ដោយ: គង់ លាងហួរ
អន្តរជាតិ: ការស្រាវជ្រាវថ្មីបង្ហាញថា ការកំណត់ពន្ធថ្មីចំនួ ន៦០% លើការនាំចេញទំនិញរបស់ចិនទាំងអស់ ទៅកាន់សហរដ្ឋអាមេរិក នឹងធ្វើឱ្យអត្រាកំណើនសេដ្ឋកិច្ចចិន ប្រចាំឆ្នាំធ្លាក់ចុះអស់ពាក់កណ្តាល ប្រសិនបើអតីតប្រធានាធិបតីអាមេរិកលោក Donald Trump ត្រឡប់ទៅកាន់សេតវិមានម្តងទៀត។
យោងតាមធនាគារវិនិយោគខ្នាតយក្ស UBS Group AG របស់ប្រទេសស្វីសបានឱ្យដឹងថា លោក Trump កំពុងពិចារណាដាក់ពន្ធថេរ ក្នុងអត្រា៦០ភាគរយ លើការនាំចូលផលិតផលគ្រប់ប្រភេទពីប្រទេសចិន ដែលវិធានការនេះនឹងកាត់បន្ថយកំណើនសេដ្ឋកិច្ចចិន អស់២,៥ភាគរយក្នុងឆ្នាំបន្តបន្ទាប់។
ទីក្រុងប៉េកាំងបានដាក់ចេញគោលដៅ សម្រេចឱ្យបានកំណើនសេដ្ឋកិច្ច ក្នុងរង្វង់ប្រហែល៥ភាគរយ នៅឆ្នាំ២០២៤នេះ បន្ទាប់ពីសេដ្ឋកិច្ចចិន បានកើនឡើង៥,២ភាគរយ នៅក្នុងឆ្នាំ២០២៣កន្លងទៅ។
ក្រុមសេដ្ឋវិទូរបស់ធនាគារខាងលើ បានគូសបញ្ជាក់ថា ការព្យាករណ៍នេះ ត្រូវបានធ្វើឡើងដោយផ្អែក លើការវាយតម្លៃ និងសន្មតថា “លំហូរពាណិជ្ជកម្មមួយចំនួន ត្រូវបានបង្វែរតាមរយៈប្រទេសទី៣ ហើយប្រទេសចិន មិនធ្វើការសងសឹកបកត្រឡប់ទៅវិញ ហើយបណ្តាប្រទេសផ្សេងទៀត មិនចូលរួមជាមួយសហរដ្ឋអាមេរិក ក្នុងការយកពន្ធលើទំនិញគ្រប់មុខរបស់ចិន”។
ធនាគារស្វីស UBS បានសរសេរនៅក្នុងរបាយការណ៍របស់ខ្លួនថា “មូលហេតុដែលអាចធ្វើឱ្យ កំណើនសេដ្ឋកិច្ចចិនប្រចាំឆ្នាំធ្លាក់ចុះអស់២,៥% បណ្តាលមកពីការធ្លាក់ចុះនៃការនាំចេញ គួបផ្សំនឹងការជះផលប៉ះពាល់ ដល់ការប្រើប្រាស់ និងការវិនិយោគ”។
គិតរហូតមកដល់ពេលនេះ ការនាំចេញគឺជាកាតាលីករដ៏សំខាន់ ក្នុងការជួយជំរុញកំណើនសេដ្ឋកិច្ចចិន ដែលគ្របដណ្តប់ចំណែក១៤% នៃផលទុនជាតិសរុប(GDP) របស់ប្រទេសចិន ប៉ុន្តែក្នុងពេលដំណាលគ្នានេះ បណ្តាប្រទេសដៃគូពាណិជ្ជកម្មមួយចំនួន បានពិចារណាដាក់ពន្ធគយលើទំនិញចិន ដើម្បីទប់ទល់នឹងឱនភាពពាណិជ្ជកម្ម របស់ពួកគេជាមួយទីក្រុងប៉េកាំង។
របាយការណ៍បានបន្ថែមថា រដ្ឋាភិបាលចិន អាចនឹងប្រើប្រាស់វិធានការសារពើពន្ធ និងបន្ធូរបន្ថយគោលនយោបាយរូបិយវត្ថុ ដើម្បីកាត់បន្ថយផលប៉ះពាល់ ពីការដំឡើងពន្ធរបស់សហរដ្ឋអាមេរិក ខណៈធនាគារកណ្តាលចិន(PBOC) អាចនឹងអនុញ្ញាតឱ្យរូបិយប័ណ្ណប្រាក់យ័ន ក្នុងស្រុករបស់ខ្លួនធ្លាក់ថ្លៃចុះចាប់ពី៥% ទៅ១០% ដើម្បីជំរុញការនាំចេញ៕ប្រភព: Bloomberg៕
