ដោយ: គង់ លាងហួរ
អន្តរជាតិ: ការលក់ផ្ទះថ្មី របស់បណ្តាក្រុមហ៊ុនអចលនទ្រព្យលំដាប់យក្ស នៅប្រទេសចិន បានកើនឡើងជាលើកដំបូងកាលពីខែតុលា ឆ្នាំនេះ បន្ទាប់ពីទីក្រុងប៉េកាំងបានដាក់ចេញវិធានការ ដើម្បីដោះស្រាយការធ្លាក់ចុះ នៃទីផ្សារអចលនទ្រព្យនារយៈពេល៤ឆ្នាំកន្លងមកនេះ។
ជាក់ស្ដែង ការលក់លំនៅដ្ឋាន របស់បណ្តាក្រុមហ៊ុនអភិវឌ្ឍន៍អចលនទ្រព្យ កំពូលទាំង១០០របស់ប្រទេសចិន បានកើនឡើងក្នុងរង្វង់៧,១ភាគរយ នៅក្នុងខែតុលា ធៀបនឹងឆ្នាំមុនដែលទំហំទឹកប្រាក់ បានកើនដល់ចំនួន៤៣៥,៥ពាន់លានយ័ន (ប្រហែល៦១,១ពាន់លានដុល្លារ)។
ប្រសិនបើធៀបទៅនឹងខែកញ្ញា ការលក់លំនៅដ្ឋានបានកើនឡើង៧៣ភាគរយ។ នេះបើតាមទិន្នន័យ ដែលចេញផ្សាយដោយក្រុមហ៊ុន China Real Estate Information Corp (CRIC)។
លោក Yan Yuejin អនុប្រធាននៃវិទ្យាស្ថានស្រាវជ្រាវអចលនទ្រព្យ E-House China ដែលមានមូលដ្ឋាននៅទីក្រុងសៀងហៃបានអះអាងថា “ទិន្នន័យចុងក្រោយបំផុតនេះ បានឆ្លុះបញ្ចាំងឱ្យឃើញពីនិន្នាការវិជ្ជមាន ដែលសរបង្ហាញពីសញ្ញានៃស្ថិរភាព និងការស្ទុះងើបឡើងវិញ នៃទីផ្សារអចលនទ្រព្យចិន”។
លោកបានបន្ថែមថា “ការផ្លាស់ប្តូរជាមូលដ្ឋាន កំពុងទទួលបានភាពទាក់ទាញ រួមទាំងកិច្ចព្រមព្រៀងទិញផ្ទះ ប្រភេទទី២(Second-hand home)”។
លោក Yan បានបង្ហាញការជឿជាក់ថា ការធ្លាក់ចុះនៃការផ្គត់ផ្គង់ថ្មី និងការកើនឡើងគួរឱ្យកត់សម្គាល់ នៃការទិញផ្ទះនឹងជួយកាត់បន្ថយចំនួនផ្ទះ ដែលនៅសេសសល់ក្នុងស្តុករបស់អ្នកអភិវឌ្ឍន៍(Inventory)។
កាលពីចុងខែកញ្ញាកន្លងទៅ ប្រទេសចិនបានប្រកាសដាក់ចេញកញ្ចប់ជំរុញសេដ្ឋកិច្ច រួមទាំងការបញ្ចុះអត្រាការប្រាក់លើប្រាក់កម្ចីទិញផ្ទះ និងប្រាក់កក់ ព្រមទាំងលុបចោលការរឹតបន្តឹងលើការទិញផ្ទះ ដើម្បីស្តារទំនុកចិត្តរបស់អ្នកទិញផ្ទះឡើងវិញ និងផ្តល់ហិរញ្ញប្បទាន ដើម្បីជួយដល់អ្នកអភិវឌ្ឍន៍៕ប្រភព: SCMP៕
