ដោយ: គង់ លាងហួរ
អន្តរជាតិ: ប្រទេសវៀតណាម បានសាងសង់អគារអាផាតម៉ិនជាង១៣.០០០យូនីត បម្រុងទុកសម្រាប់ប្រជាជនរបស់ខ្លួន ដែលផ្លាស់ទីលំនៅពីទីតាំងដីធ្លី ដែលរដ្ឋាភិបាលបានទិញដើម្បីអភិវឌ្ឍន៍។
ប៉ុន្តែគិតមកទល់ពេលនេះ អាផាតម៉ិនទាំងនោះ នៅតែមិនទាន់មានអ្នកចូលរស់នៅ។
អគារអាផាតម៉ិនជាង១៣.០០០យូនីតនៅប្រទេសវៀតណាម ត្រូវបានទុកចោលគ្មានអ្នករស់នៅ
អគារអាផាតម៉ិនចំនួន៥.៣០០ ត្រូវបានសាងសង់ឡើងសម្រាប់ប្រជាជន ដែលរស់នៅតំបន់ Thu Thiem ក្នុងទីក្រុងហូជីមិញ។ រដ្ឋាភិបាលបានទិញដីធ្លី របស់ប្រជាជនរស់នៅទីនោះ ដើម្បីអភិវឌ្ឍន៍តំបន់ Thu Thiem ទៅជាមជ្ឈមណ្ឌលហិរញ្ញវត្ថុអន្តរជាតិថ្មី។
យោងតាមមន្ទីរសំណង់ក្រុងហូជីមិញបានឲ្យដឹងថា ប្រជាពលរដ្ឋ ដែលត្រូវផ្លាស់ប្តូរទីលំនៅ ត្រូវបានផ្តល់ជម្រើសចំនួន៣ រួមមាន ការផ្តល់សំណងជាប្រាក់ អាផាតម៉ិន ឬដី។ ប៉ុន្តែប្រជាជនភាគច្រើន បានជ្រើសរើសយកសំណងជាប្រាក់ ដែលនាំឱ្យអគារអាផាតម៉ិនជាច្រើន ដែលត្រូវបានសាងសង់បម្រុងទុកទាំងនោះពុំមានអ្នករស់នៅ។
សមាគមអ្នកអចលនវត្ថុវៀតណាម បានលើកឡើងថា គម្រោងអាផាតម៉ិន មួយចំនួនស្ថិតនៅក្នុងទីតាំងដាច់ស្រយាល ហើយថែមទាំងខ្វះ ហេដ្ឋារចនាសម្ព័ន្ធសំខាន់ៗ ដើម្បីទាក់ទាញអ្នករស់នៅ ដូចជាសាលារៀន មន្ទីរពេទ្យ និងទីផ្សារជាដើម។
តំបន់បណ្តុំអគារអាផាតម៉ិនមួយទៀត ដែលពុំមានអ្នកចូលរស់នៅ គឺតំបន់ Vinh Loc B ដែលមានអាផាតម៉ិនចំនួន១.៤៦៥យូនីត ឬស្មើនឹង៣ភាគ៤ នៃចំនួនអាផាតម៉ិនសរុប ដែលត្រូវបានចាក់សោទុកចោល។ ការសាងសង់បានចាប់ផ្តើមកាលពី១៥ឆ្នាំមុន ខណៈអគារបានខូចខាតទៅហើយ។
ចំណែក នៅខណ្ឌទី៧(District 7) ក្នុងទីក្រុងហូជីមិញដដែល គេសង្កេតឃើញថា អាផាតម៉ិនចំនួន២២១យូនីត ដែលត្រូវបានបញ្ចប់ការសាងសង់ កាលពី១៥ឆ្នាំមុន មិនមានអ្នកផ្លាស់ចូលទៅរស់នៅនោះទេ។
រីឯ នៅក្នុងទីក្រុងហាណូយវិញ គេសង្កេតឃើញមានអគារអាផាតម៉ិនចំនួន១៧០ខ្នង ដែលមានអាផាតមុិនចំនួន១៤.២០០យូនីត។ ប៉ុន្តែអគារភាគច្រើន ត្រូវបានទុកឱ្យនៅទំនេរចោលអស់ជាច្រើនឆ្នាំមកហើយ។
តួយ៉ាងគម្រោងមួយស្ថិតនៅក្នុងសង្កាត់ Tay Ho ដែលមានអគារចំនួន៤ខ្នង ត្រូវបានគេរចនាឡើងសម្រាប់មនុស្សរស់នៅចំនួន២.៨០០នាក់។ ប៉ុន្តែបច្ចុប្បន្ននេះ អគារទាំងនោះសុទ្ធតែត្រូវបានចាក់សោរទុកចោលទាំងអស់។
ផ្ទុយទៅវិញ អគារអាផាតម៉ិនពាណិជ្ជកម្ម ដែលស្ថិតនៅក្បែរតំបន់នោះ ត្រូវបានដាក់លក់ក្នុងតម្លៃ ខ្ពស់កប់ពពកប្រមាណ៦០លានដុងក្នុងមួយម៉ែត្រការ៉េ៕ប្រភព: Vnexpress៕
