រដ្ឋបាលខេត្តចុះពិនិត្យគំរោងវិនិយោគចំនួនបីដែលមានទុនជាង១០០០លានដុល្លារអាមេរិក

ដោយៈ គង់ សូរិយា

    ព្រះសីហនុៈ មន្រ្តីរដ្ឋបាលខេត្ត និងក្រុមថ្នាក់ដឹកនាំការងារជម្រុញការវិនិយោគនៅខេត្តព្រះសីហនុ បានចុះពិនិត្យថែរទាំគំរោងវិនិយោគចំនូន៣ ដែលមានទុនវិនិយោគជាង១០០០លានដុល្លារអាមេរិក។

ក្នុងយន្តការថែទាំវិនិយោគិន លោក ឡុង ឌីម៉ង់ អភិបាលរងនៃគណៈអភិបាលខេត្ត និងជាសមាជិកនៃក្រុមការងារជំរុញការវិនិយោគក្នុងខេត្តព្រះសីហនុ បានចូលរួមជាមួយ លោកបណ្ឌិតសភាចារ្យហ៊ាន សាហ៊ីប ទីប្រឹក្សាសម្តេចធិបតីនាយករដ្ឋមន្រ្តី និងជាប្រធានក្រុមការងារជំរុញការវិនិយោគក្នុងខេត្តព្រះសីហនុ អញ្ជើញចុះពិនិត្យគម្រោង ដែលបានទទួលបានការលើកទឹកចិត្ត ការអនុគ្រោះ និង ការសម្រួលនីតិវិធី ក្រោមវិសាលភាព “កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ២០២៤” នៅទីតាំងចំនួន៣ ដែលមានទុនវិនិយោគប៉ាន់ស្មានសរុប១.០៤០លានដុល្លារអាមេរិក និងអាចបង្កើតការងារបានចំនួន ៥.៧៥៥កន្លែង

ចុចទីនេះដើម្បី Subscribe Telegram Channel «Property Area Asia» សម្រាប់ទទួលបានព័ត៌មានថ្មីៗ

-->

គំរោងចំនួនបីនោះ រួមមាន ទី១. គម្រោងសណ្ឋាគារផ្កាយ៥ និង អគារពាណិជ្ជកម្ម (Peninsula Integrated Resort) របស់ក្រុមហ៊ុន Peninsula Bay Investment Co., Ltd ទី២ គម្រោង រោងចក្រផលិតដែករបស់ក្រុមហ៊ុន HUALE STEEL (CAMBODIA) CO., LTD. ទី៣គម្រោងរោងចក្រផលិត និងផ្គុំដំឡើងបន្ទះសូឡា និងគ្រឿងបង្គុំរបស់ ក្រុមហ៊ុន JINGYING PV-TECH (CAMBODIA) CO., LTD។

លោកអភិបាលរង បានលើកឡើងថា ការចុះពិនិត្យគម្រោងដែលទទួលបានការលើកទឹកចិត្តរួចហើយនេះ មានគោលបំណង ដើម្បីតាមដាន និងជំរុញការអនុវត្តគម្រោង និងស្តាប់ពីវឌ្ឍនភាពអនុវត្តគម្រោង សំណូមពរ និងជាពិសេសបញ្ហាប្រឈមនានា ពីវិនិយោគិនដោយផ្ទាល់។

លោកបញ្ជាក់ថា “ការចុះពិនិត្យនេះ គឺជាភារកិច្ចសំខាន់ដែលរដ្ឋបាលខេត្តក្នុងនាមជាអាជ្ញាធរមូលដ្ឋាន និងក្រុមការងារត្រូវបំពេញនិងកំពុងបន្តអនុវត្តជាប់ជាប្រចាំ”។ លោកបន្តថា “បន្ថែមពីលើការទាក់ទាញការវិនិយោគ ភារកិច្ចសំខាន់មួយទៀតរបស់យើងគឺ ស្វែងយល់អំពីបញ្ហាប្រឈមរបស់វិនិយោគិន ដើម្បីមានលទ្ធភាពផ្តល់ដំណោះស្រាយ និងការសម្របសម្រួលផ្សេងៗ រួមទាំងការពន្យល់នានា ដើម្បីជំរុញការអនុវត្តគម្រោងដោយរលូន និងបង្កើតបរិយាកាសវិនិយោគកាន់តែល្អប្រសើរ”៕