ដោយ: គង់ លាងហួរ
អន្តរជាតិ: ក្រុមអ្នកវិភាគលើកឡើងថា ប្រទេសឥណ្ឌាអាចជំនួសប្រទេសចិន ដោយក្លាយជាគោលដៅ វិនិយោគអចលនទ្រព្យលំដាប់កំពូលរបស់តំបន់អាស៊ី។ នេះបើយោងតាមការចុះផ្សាយដោយសារពត៌មាន South China Morning Post។
ក្នុងបរិបទបច្ចុប្បន្ន ប្រទេសឥណ្ឌាកំពុងក្លាយជាមេដែកស្រូបទាញការវិនិយោគដ៏សំខាន់មួយ ខណៈបណ្តាក្រុមហ៊ុនពហុជាតិសាសន៍ជាច្រើន បានឈានជើងចូលមកកាន់ប្រទេសដែលមានប្រជាជន ច្រើនជាងគេនៅលើពិភពលោកមួយនេះ។
ទោះជាយ៉ាងណា លោកស្រី Ada Choi ប្រធានទទួលបន្ទុកផ្នែកស្រាវជ្រាវ នៅក្រុមហ៊ុនប្រឹក្សាអចលនទ្រព្យ CBRE ប្រចាំតំបន់អាស៊ីប៉ាស៊ីហ្វិកលើកឡើងថា ឥណ្ឌានឹងត្រូវការពេលវេលាយូរ មុនពេលប្រទេសដែលមានសេដ្ឋកិច្ច ធំជាងគេទី៣របស់តំបន់អាស៊ីមួយនេះ អាចពង្រឹងឋានៈរបស់ខ្លួនជាគោលដៅវិនិយោគចម្បង ដោយសារតែប្រទេសចិន និងជប៉ុនមានប្រព័ន្ធអេកូឡូស៊ីខ្ពស់ជាងឥណ្ឌា ក្នុងការជួយសម្រួលដល់ការវិនិយោគ។
កាលពីខែឧសភាកន្លងទៅ ក្រុមហ៊ុន GIC របស់ប្រទេសសិង្ហបុរី និងក្រុមហ៊ុនដៃគូ Xander Group បានទិញការិយាល័យទំហំ២,៤លានម៉ែត្រការ៉េ នៅភាគខាងត្បូងនៃទីក្រុងHyderabad ក្នុងតម្លៃប្រហែល២៦២លានដុល្លារអាមេរិក។
ជាមួយគ្នានេះ ក្រុមហ៊ុន CapitaLand India Trust ដែលជាបុត្រសម្ព័ន្ធ របស់ក្រុមហ៊ុនអចលនទ្រព្យសិង្ហបុរី CapitaLand Investment Limited ក៏បានទិញយកភាគហ៊ុន១០០ភាគរយដើម្បីគ្រប់គ្រងអគារ Phoenix Group IT ក្នុងទីក្រុង Hyderabadផងដែរ។
ដោយឡែក ក្រុមហ៊ុនសាជីវកម្ម Daibiru របស់ប្រទេសជប៉ុន កំពុងបណ្តាក់ទុនវិនិយោគ ទឹកប្រាក់ចំនួន១២៣,៥លានដុល្លារអាមេរិក ដើម្បីអភិវឌ្ឍន៍គម្រោងការិយាល័យ Atrium Placeនៅជិតរដ្ឋធានីដេលី(Delhi) ។
ក្រុមអ្នកវិភាគអះអាងថា ការរីកចម្រើននៃកំណើនសេដ្ឋកិច្ចរបស់ប្រទេសឥណ្ឌា និងការកើនឡើងនៃតម្រូវការការិយាល័យ កំពុងធ្វើឱ្យឥណ្ឌាក្លាយជាមេដែក ទាក់ទាញបណ្តាក្រុមហ៊ុនអន្តរជាតិជាច្រើននៅលើពិភពលោក៕ប្រភព: SCMP៕
