ដោយ: គង់ លាងហួរ
អន្តរជាតិ: ធនាគារអភិវឌ្ឍន៍អាស៊ី (ADB) គ្រោងពង្រីកការផ្តល់ប្រាក់កម្ចីចំនួន៤,៩៨ពាន់លានដុល្លារ ដល់ប្រទេសហ្វីលីពីននៅឆ្នាំ២០២៤នេះ សម្រាប់ការអភិវឌ្ឍន៍គម្រោងនានា ដើម្បីជំរុញកំណើនសេដ្ឋកិច្ចរបស់ប្រទេសជាតិ។
ADBគ្រោងនឹងផ្តល់ប្រាក់កម្ចីជិត៥ពាន់លានដុល្លារអាមេរិកដល់ហ្វីលីពីននៅឆ្នាំនេះ ដើម្បីជំរុញការអភិវឌ្ឍ
ការផ្តល់ហិរញ្ញប្បទាននេះ ជាផ្នែកមួយនៃយុទ្ធសាស្ត្រភាពជាដៃគូរវាងធនាគារ ADB និងរដ្ឋាភិបាលហ្វីលីពីន ចាប់ពីឆ្នាំ២០២៤ រហូតដល់ឆ្នាំ២០២៩ ដើម្បីធ្វើយ៉ាងណាជួយឱ្យហ្វីលីពីន សម្រេចបាននូវលទ្ធផល នៃការអភិវឌ្ឍន៍សេដ្ឋកិច្ចយ៉ាងល្អគាប់ប្រសើរ។
លោក Pavit Ramachandran អគ្គនាយកធនាគារ ADB ប្រចាំប្រទេសហ្វីលីពីន បានលើកឡើងថា ប្រាក់កម្ចីទាំងនេះ នឹងត្រូវបានវិនិយោគ ទៅលើការពង្រឹងការអភិវឌ្ឍមនុស្ស ការជំរុញការប្រកួតប្រជែងផ្នែកសេដ្ឋកិច្ច និងការកសាងហេដ្ឋារចនាសម្ព័ន្ធ ព្រមទាំងការពង្រីកការអភិវឌ្ឍភាពធន់ នឹងគ្រោះមហន្តរាយ។
បន្ថែមពីលើនោះ ភាពជាដៃគូថ្មីនេះ ស្របតាមផែនការអភិវឌ្ឍន៍របស់រដ្ឋាភិបាលហ្វីលីពីន ចាប់ពីឆ្នាំ២០២៣ដល់ឆ្នាំ២០២៨ ដើម្បីកាត់បន្ថយភាពក្រីក្រ និងបង្កើតឱកាសការងារកាន់តែច្រើន និងកាន់តែប្រសើរឡើង តាមរយៈការសម្រេចបាននូវកំណើនសេដ្ឋកិច្ចដ៏ខ្ពស់ ប្រកបដោយនិរន្តរភាព។
បច្ចុប្បន្ននេះ ហ្វីលីពីនគឺជាប្រទេសមួយ ក្នុងចំណោមបណ្តាប្រទេស ដែលមានប្រាក់ចំណូលមធ្យមកម្រិតទាប ខណៈប្រជាជនហ្វីលីពីន មានប្រាក់ចំណូលសរុប ជាមធ្យមចំនួន៤.២៣០ដុល្លារអាមេរិក ក្នុងមួយនាក់កាលពីឆ្នាំ២០២៣។
លោក Arsenio Balisacan មន្ត្រីជាន់ខ្ពស់ទទួលបន្ទុកកិច្ចការសេដ្ឋកិច្ច និងការអភិវឌ្ឍន៍ជាតិបានលើកឡើងថា ហ្វីលីពីនត្រូវបានគេរំពឹងថា នឹងទទួលបាននូវឋានៈជាប្រទេស ដែលមានប្រាក់ចំណូលមធ្យម កម្រិតខ្ពស់នៅឆ្នាំក្រោយ ប្រសិនបើសេដ្ឋកិច្ចហ្វីលីពីន សម្រេចបានកំណើនយ៉ាងតិច ក្នុងរង្វង់៦ភាគរយនៅឆ្នាំនេះ និងរក្សាបាននូវដំណើរការសេដ្ឋកិច្ច ដ៏រឹងមាំនៅឆ្នាំក្រោយ។
ធនាគារ ADB បាននិងកំពុងជួយរដ្ឋាភិបាលហ្វីលីពីន ក្នុងការដោះស្រាយបញ្ហាប្រឈមនានា ដូចជា ភាពក្រីក្រ វិសមភាព និងការប្រែប្រួលអាកាសធាតុ ក៏ដូចជា ការបង្កើនភាពធន់ ការកែលម្អអភិបាលកិច្ច សមត្ថភាពស្ថាប័ន និងការលើកកម្ពស់ហេដ្ឋារចនាសម្ព័ន្ធ៕ប្រភព: PhilstarGlobal៕
