ដោយ: គង់ លាងហួរ
អន្តរជាតិ: ក្រុមហ៊ុន Blackstone Inc. បានក្លាយជាបេក្ខភាពនាំមុខ ក្នុងការដេញថ្លៃទិញអគារការិយាល័យចម្រុះ នៅទីក្រុងតូក្យូ ដែលត្រូវបានដាក់លក់ដោយក្រុមហ៊ុន Seibu Holdings ក្នុងកិច្ចព្រមព្រៀង ក្រោមទំហំទឹកប្រាក់ចំនួន៤០០ពាន់លានយ៉េន(ប្រហែល២,៦ពាន់លានដុល្លារ)។
ក្រុមហ៊ុន Seibu បានសម្រេចចិត្ដធ្វើការជាមួយ Blackstone ដែលជាក្រុមហ៊ុនវិនិយោគខ្នាតយក្ស របស់សហរដ្ឋអាមេរិកក្នុងគោលបំណងលក់អគារ Tokyo Garden Terrace Kioicho របស់ខ្លួន បន្ទាប់ពីបានបើកដំណើរការដេញថ្លៃ អស់រយៈពេលជាច្រើនខែ។
យោងតាមប្រភពបានទម្លាយឱ្យដឹងថា ទំហំទឹកប្រាក់ចំនួន៤០០ពាន់លានយ៉េននេះ គ្រាន់តែជាតម្លៃចរចាប៉ុណ្ណោះ ហើយតម្លៃនេះ អាចប្រែប្រួលបាន ខណៈការពិភាក្សានេះក៏រួមបញ្ចូលផងដែរ នូវកិច្ចព្រមព្រៀងអនុញ្ញាតឱ្យក្រុមហ៊ុន Seibu បន្តគ្រប់គ្រងប្រតិបត្តិការក្នុងអគារនេះ។
ភាគីនានាមានបំណងចុះហត្ថលេខា លើកិច្ចព្រមព្រៀងមួយនៅចុងឆ្នាំនេះ។ ទោះជាយ៉ាងណា ការពិភាក្សាកំពុងបន្ត ខណៈបណ្តាក្រុមហ៊ុន ដែលចូលរួមការដេញថ្លៃចុងក្រោយផ្សេងទៀត រួមមាន ក្រុមហ៊ុន KKR & Co. និងក្រុមហ៊ុន BentallGreen Oak ដែលជាអ្នកដេញថ្លៃដាច់ដោយឡែក។
ការដាក់លក់អគារ Tokyo Garden Terrace Kioicho ជាផ្នែកមួយនៃផែនការរបស់ក្រុមហ៊ុន Seibu Holdings ហើយក្រុមហ៊ុនគ្រោងសម្រេចឱ្យបាននូវ កិច្ចព្រមព្រៀងមួយនៅចុងឆ្នាំនេះ។ ប៉ុន្តែការសម្រេចចិត្តណាមួយ មិនទាន់ត្រូវបានធ្វើឡើងនោះទេ ។
អគារ Tokyo Garden Terrace Kioicho រួមមានការិយាល័យចំនួន៣៦ជាន់ អាផាតម៉ិនសម្រាប់ជួល សណ្ឋាគារ ហាងលក់រាយ និងហាងលក់អាហារផ្សេងៗ។
អាគារនេះ ត្រូវបានអភិវឌ្ឍន៍ដោយក្រុមហ៊ុន Seibu និងបើកដំណើរការក្នុងឆ្នាំ២០១៦ មានទីតាំងនៅចំកណ្តាលទីក្រុងតូក្យូរបស់ប្រទេសជប៉ុន និងស្ថិតនៅជិតតំបន់ដែលពោរពេញទៅដោយអគាររដ្ឋបាល និងខុទ្ទកាល័យនាយករដ្ឋមន្ត្រីជប៉ុន។
យោងតាមក្រុមហ៊ុនប្រឹក្សាអចលនទ្រព្យ Jones Lang LaSalle Inc.(JLL) បានឱ្យដឹងថា ទំហំនៃការវិនិយោគអចលនទ្រព្យពាណិជ្ជកម្ម នៅក្នុងប្រទេសជប៉ុន បានកើនឡើង២១%ធៀបនឹងឆ្នាំមុន ដល់ចំនួន២,៦ទ្រីលានយ៉េន ក្នុងឆមាសទីមួយឆ្នាំ២០២៤។
ក្រុមហ៊ុន JLL បានបន្ថែមថា ទីក្រុងតូក្យូជាទីក្រុងមួយ ដែលមានភាពសកម្មបំផុត នៅលើពិភពលោក ដោយនាំមុខទាំងទីក្រុងញូវយ៉ក របស់សហរដ្ឋអាមេរិក និងទីក្រុងឡុងដ៍របស់ប្រទេសអង់គ្លេស៕ប្រភព: Nikkei Asia៕
