ដោយៈ គង់ សូរិយា
ភ្នំពេញៈ អ្នកជំនាញបានលើកឡើងថា សកម្មភាពទិញ លក់ ជួលអចលនទ្រព្យនៅរាជធានីភ្នំពេញ នៅតែមានសកម្មភាពខ្លះៗ។
អគ្គនាយិកាក្រុមហ៊ុនKAT Appraisal លោកស្រីចេវ សុឃុន បានមានប្រសាសន៍ឲ្យដឹងថា សកម្មភាពទិញ លក់ ជួលអចលនទ្រព្យ នៅតែមានសកម្មភាពខ្លះៗ សម្រាប់អចលនវត្ថុ ដែលមានតម្លៃល្អ(តម្លៃក្រោមទីផ្សារ) និងមានទីតាំងល្អ ព្រោះអ្នកវិនិយោគមួយចំនួន ពួកគេនៅតែសម្លឹងនិងបន្តវិនិយោគ។
លោកស្រីបន្តថា “អ្នកមានលុយ នៅតែមានសុទិដ្ឋិនិយម សម្រាប់អចលនវត្ថុណា មានទូតាំងល្អ តម្លៃក្រោមទីផ្សារ និងអាចរកឱកាសចំណេញបាន”។ លោកស្រីបន្តថា “ទីផ្សារអាចនកិយាយពីភាពយឺតយ៉ាវ តែមិនមែនមានន័យថា អ្វីៗជាប់គាំងទាំងស្រុងនោះទេ”។
លោកស្រីចេវ សុឃុនបានបន្តថា នៅក្នុងវិបត្តិតែងតែមានឱកាស ហើយឱកាសដែលអ្នកវិនិយោគ ទទួលបាននាពេលនេះ មានឱកាសចំណេញខ្ពស់សម្រាប់ពេលអនាគត ព្រោះពួកគេអាចទទួលបានអចលនវត្ថុ មានតម្លៃក្រោមទីផ្សារ៣០ទៅ៥០ភាគរយ។
ជាមួយគ្នានេះ លោកឡាំ វិបុល អ្នកជំនាញអចលនវត្ថុផងដែរបានមានប្រសាសន៍ឲ្យដឹងផងដែរថា ឱកាសទិញ លក់ ជួល អចលនទ្រព្យ នៅតែមានសកម្មភាព តែយើងមិនអាចនិយាយថា វាប្រសើរដូចមុនវិបត្តិកូវីដ១៩នោះទេ តែទីផ្សារមានសញ្ញាមានសង្ឃឹម និងកំពុងកំរើកឡើងវិញបណ្តើរៗផងដែរ។
លោកបន្តថា “អ្នកមានលុយនៅតែទិញ នៅពេលពួកគេឃើញអចលនទ្រព្យ មានទីតាំងអាចប្រកបអាជីវកម្មបាន និងមានតម្លៃល្អៗ៕
