ដោយ: គង់ លាងហួរ
អន្តរជាតិ: ក្រុមហ៊ុនផលិតយន្តហោះចិន COMAC បានបើកការិយាល័យមួយ នៅក្នុងប្រទេសសិង្ហបុរី ខណៈក្រុមហ៊ុនគ្រប់គ្រងដោយរដ្ឋចិនមួយនេះ កំពុងព្យាយាមវាយលុកចូលទៅកាន់ទីផ្សារយន្តហោះ ដឹកអ្នកដំណើរទូទាំងពិភពលោក។
បច្ចុប្បន្ន ចំណែកដ៏ធំបំផុត នៃទីផ្សារយន្តហោះពាណិជ្ជកម្មនៅលើពិភពលោក ត្រូវបានគ្រប់គ្រងដោយបណ្តាក្រុមហ៊ុនលោកខាងលិច ដូចជា ក្រុមហ៊ុនយក្សអាមេរិក Boeing និងក្រុមហ៊ុនអឺរ៉ុប Airbus ។
លោក Cao Zhongming ឯកអគ្គរដ្ឋទូតចិនប្រចាំប្រទេសសិង្ហបុរី បានថ្លែងនៅក្នុងពិធីសម្ពោធថា ការបើកការិយាល័យថ្មីនេះ ជាការបោះជំហានដ៏សំខាន់មួយ របស់ក្រុមហ៊ុនផលិតយន្តហោះដឹកអ្នកដំណើរចិន ក្នុងការបង្ហាញយន្តហោះរបស់ខ្លួនទៅក្រៅប្រទេស។
លោកឯកអគ្គរដ្ឋទូតចិន បានមានប្រសាសន៍ឱ្យដឹងបន្ថែមថា “យើងសង្ឃឹមថា ក្រុមហ៊ុនCOMAC នឹងសម្រេចបានវឌ្ឍនភាពទៅមុខជាលំដាប់ នៅលើវិថីនៃការធ្វើអន្តរជាតិ ភាវូបនីយកម្ម”។
នៅឆ្នាំនេះ ក្រុមហ៊ុនរដ្ឋចិន COMAC បានបង្កើនផែនការសម្រាប់ការផលិត និងលក់យន្តហោះដឹកអ្នកដំណើរ ដែលមានតួខ្លួនតូចចង្អៀត C919 របស់ខ្លួន ដែលជាប្រភេទស្រដៀងនឹងយន្តហោះ Boeing 737 MAX និងយន្តហោះ A320neo របស់ក្រុមហ៊ុន Airbus។
យ៉ាងណាមិញ នាពេលបច្ចុប្បន្ន យន្តហោះ C919 មានសិទ្ធិហោះហើរបាន តែនៅក្នុងប្រទេសចិនប៉ុណ្ណោះ។ យ៉ាងណាមិញ កន្លងទៅ ក្រុមហ៊ុន COMAC ក៏បានធ្វើយុទ្ធសាស្ដ្រទីផ្សារយន្តហោះរបស់ខ្លួននៅខាងក្រៅប្រទេសចិនផងដែរ។
ប៉ុន្តែប្រភពនានាបានអះអាងថា ប្រទេសចិននៅសេសសល់ផ្លូវដ៏វែងឆ្ងាយទៀត ដែលចិនត្រូវដើរបន្ត ដើម្បីធ្វើយ៉ាងណាឱ្យយន្តហោះរបស់ខ្លួន អាចត្រូវបានគេទទួលស្គាល់ជាលក្ខណៈអន្តរជាតិ ជាពិសេសចិន កំពុងស្វែងរកវិញ្ញាបនបត្រគោលពីសហភាពអឺរ៉ុប ឬសហរដ្ឋអាមេរិក៕ប្រភព: Reuters៕
