អាកាសយានដ្ឋានសុវណ្ណភូមិរបស់ថៃត្រៀមពង្រីកបន្ថែម ដើម្បីបង្កើនសមត្ថភាពទទួលអ្នកដំណើរ
ដោយ: គង់ លាងហួរ
អន្តរជាតិ: ប្រទេសថៃ គ្រោងនឹងធ្វើឱ្យប្រសើរឡើងនូវអាកាសយានដ្ឋានអន្តរជាតិសុវណ្ណភូមិ នៅក្នុងខេត្តសាមុតប្រាកាន ដើម្បីបង្កើនសមត្ថភាពទទួល អ្នកដំណើរចំនួន៨០លាននាក់ ក្នុងមួយឆ្នាំនៅឆ្នាំ២០៣១ខាងមុខ។
លោក Kerati Kijmanawat ប្រធានក្រុមហ៊ុនគ្រប់គ្រងអាកាសយានដ្ឋាន Airports of Thailand ចំណុះក្រសួងដឹកជញ្ជូនថៃ បានមានប្រសាសន៍ឱ្យដឹងថា ក្រុមហ៊ុនកំពុងពិនិត្យមើលផែនការមេ សម្រាប់ការពង្រីកសមត្ថភាព អាកាសយានដ្ឋានអន្តរជាតិសុវណ្ណភូមិក្នុងរយៈពេល១០ឆ្នាំទៅមុខ។
ការពង្រីកនេះ មានគោលបំណងបំពេញ តាមគោលដៅរបស់រដ្ឋាភិបាលថៃ ក្នុងការធ្វើឱ្យអាកាសយានដ្ឋានអន្តរជាតិសុវណ្ណភូមិ ទទួលបានចំណាត់ថ្នាក់ ជាអាកាសយានដ្ឋានមួយក្នុងចំណោមអាកាសយានដ្ឋានកំពូលទាំង២០នៅលើពិភពលោក។
នៅក្រោមផែនការមេ ថៃគ្រោងសាងសង់ស្ថានីយអ្នកដំណើរថ្មីមួយ ឈ្មោះ“South Terminal” ស្ថិតនៅប៉ែកខាងត្បូងនៃអាកាសយានដ្ឋានអន្តរជាតិសុវណ្ណភូមិ ក្នុងទំហំទឹកប្រាក់ប៉ាន់ស្មានចំនួន១២០ពាន់លានបាត និងស្ថាបនាផ្លូវរត់ទី៤ ក្នុងតម្លៃ២០ពាន់លានបាត។
លោកបានលើកឡើងថា នៅពេលហេដ្ឋារចនាសម្ព័ន្ធថ្មីទាំង២នេះសាងសង់រួចរាល់ អាកាសយានដ្ឋានអន្តរជាតិសុវណ្ណភូមិ នឹងអាចផ្ទុកអ្នកដំណើរ បានប្រហែល៨០លាននាក់ក្នុងមួយឆ្នាំ។
លោក Kerati Kijmanawat បានបញ្ជាក់ថា ការត្រួតពិនិត្យផែនការមេ នឹងត្រូវបញ្ចប់នៅខែកុម្ភៈ ឆ្នាំ២០២៥ ហើយយើងនឹងបញ្ជូនផែនការមេ ទៅកាន់ក្រសួងដឹកជញ្ជូន ដើម្បីដាក់ជូនគណៈរដ្ឋមន្ត្រីអនុម័តថវិកា។
យោងតាមការប៉ាន់ប្រមាណបង្ហាញថា ដំណើរការនេះត្រូវការពេលយ៉ាងតិចណាស់៣ខែ។
លោកបានបន្តថា ការដេញថ្លៃសម្រាប់ការសាងសង់គម្រោង នឹងរៀបចំនៅដើមឆ្នាំ ២០២៧ ហើយស្ថានីយ South Terminal ត្រូវបានគេប៉ាន់ប្រមាណថា នឹងត្រូវការរយៈពេល៤ឆ្នាំកន្លះក្នុងការសាងសង់បញ្ចប់ ខណៈផ្លូវរត់ទី៤ត្រូវចំណាយរយៈពេលសាងសង់ប្រហែល៤ឆ្នាំ៕ប្រភព: Bangkok Post៕
