ដោយ: គង់ លាងហួរ
អន្តរជាតិ: លោកប្រធានាធិបតីជាប់ឆ្នោតថ្មី របស់ប្រទេសឥណ្ឌូនេស៊ី Prabowo Subianto បានបង្ហើបគោលដៅប្រកបដោយមហិច្ឆិតា ក្នុងការសាងសង់ផ្ទះចំនួន២លានខ្នង ជារៀងរាល់ឆ្នាំ នៅតាមភូមិនានាទូទាំងប្រទេស ខណៈលោកនឹងត្រូវឡើងកាន់តំណែងជាប្រធានាធិបតីផ្លូវការ ក្នុងរយៈពេលប៉ុន្មានសប្ដាហ៍ខាងមុខ។
យោងតាមសារពត៌មាន Jakarta Globe បានរាយការណ៍ថា លោក Hashim Djojohadikusumo អនុប្រធានក្រុមប្រឹក្សាគណបក្ស Gerindra Party និងជាប្អូនប្រុសរបស់លោក Prabowo បានទម្លាយឱ្យដឹងថា លោកប្រធានាធិបតីជាប់ឆ្នោតថ្មី ក៏គ្រោងបញ្ជាឱ្យសាងសង់អាផាតម៉ិន ចំនួន១លានយូនីតនៅតាមទីក្រុងនានាជារៀងរាល់ឆ្នាំផងដែរ។
-->
ផែនការសម្រុកសាងសង់ផ្ទះ ប្រកបដោយមហិច្ឆិតានេះ មានគោលដៅឆ្លើយតប ទៅនឹងបញ្ហាកង្វះខាតផ្ទះ សម្រាប់ប្រជាជនឥណ្ឌូនេស៊ី នៅទូទាំងប្រទេស។
លោក Hashim បានអះអាងថា “ប្រជាជនឥណ្ឌូនេស៊ីស៊ីជិត១១លាននាក់ ពុំមានផ្ទះសមរម្យសម្រាប់រស់នៅនោះទេ”។
ជាមួយគ្នានេះ ប្រទេសឥណ្ឌូនេស៊ី ក៏មានផ្ទះចំនួន២៧លានយូនីត ដែលត្រូវបានគេចាត់ទុកជា “ផ្ទះដែលពុំមានលក្ខខណ្ឌសមរម្យ សម្រាប់ការរស់នៅ” ផងដែរ ដោយសារតែកង្វះទឹកស្អាត និងភ្លើងអគ្គិសនី សម្រាប់បម្រើដល់តម្រូវការប្រើប្រាស់របស់ប្រជាជន។
លោក Hashim បានលើកឡើងថា លោកបានធ្វើដំណើរទៅកាន់ប្រទេសចិន និងប្រទេសកាតា ដើម្បីជួបពិភាក្សាជាមួយបណ្តាវិនិយោគិនដ៏មានសក្តានុពល ដើម្បីប្រែក្លាយផែនការនេះទៅជាការពិត។
លោកគូសបញ្ជាក់ថា “អ្នកវិនិយោគចិនបានត្រៀមខ្លួនជាស្រេច ក្នុងការសាងសង់ផ្ទះ សម្រាប់ប្រជាជនដែលមានជីវភាពខ្វះខាតក្នុងប្រទេសឥណ្ឌូនេស៊ី”។
លើសពីនេះទៀត លោក Hashim បានមានប្រសាសន៍ឱ្យដឹងបន្ថែមថា ផែនការសាងសង់ផ្ទះ នឹងផ្តល់ផលប្រយោជន៍ដល់សេដ្ឋកិច្ច ព្រោះវិស័យអចលនទ្រព្យ អាចជាកត្តាជំរុញកំណើនសេដ្ឋកិច្ចដ៏សំខាន់។
ជាក់ស្ដែង វិស័យសំណង់ និងអចលនទ្រព្យនៅប្រទេសចិន ចូលរួមចំណែកប្រមាណ២៥ភាគរយ នៃផលទុនជាតិសរុប (GDP) របស់ប្រទេសនេះ ខណៈបច្ចុប្បន្ន វិស័យអចលនទ្រព្យបានចូលរួមចំណែក១៤ភាគរយ នៃទំហំGDPរបស់ឥណ្ឌូនេស៊ី៕ប្រភព:Jakarta Globe៕
