ដោយ: គង់ លាងហួរ
អន្តរជាតិ: តម្រូវការអគារការិយាល័យបៃតង នៅក្នុងប្រទេ សម៉ាឡេស៊ី ត្រូវបានគេព្យាករណ៍ថា នឹងកើនឡើងយ៉ាងគំហុកក្នុងរយៈពេលប៉ុន្មានឆ្នាំខាងមុខ ដោយអាចឈានដល់ប្រហែល១០លានហ្វីតការ៉េជារៀងរាល់ឆ្នាំ។
ទោះជាយ៉ាងណា បច្ចុប្បន្នតម្រូវការនេះ នៅមិនទាន់ត្រូវបានឆ្លើយតបនៅឡើយទេ។ នេះបើយោងតាមក្រុមហ៊ុនផ្តល់សេវាកម្មប្រឹក្សាយោបល់អចលនទ្រព្យ JLL Malaysia។
លោកស្រី Yulia Nikulicheva ប្រធានផ្នែកស្រាវជ្រាវ និងប្រឹក្សាយោបល់របស់ក្រុមហ៊ុន JLL Malaysia បានលើកឡើងថា ការផ្គត់ផ្គង់គ្រប់គ្រាន់ នៃអគារបៃតងអាចសម្រេចទៅបាន តាមរយៈការធ្វើឱ្យប្រសើរឡើង នូវអគារដែលមានស្រាប់ ឬការសា ងសង់អគាររចនាសម្ព័ន្ធថ្មី។
លោកស្រីបន្តថា “ខ្ញុំជឿថា នេះជាបញ្ហាដែលមានដំណោះស្រាយ ព្រោះអគារចាស់ៗជាច្រើនមានសក្ដានុពល និងអាចត្រូវបានធ្វើឲ្យប្រសើរឡើង ដោយលក្ខណៈបៃតង”។
លោកស្រីបានថ្លែង នៅក្នុងសន្និសីទសារព័ត៌មានមួយ ក្នុងអំឡុងពេលបើកសម្ពោធ របាយការណ៍ស្តីពី សក្ដានុពលទីផ្សារការិយាល័យប្រចាំត្រីមាសទី៣ ឆ្នាំ២០២៤ ថា “បច្ចុប្បន្ននេះ ទិដ្ឋភាពផ្នែកហិរញ្ញវត្ថុ មានការប្រកួតប្រជែងខ្លាំង ហើយអគារមួយចំនួន ក៏អាចត្រូវបានគេប្រើប្រាស់ឡើងវិញ ក្នុងគោលបំណងផ្សេងទៀតផងដែរ”។
លោកស្រី Nikulicheva បានកត់សម្គាល់ថា ទីផ្សារអគារការិយាល័យបៃតង នៅក្នុងប្រទេសម៉ាឡេស៊ី កំពុងដំណើរការល្អ។ ប៉ុន្តែ ម៉ាឡេស៊ី នៅតែដើរយឺតជាងប្រទេសសិង្ហបុរី ដែលមានទំហំផ្ទៃក្រឡា អគារការិយាល័យបៃតងច្រើនជាង។
អ្នកជំនាញរូបនេះបានចង្អុលបង្ហាញថា ទីផ្សារការិយាល័យចាស់ៗមួយចំនួន ដូចជា អគារនៅក្នុងប្រទេសជប៉ុន និងទីក្រុងហុងកុង កំពុងប្រឈមមុខនឹងបញ្ហាកាន់តែច្រើន ក្នុងការផ្លាស់ប្តូរទៅរកស្ថានភាពថ្មី។
ប៉ុន្តែចំពោះលក្ខខណ្ឌនៅប្រទេសម៉ាឡេស៊ី លោកស្រីបានគូសបញ្ជាក់ថា“ យើងមានស្ថានភាពល្អណាស់ ដោយសារអគារជាច្រើន ត្រូវបានសាងសង់នាពេលថ្មីៗនេះ។ ទោះបីជាអគារទាំងនោះ មិនមានលក្ខណៈពិសេសបែបបៃតង យ៉ាងណាក្តី យើងយល់ឃើញថា ម្ចាស់អគារទាំងនេះ អាចអនុវត្តន៍ការផ្លាស់ប្តូរបៃតងបាន”។
លោកស្រីបន្ថែមថា ចាប់ពីឆ្នាំនេះ យើងបានសង្កេតឃើញម្ចាស់អគារកាន់តែច្រើន កំពុងអនុវត្តន៍គំនិតផ្តួចផ្តើម ក្នុងការធ្វើឱ្យអគាររបស់ពួកគេមានភាពបៃតង ហើយនៅឆ្នាំក្រោយ និងនៅរយៈពេលប៉ុន្មានឆ្នាំខាងមុខទៀត គម្រោងអភិវឌ្ឍន៍បែបនេះ នឹងកើនឡើងកាន់តែច្រើន៕ប្រភព: Bernama៕
