ដោយ: គង់ លាងហួរ
អន្តរជាតិ: រដ្ឋ Kelantan នៅក្នុងប្រទេសម៉ាឡេស៊ី កំពុងជំរុញឱ្យមានការសាងសង់ ជញ្ជាំងប្រវែង១០០គីឡូម៉ែត្រតាមបណ្តោយព្រំដែនរបស់ខ្លួន ជាមួយប្រទេសថៃ ដើម្បីប្រឆាំងនឹងការរត់ពន្ធ ការឆ្លងកាត់ដោយខុសច្បាប់ និងទឹកជំនន់។
យោងតាមសារព័ត៌មាន South China Morning Post បានរាយការណ៍ថា លោកMohamed Fadzli Hassan មន្ត្រីជាន់ខ្ពស់នៃរដ្ឋបាលរបស់រដ្ឋ Kelantan បានអះអាងថា អាជ្ញាធររដ្ឋនឹងស្នើគម្រោងសាងសង់ជញ្ជាំងព្រំដែន ទៅកាន់រដ្ឋាភិបាលថ្នាក់ជាតិរបស់ប្រទេសម៉ាឡេស៊ី។
លោកគូសបញ្ជាក់ថា “បច្ចុប្បន្ន ការដើរល្បាតនៅតាមព្រំដែនរវាងម៉ាឡេស៊ី និងថៃកំពុងបង្កបញ្ហាប្រឈមយ៉ាងខ្លាំងដល់កម្លាំងសន្តិសុខ”។
អាជ្ញាធរអះអាងថា បច្ចុប្បន្ន អ្នកដំណើរជាច្រើនបានចតយានយន្តរបស់ពួកគេ នៅទីក្រុង Rantau Panjang នៃរដ្ឋ Kelantan ហើយឆ្លងកាត់ទន្លេ Golok ទៅកាន់ខេត្ត Narathiwat របស់ប្រទេសថៃ។
ដើម្បីបង្កើនសន្តិសុខព្រំដែន លោក Mohd Yusoff Mamat មេប៉ូលីសនៃរដ្ឋ Kelantan ក៏បានផ្តល់អនុសាសន៍ឱ្យរដ្ឋាភិបាលថ្នាក់ជាតិ ដាក់ពង្រាយយន្តហោះដ្រូនគ្មានមនុស្សបើក ដើម្បីដោះស្រាយបញ្ហាឧក្រិដ្ឋកម្មឆ្លងដែន រួមទាំងការជួញដូរគ្រឿងញៀន។ នេះបើយោងតាមសេចក្តីរាយការណ៍ ដោយសារពត៌មាន Bernama ។
បញ្ហាសន្តិសុខព្រំដែន បានទាក់ទាញការយកចិត្តទុកដាក់កាន់តែខ្លាំងឡើង បន្ទាប់ពីកើតមានឧប្បត្តិហេតុនាពេលថ្មីៗនេះ ដែលពាក់ព័ន្ធនឹងជនជាតិម៉ាឡេស៊ីចំនួន៦នាក់ រួមទាំងតារាចម្រៀងអ្នកនាង Eda Ezrin។ ពួកគេត្រូវបានចោទប្រកាន់ពីបទកាន់កាប់ថ្នាំញៀន “មេតំហ្វេតាមីន” ក្នុងប្រទេសថៃ ហើយអាជ្ញាធរថៃ បានរឹបអូសថ្នាំញៀនជាង៦.០០០គ្រាប់ ពីសណ្ឋាគារមួយនៅក្នុងទីក្រុង Sungai Kolok។
ប្រទេសម៉ាឡេស៊ី និងប្រទេសថៃមានព្រំដែនជាប់គ្នា ប្រវែង១ពាន់គីឡូម៉ែត្រ ជាមួយនឹងច្រកព្រំដែនគោកជាច្រើនទីតាំង៕ប្រភព: Vnexpress៕
