ដោយ: គង់ លាងហួរ
ម៉ានីល: រដ្ឋាភិបាលហ្វីលីពីនគ្រោងសាងសង់រោងចក្រថាមពលនុយក្លេអ៊ែរដំបូងបង្អស់របស់ខ្លួននៅត្រឹមឆ្នាំ២០៣២ខាងមុខ។ កិច្ចខិតខំប្រឹងប្រែងនេះជាការចូលរួមជាមួយបណ្តាប្រទេសអាស៊ីផ្សេងៗទៀត ក្នុងការងាកទៅរកប្រភពថាមពលស្អាត ដើម្បីបំពេញកំណើននៃតម្រូវការអគ្គិសនី។
យោងតាមក្រសួងថាមពលហ្វីលីពីន បានប្រកាសឱ្យដឹងកាលពីពេលថ្មីៗនេះថា រដ្ឋាភិបាលក្រុងម៉ានីលគ្រោងនឹងផ្តល់អាទិភាពដល់ច្បាប់ដែលផ្តោតលើសុវត្ថិភាពនុយក្លេអ៊ែរ ព្រមទាំងធានាថា ក្របខ័ណ្ឌច្បាប់ និងបទប្បញ្ញត្តិទាំងឡាយ ត្រូវបានចែងដើម្បីការពារសុខភាពសាធារណៈ បរិស្ថាន និងសន្តិសុខជាតិ។
ជាមួយគ្នានេះ រដ្ឋាភិបាលហ្វីលីពីន ក៏គ្រោងនឹងបង្កើតអាជ្ញាធរបទប្បញ្ញត្តិនុយក្លេអ៊ែរឯករាជ្យមួយ ដើម្បីធ្វើការត្រួតពិនិត្យលើការអភិវឌ្ឍន៍កម្មវិធីផលិតថាមពលដើរដោយនុយក្លេអ៊ែរនេះផងដែរ។
-->
លោកស្រី Sharon Garin អនុរដ្ឋលេខាធិការនៃក្រសួងថាមពលហ្វីលីពីន បានមានប្រសាសន៍ឱ្យដឹងថា ប្រទេសហ្វីលីពីននឹងព្យាយាមផលិតថាមពលនុយក្លេអ៊ែរសម្រាប់ដំណើរការពាណិជ្ជកម្មឱ្យបានយ៉ាងតិចណាស់១.២០០មេហ្គាវ៉ាត់នៅឆ្នាំ២០៣២ ហើយនឹងបន្តកើនឡើងដល់៤.៨០០មេហ្គាវ៉ាត់នៅឆ្នាំ២០៥០។
យោងតាមទិន្នន័យរបស់ស្ថាប័នស្រាវជ្រាវ BloombergNEF បានបង្ហាញថា សមត្ថភាពផលិតថាមពលអគ្គិសនីសរុបរបស់ប្រទេសហ្វីលីពីនទាំងមូលមានចំនួន២៨.៤០០មេហ្គាវ៉ាត់កាលពីចុងឆ្នាំ២០២២។
ការផលិតអគ្គិសនីចេញពីថាមពលនុយក្លេអ៊ែរ កំពុងសម្រេចបានការអភិវឌ្ឍន៍យ៉ាងឆាប់រហ័សនៅលើពិភពលោក ដើម្បីបំពេញតម្រូវការថាមពលដែលកំពុងកើនឡើងយ៉ាងឆាប់រហ័ស និងកាត់បន្ថយការពឹងផ្អែកលើប្រភពថាមពលឥន្ធនៈហ្វូស៊ីល។
ជាមួយគ្នានេះ បណ្តាប្រទេសផ្សេងទៀតក្នុងតំបន់អាស៊ាន ដូចជា ប្រទេសវៀតណាម និងប្រទេសឥណ្ឌូនេស៊ីក៏កំពុងពិចារណាលើដំណើរការផលិតថាមពលនុយក្លេអ៊ែរនេះផងដែរ៕ប្រភព:xinhua៕
