តើគម្រោងផ្លូវហាយវេត្រីភាគីឥណ្ឌា-មីយ៉ាន់ម៉ា-ថៃបន្តមកកាន់កម្ពុជាវិវត្តន៍ដល់ណាហើយ?
ដោយ: គង់ លាងហួរ
អន្តរជាតិ: គម្រោងផ្លូវហាយវេ Kolkata Bangkok ឬហៅថាផ្លូវហាយវេត្រីភាគី នឹងតភ្ជាប់ទីក្រុងបាងកក ប្រទេសថៃ ទៅកាន់ទីក្រុង Kolkata ប្រទេសឥណ្ឌា តាមរយៈប្រទេសមីយ៉ាន់ម៉ា ដើម្បីជំរុញទំនាក់ទំនងពាណិជ្ជកម្មរវាងឥណ្ឌា និងតំបន់អាស៊ាន។
ផ្លូវហាយវេនេះ នឹងតភ្ជាប់ទីក្រុងសំខាន់ៗជាច្រើន នៅទូទាំងប្រទេសទាំង៣ រួមមានទីក្រុងបាងកករបស់ថៃ ទីក្រុងយ៉ាំងហ្គោន និងទីក្រុងម៉ាន់ដាដា របស់មីយ៉ាន់ម៉ា ទីក្រុង Kolkata ទីក្រុង Siliguri, ទីក្រុង Guwahati និងទីក្រុង Kohima របស់ឥណ្ឌា។
ផ្លូវហាយវេត្រីភាគី នឹងក្លាយជាតំណភ្ជាប់ដ៏សំខាន់ នៅក្នុងតំបន់ច្រករបៀងភាគខាងកើត -ខាងលិច និងយុទ្ធសាស្ត្រសហប្រតិបត្តិការសេដ្ឋកិច្ច Ayeyawady-Chao Phraya-Mekong ដោយពង្រីកការតភ្ជាប់ ទៅកាន់ប្រទេសកម្ពុជា ឡាវ និងវៀតណាម។
ផ្លូវហាយវេត្រីភាគី នឹងមានចម្ងាយសរុបប្រហែល២.៨០០គីឡូម៉ែត្រ។ កំណាត់ផ្លូវហាយវេភាគច្រើន មានទីតាំងស្ថិតនៅក្នុងទឹកដីនៃប្រទេសឥណ្ឌា ខណៈកំណាត់ផ្លូវហាយវេ នៅក្នុងប្រទេសថៃ នឹងមានចម្ងាយខ្លីបំផុត ក្នុងចំណោមប្រទេសទាំង៣។
គម្រោងផ្លូវហាយវេ Kolkata Bangkok ត្រូវបានគេរំពឹងថា នឹងសាងសង់បញ្ចប់រួចរាល់ នៅឆ្នាំ២០២៧ខាងមុខ ខណៈផ្នែកខ្លះនៃបណ្តាញផ្លូវហាយវេ បានសង់រួចរាល់ហើយ។
គិតត្រឹមពេលនេះ ការសាងសង់ផ្លូវហាយវ៉េត្រូវបានបញ្ចប់ជាអតិបរមានៅប្រទេសថៃ។ បច្ចុប្បន្ន ការស្ថាបនាកំណាត់ផ្លូវហាយវ៉េក្នុងប្រទេសថៃជិតរួចរាល់។ ប៉ុន្តែការងារសាងសង់កំណាត់ហាយវេ នៅក្នុងប្រទេសមីយ៉ាន់ម៉ា នឹងត្រូវការពេលវេលាយូរដើម្បីបញ្ចប់។
ចំណែកផ្លូវតភ្ជាប់រវាងទីក្រុង Yar Gyi និងទីក្រុង Kalewa នៃប្រទេសមីយ៉ាន់ម៉ា មានចម្ងាយសរុបប្រហែល១២១,៨គីឡូម៉ែត្រ។ ផ្លូវនេះនឹងត្រូវអភិវឌ្ឍន៍ ទៅជាផ្លូវហាយវេចំនួន៤គន្លង។
លើសពីនេះ ផ្លូវហាយវេត្រីភាគី នឹងជះឥទ្ធិពលយ៉ាងខ្លាំងដល់កំណើនតម្លៃអចលនទ្រព្យ។ ជារួម ការអភិវឌ្ឍន៍នឹងធ្វើឱ្យតម្លៃដីនៅតំបន់ក្បែរនោះហក់ឡើងថ្លៃ ដោយសារតែការតភ្ជាប់ទៅកាន់តំបន់ទាំងនេះ នឹងមានភាពប្រសើរឡើងយ៉ាងខ្លាំង។
ហេតុនេះ វិស័យអចលនទ្រព្យអាចនឹងរីកដុះដាល ក្នុងរយៈពេលពេលដ៏ខ្លីខាងមុខ ជុំវិញតំបន់សាងសង់ផ្លូវហាយវេ ជាពិសេសនៅតាមទីក្រុងរបស់ប្រទេសឥណ្ឌា ដូចជា ទីក្រុងMoreh ទីក្រុងKohima និងទីក្រុងSrirampurជាដើម។
ការអភិវឌ្ឍន៍គម្រោងផ្លូវហាយវេនេះ ក៏នឹងជួយជំរុញពាណិជ្ជកម្ម ទេសចរណ៍ និងកំណើនសេដ្ឋកិច្ចក្នុងតំបន់ ដោយនឹងនាំមកនូវ ឱកាសការងារដល់ប្រជាជន។ កត្តាទាំងអស់នេះនឹងជំរុញឱ្យមានតម្រូវការ លំនៅដ្ឋានកាន់តែច្រើន ព្រមទាំងជំរុញវិស័យពាណិជ្ជកម្ម នៅក្នុងតំបន់ទាំងនេះ ដែលជាហេតុធ្វើឱ្យតម្លៃអចលនទ្រព្យកើនឡើង៕ប្រភព: Magic Bricks៕
