ដោយ: គង់ លាងហួរ
អន្តរជាតិ: ប្រទេសហ្វីលីពីន ទទួលបានការចាប់អារម្មណ៍តិចតួច ពីអ្នកវិនិយោគអចលនទ្រព្យ ខណៈប្រទេសនេះមិនសួវមានភាពធន់សេដ្ឋកិច្ច បើធៀបនឹងឥណ្ឌូនេស៊ី ព្រមទាំងខ្វះខាតសមត្ថភាពផលិតកម្ម និងការទាក់ទាញភ្ញៀវទេសចរណ៍ បើធៀបនឹងប្រទេសវៀតណាម និងថៃ។
ទោះជាយ៉ាងណាក្តី ប្រទេសហ្វីលីពីនឈរនៅជួរមុខ និងមានផ្នែកសក្តានុពលជាច្រើន នៅក្នុងឧស្សាហកម្មអចលនទ្រព្យ ដែលត្រូវបានគេមើលរំលង។
ខាងក្រោមនេះជាផ្នែកអចលនទ្រព្យ ដ៏សំខាន់ចំនួន២នៅប្រទេសហ្វីលីពីន៖
ទី១: ទីផ្សារលំនៅដ្ឋានប្រណីត
ទីផ្សារតម្លៃផ្ទះប្រណីត នៅទីក្រុងម៉ានីល កំពុងមានការកើនឡើង។
យោងតាមសន្ទស្សន៍ តម្លៃលំនៅដ្ឋានប្រណីតៗ នៅក្នុងទីក្រុងចំនួន១០០ ទូទាំងពិភពលោក របស់ក្រុមហ៊ុនKnight Frank បង្ហាញថា តម្លៃផ្ទះប្រណីតនៅរដ្ឋធានី ប្រទេសហ្វីលីពីន បានកើនឡើងលឿនបំផុត ក្នុងអត្រា២៦,៣%កាលពីឆ្នាំមុន និងលើសទីក្រុងឌូបៃ (គិតពីអត្រាកំណើន)។
ទីក្រុងម៉ានីល ក៏បានកាន់កាប់តំណែងកំពូល នៅក្នុងត្រីមាសទី១ ឆ្នាំ២០២៤នេះផងដែរ។
ប៉ុន្តែតម្លៃផ្ទះពិតប្រាកដ នៅទីក្រុងម៉ានីល(គិតជាទំហំទឹកប្រាក់) នៅតែមានកម្រិតទាប ជាងទីក្រុងធំៗផ្សេងទៀត។ យោងតាមក្រុមហ៊ុន Knight Frank បានឱ្យដឹងថា ទឹកប្រាក់១លានដុល្លារ អាចទិញលំនៅដ្ឋានប្រណីត ទំហំ១៥៨ម៉ែត្រការ៉េនៅទីក្រុងម៉ានីល។
ប៉ុន្តែទឹកប្រាក់១លានដុល្លារ អាចទិញលំនៅដ្ឋានប្រណីតទំហំត្រឹមតែ៣៤ម៉ែត្រការ៉េ នៅប្រទេសសិង្ហបុរី។ ៦០ម៉ែត្រការ៉េនៅទីក្រុងតូក្យូ និង១១៣ម៉ែត្រការ៉េ នៅទីក្រុងបុមបៃ។ ទីផ្សារផ្ទះប្រណីតរបស់ទីក្រុងម៉ានីល កំពុងរីកចម្រើន ប៉ុន្តែនៅតែមានតម្លៃសមរម្យ។
ទី២: ទីផ្សារលក់រាយ
ទីក្រុងម៉ានីល មានមជ្ឈមណ្ឌលផ្សារទំនើប លំដាប់យក្សចំនួន២របស់ពិភពលោក។ នៅក្នុងប្រទេសហ្វីលីពីន ដែលមានភ្លៀងធ្លាក់ខ្លាំង មានសីតុណ្ហភាព និងសំណើមខ្ពស់ មជ្ឈមណ្ឌលផ្សារទំនើបធំៗ ជាកន្លែងជ្រកកោណ និងជាកន្លែងកម្សាន្ត។
លោក Joe Curran ប្រធានប្រតិបត្តិនៅទីភ្នាក់ងារអចលនទ្រព្យ KMC Savills ក្នុងទីក្រុងម៉ានីល បានលើកឡើងថា “ផ្សារទំនើប ជាវិធីសាស្ត្រជីវិតរស់នៅទីនេះ ដោយផ្តល់នូវទីជំរកគេចពីភ្លៀង និងកំដៅថ្ងៃ”។
ទី៣: ទីផ្សារការិយាល័យ
ការរីកចម្រើននៃឧស្សាហកម្ម Business Process Outsourcing (BPO) ជាកត្តាជំរុញដ៏ធំបំផុត នៅក្នុងទីផ្សារអចលនទ្រព្យពាណិជ្ជកម្មហ្វីលីពីន។ វិស័យនេះ មិនត្រឹមតែជាប្រភពបង្កើតការងារធំជាងគេ របស់ប្រទេសហ្វីលីពីនប៉ុណ្ណោះទេ ប៉ុន្តែក៏ជាកត្តាជំរុញដ៏សំខាន់ នៃកំណើន និងជាប្រភពតម្រូវការការិយាល័យផងដែរ។
ការជួលការិយាល័យប្រភេទ Prime នៅទីក្រុងម៉ានីលមានតម្លៃទាបជាង ការិយាល័យនៅទីក្រុងBengaluru ទីក្រុង Mumbai និងរដ្ឋធានីNew Delhi របស់ឥណ្ឌាជិត៥០ភាគរយ។
ការណ៍នេះ បានជំរុញឱ្យក្រុមហ៊ុនចម្រុះ ជាតិសាសន៍ចូលមកបង្កើត មជ្ឈមណ្ឌលហៅការទំនាក់ទំនង តាមទូរសព្ទបន្ថែមទៀត(call centers)ក្នុងប្រទេសហ្វីលីពីន៕
ប្រភព: Realestatenews.ph
