រដ្ឋាភិបាលម៉ាឡេស៊ី ប្រកាសឈប់ផ្តល់អាទិភាពដល់ការសាងសង់អគារខ្ពស់ៗកប់ពពកនៅក្នុងទីក្រុង
ដោយ: គង់ លាងហួរ
អន្តរជាតិ: នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម អះអាងថា ប្រទេសម៉ាឡេស៊ី មិនត្រូវការអគារខ្ពស់កប់ពពកបន្ថែមទៀតទេ ហើយយើងគួរតែផ្តល់អាទិភាព ដល់គំនិតផ្តួចផ្តើមបម្រើប្រជាជនជំនួសវិញ។
លោក អាន់វ៉ាន់ អ៊ីប្រាហ៊ីម បានគូសបញ្ជាក់ថា អគារខ្ពស់ៗមានតម្លៃថ្លៃនឹងលែងជាអាទិភាព សម្រាប់រដ្ឋាភិបាលម៉ាឡេស៊ីទៀតហើយ។ នេះបើយោងតាមការរាយការណ៍ដោយសារពត៌មាន The Malaysian Reserve។
ផ្ទុយទៅវិញ លោកនាយករដ្ឋមន្ត្រីបានសង្កត់ធ្ងន់ថា បណ្តាក្រសួងស្ថាប័ននានា នឹងវិភាជន៍ថវិកាទាំងនេះ ដើម្បីកែលម្អលក្ខខណ្ឌទីធ្លា និងកន្លែងប្រើប្រាស់ សម្រាប់សាធារណៈជនទូទៅ។
លោកអាន់ វ៉ា បានចោទជាសំណួរថា“តើភាពរឹងមាំនៃតម្លៃប្រាក់រីងហ្គីត និងលំហូរទុនវិនិយោគសំខាន់ៗ ចូលមកប្រទេសរបស់យើងមានន័យអ្វីទៅ ប្រសិនបើមិនផ្តល់ផលប្រយោជន៍ដោយផ្ទាល់ដល់ប្រជាជន?”។
លោកបន្តថា “ប្រសិនបើវិស័យឯកជន មានបំណងសាងសង់បន្ថែមទៀត យើងនៅតែអនុញ្ញាត ប៉ុន្តែរដ្ឋាភិបាលមិនដាក់ជាអាទិភាពទៀតទេ ព្រោះម៉ាឡេស៊ីមានអគារខ្ពស់ៗ និងឈានមុខគេនៅក្នុងពិភពលោករួចហើយ”។
លោកបានសង្កត់ធ្ងន់ថា ទីក្រុងគូឡាឡាំពួរ មានអគារខ្ពស់ជាងគេទី២នៅលើពិភពលោក Merdeka 118 កម្ពស់៦៧៨,៩ម៉ែត្រ។ អគារនេះត្រូវបានសាងសង់បញ្ចប់ ដោយក្រុមហ៊ុន Fender Kaysalidis របស់ប្រទេសអូស្ត្រាលី។
អគារខ្ពស់កប់ពពកផ្សេងទៀត នៅក្នុងទីក្រុងរួមមានអគារ The Exchange 106 មានកម្ពស់៤៥៣,៦ម៉ែត្រ រចនាឡើងដោយក្រុមហ៊ុន Mulia Group Architects ព្រមទាំងអគារភ្លោះ Petronas Towers រចនាដោយក្រុមហ៊ុន Cesar Pelli និងមានកម្ពស់៤៥១,៩ម៉ែត្រ។
លោក អាន់វ៉ា ក៏បានពិភាក្សាអំពីការកាត់បន្ថយប្រាក់ខែរបស់រដ្ឋមន្ត្រី រួមជាមួយនឹងការអំពាវនាវ ឱ្យកាត់បន្ថយការចំណាយមិនចាំបាច់ ជាពិសេសនៅក្នុងព្រឹត្តិការណ៍នានារបស់ រដ្ឋាភិបាល៕ប្រភព: Dezeen៕
