំនួសឲ្យជនបរទេស ដោយប្រើប្រាស់ឈ្មោះអ្នកដទៃ។ ការណ៍នេះ បានធ្វើឱ្យប្រទេសថៃខាតបង់ចំណូលពន្ធ និងចំណូលកម្រៃផ្សេងៗទៀត។
ទី២៖ការទប់ស្កាត់បញ្ហាអ្នកឈរឈ្មោះតំណាង
សម្រាប់អ្នកជួលដី ដែលជាជនជាតិថៃ៖ ពួកគេមានសិទ្ធិប្រើប្រាស់ ដូចជាដីកសិកម្មរយៈពេលវែង និងគោលបំណងលំនៅដ្ឋាន ពាណិជ្ជកម្ម និងឧស្សាហកម្មខ្នាតតូច ខណៈរយៈពេលជួលអាចបត់បែនបាន ដោយផ្អែកលើទំហំទុនវិនិយោគ។
ប៉ុន្តែសម្រាប់អ្នកជួលដី ដែលជាជនបរទេសត្រូវបំពេញលក្ខខណ្ឌដូចជា៖ ជនបរទេសអាចជួលដី ក្នុងទំហំអតិបរមា១រ៉ៃ ហើយជនបរទេស អាចយកដីនោះទៅប្រើប្រាស់ សម្រាប់សាងសង់លំនៅដ្ឋានតែប៉ុណ្ណោះ។
ប្រសិនបើជនបរទេសទុកដី ឱ្យនៅទំនេរក្នុងរយៈពេល៣ឆ្នាំ នោះពួកគេត្រូវបង់អត្រាពន្ធដីធ្លីចំនួន៣% ក្នុងមួយឆ្នាំដើម្បីទប់ស្កាត់ការទិញទុកលក់ចំណេញ ហើយជនបរទេសត្រូវចំណាយប្រាក់លើថ្លៃចុះឈ្មោះ និងបង់ពន្ធប្រចាំឆ្នាំខ្ពស់ជាងពលរដ្ឋថៃ។
ទី៣៖ ការជួយជំរុញសេដ្ឋកិច្ច និងវិស័យអចលនទ្រព្យ
លោក Surachet Kongcheep នាយកគ្រប់គ្រងក្រុមហ៊ុន Property DNA បានមានប្រសាសន៍ឱ្យដឹងថា ការពង្រីករយៈពេលជួលដីដល់៩៩ឆ្នាំ សម្រាប់ជនបរទេស អាចទាក់ទាញការចាប់អារម្មណ៍ កាន់តែច្រើនមកលើដីឡូតិ៍ធំៗ របស់រដ្ឋាភិបាល ទីភ្នាក់ងារ ឬសហគ្រាសរដ្ឋ ហើយថែមទាំងជួយស្តារទីផ្សារអចលនទ្រព្យ និងសេដ្ឋកិច្ចថៃដែលកំពុងធ្លាក់ចុះ។
ទី៤៖ ការបង្កើនកូតាកម្មសិទ្ធិទិញខុនដូដល់ជនបរទេសនៅក្នុងគម្រោងខុនដូណាមួយ។
ជនបរទេស បានក្លាយជាផ្នែកមួយដ៏សំខាន់ នៃទីផ្សារខុនដូរបស់ប្រទេសថៃ។ ការអនុញ្ញាតឱ្យជនបរទេស មានសិទ្ធិកាន់កាប់ខុនដូដល់៧៥% នៅក្នុងគម្រោងណាមួយ អាចតម្រូវឱ្យមានបទប្បញ្ញត្តិបន្ថែមទៀត។ លើសពីនេះ តម្លៃលក់ឱ្យជនបរទេស ត្រូវកំណត់ឱ្យខ្ពស់ជាងតម្លៃលក់ ឱ្យអ្នកទិញដែលជាជនជាតិថៃ ។
ទី៥៖ ផលប៉ះពាល់រយៈពេលវែងដែលអាចកើតមាន
ប្រសិនបើចំណាត់ការទាំងនេះ មានលក្ខណៈអចិន្ត្រៃយ៍ ដោយគ្មានពេលវេលា កំណត់ច្បាស់លាស់ នោះផលប៉ះពាល់រយៈពេលវែងច្បាស់ជាអាចកើតឡើង។
ទីផ្សារនឹងពឹងផ្អែកកាន់តែលើ តម្រូវការរបស់ជនបរទេស ជាជាងអំណាចនៃការទិញក្នុងស្រុក។ អ្នកអភិវឌ្ឍន៍បរទេសអាចជ្រៀតចូល ទៅក្នុងទីផ្សារថៃដោយឯករាជ្យ ដែលការណ៍នេះ អាចបង្កផលប៉ះពាល់ដល់ការងារ ជីវភាពរស់នៅ និងសុខុមាលភាពរបស់ពលរដ្ឋថៃ ក្នុងរយៈពេលវែង៕ប្រភព:The nation ៕
