ដោយ: គង់ លាងហួរ
អន្តរជាតិ: នៅក្នុងរបាយការណ៍របស់ខ្លួន ក្រុមហ៊ុនប្រឹក្សាអចលនទ្រព្យ Cushman & Wakefield បានព្យាករណ៍ថា តម្រូវការសុទ្ធនៃទីផ្សារការិយាល័យរបស់ទីក្រុងហ្សាការតា ប្រទេសឥណ្ឌូនេសុីនឹងបន្តមានភាពវិជ្ជមានក្នុងរង្វង់ប្រមាណ១៧មុឺនម៉ែត្រការ៉េសម្រាប់ពេញមួយឆ្នាំ២០២៥។
ក្រុមហ៊ុនប្រឹក្សាអចលនទ្រព្យ Cushman & Wakefield បន្តថា អត្រាការិយាល័យទំនេរត្រូវបានគេរំពឹងថានឹងបន្តធ្លាក់ចុះបន្ថែមទៀត ដោយសារតែពុំមានការផ្គត់ផ្គង់ការិយាល័យថ្មីនៅឆ្នាំ២០២៥ខាងមុខ។
ម្យ៉ាងទៀត ទោះបីជាអត្រាគ្របដណ្តប់ការជួលការិយាល័យមានការកើនឡើងជាបន្តបន្ទាប់យ៉ាងណាក្តី បណ្តាអ្នកអភិវឌ្ឍន៍ ឬម្ចាស់អគារនឹងនៅតែបន្តមានការប្រុងប្រយ័ត្នខ្ពស់ នៅពេលពិចារណាដំឡើងតម្លៃជួលអប្បបរមា ដែលអ្នកជួលបង់ទៅឱ្យម្ចាស់អគារក្រោមកិច្ចព្រមព្រៀងជួល។
-->
ចំណែកឯ តម្លៃជួលសរុប(Gross rental rates) ត្រូវបានព្យាករណ៍ថា នឹងកើនឡើងបន្តិច បណ្តាលមកពីការកើនឡើងតម្លៃជួលមូលដ្ឋាន និងការគិតថ្លៃសេវាផ្សេងៗទៀតក្នុងការិយាល័យ។
របាយការណ៍ខាងលើបញ្ជាក់ថា ទីផ្សារនឹងងើបឡើងវិញបន្ថែមទៀតនៅឆ្នាំ២០២៥ បន្ទាប់ពីការបោះឆ្នោតនៅឥណ្ឌូនេសុីបានបញ្ចប់ ដោយរក្សាបានស្ថិរភាពនយោបាយ ស្របពេលដែលសេដ្ឋកិច្ចឥណ្ឌូនេស៊ីត្រូវបានព្យាករណ៍ថា នឹងមានភាពប្រសើរឡើង។
ជាក់ស្ដែង ធនាគារពិភពលោកព្យាករណ៍ថា កំណើនសេដ្ឋកិច្ចរបស់ប្រទេសឥណ្ឌូនេស៊ីនឹងកើនឡើងក្នុងកម្រិត៥% ក្នុងឆ្នាំ២០២៤នេះ និង៥,១% ក្នុងឆ្នាំ២០២៥ ដែលស្មើនឹងអត្រាកំណើនសេដ្ឋកិច្ចជាមធ្យមប្រចាំឆ្នាំចំនួន៥% នៅចន្លោះឆ្នាំ២០១៥ និងឆ្នាំ២០១៩។
តើអ្វីទៅជាតម្រូវការសុទ្ធ?
តម្រូវការសុទ្ធ (Net Absorption) ជាការយកផលបូកនៃចំនួនផ្ទៃក្រឡាការិយាល័យ ដែលត្រូវបានគេជួលទៅដកផលបូកនៃចំនួនផ្ទៃក្រឡាការិយាល័យ ដែលត្រូវបានគេឈប់ជួល ឬទុកឱ្យនៅទំនេរចោល ក្នុងអំឡុងពេលជាក់លាក់ណាមួយ។
ជាឧទាហរណ៍ ប្រសិនបើទំហំការិយាល័យចំនួន១០០.០០០ម៉ែត្រការ៉េត្រូវបានជួលក្នុងត្រីមាសទី២ ប៉ុន្តែក្នុងត្រីមាសទី២ដូចគ្នានោះ មានការិយាល័យចំនួន២០.០០០ម៉ែត្រការ៉េត្រូវបានទុកនៅទំនេរចោល។ ដូច្នេះ តម្រូវការសុទ្ធស្មើនឹងចំនួន៨០.០០០ម៉ែត្រការ៉េ៕ប្រភព: Real Estate Asia៕
