ឥណ្ឌូនេស៊ីគ្រោងអនុញ្ញាតឱ្យអ្នកវិនិយោគបរទេសអាចបោះទុនផលិតថាមពលកកើតឡើងវិញចំនួន៧៥ជីហ្គាវ៉ាត់ ក្នុងរយៈពេល១៥ឆ្នាំខាងមុខ

ដោយ: គង់ លាងហួរ
អន្តរជាតិ: ប្រទេសឥណ្ឌូនេស៊ីគ្រោងផ្តល់ឱកាសដល់បណ្តាអ្នកវិនិយោគអន្តរជាតិក្នុងការកសាងរោងចក្រថាមពលកកើតឡើងវិញដែលមានសមត្ថភាពផលិតចំនួន៧៥ជីហ្គាវ៉ាត់ក្នុងរយៈពេល១៥ឆ្នាំខាងមុខ។

ផែនការនេះជាការប្តេជ្ញាចិត្តរបស់លោក Prabowo Subianto ប្រធានាធិបតីឥណ្ឌូនេស៊ីថ្មី ដែលបានចូលកាន់តំណែងកាលពីខែមុន។នេះបើយោងតាមការឱ្យដឹងពីលោក Hashim Djojohadikusumo បេសកជនឥណ្ឌូនេស៊ីប្រចាំសន្និសីទអង្គការសហប្រជាជាតិស្តីពីការប្រែប្រួលអាកាសធាតុឆ្នាំ២០២៤។

ឥណ្ឌូនេស៊ី ដែលជាប្រទេសបញ្ចេញឧស្ម័នផ្ទះកញ្ចក់ដ៏ធំបំផុតមួយរបស់ពិភពលោកបានប្តេជ្ញាសម្រេចអព្យាក្រឹតភាពកាបូននៅឆ្នាំ២០៦០តាមរយៈវិធីសាស្ត្រផ្សេងៗ រួមទាំងការបិទដំណើរការរោងចក្រថាមពលដើរដោយធ្យូងថ្ម និងដាក់ជំនួសមកវិញដោយរោងចក្រថាមពលកកើតឡើងវិញ។

លោក Hashim បានអះអាងថា រដ្ឋាភិបាលថ្មីរបស់ឥណ្ឌូនេសុីនឹងផលិតថាមពលថ្មីចំនួន១០០ជីហ្គាវ៉ាត់ ក្នុងរយៈពេល១៥ឆ្នាំខាងមុខ ដែលក្នុងនោះថាមពលថ្មីចំនួន៧៥% ឬស្មើនឹង៧៥ជីហ្គាវ៉ាត់នឹងក្លាយជាថាមពលកកើតឡើងវិញ។

លោក Hashim បានបន្ថែមថា គម្រោងផលិតថាមពលអាចកកើតឡើងវិញ នឹងដាក់រួមបញ្ចូលទាំងប្រភពថាមពលពន្លឺព្រះអាទិត្យ ថាមពលវារីអគ្គិសនី កំដៅក្នុងផែនដី និងនុយក្លេអ៊ែរ។

យ៉ាងណាមិញ មន្ដ្រីជាន់ខ្ពស់ឥណ្ឌូនេស៊ីរូបនេះ មិនបានពន្យល់បកស្រាយអំពីផែនការផលិតថាមពលថ្មីចំនួន២៥ភាគរយផ្សេងទៀតនៃផែនការសរុបចំនួន១០០ជីហ្គាវ៉ាត់នោះទេ៕ប្រភព: Reuters៕