ដោយៈ គង់ សូរិយា
ភ្នំពេញៈ គាំទ្រគោលនយោបាយរបស់រដ្ឋាភិបាល និងស្ថានភាពទីផ្សារលំនៅដ្ឋានប្រសើរឡើង លោកអ្នកឧកញ៉ាលី ហួរបានបើកការ ដ្ឋានសាងសង់គំរោងបុរីវិមានភ្នំពេញ ផាឡេស គំរោងទី១៧ ស្ថិតនៅបណ្តោយផ្លូវ៥៩៨ ជិតកែងផ្លូវភ្លោះ៣៤២ ខណ្ឌឫស្សីកែវ រាជធានីភ្នំពេញ។
គំរោងនេះ ស្ថិតក្រោមក្រុមហ៊ុន លី ហូរ ឌីវេឡុបម៉ិន វិមានភ្នំពេញ។
គម្រោងថ្មីរបស់បុរីវិមានភ្នំពេញនេះ មានលក្ខណៈពិសេសខុសពីគម្រោងដទៃរបស់ខ្លួន ដោយហេតុថា គម្រោងនេះសាងសង់វីឡាចំនួនតិច គឺត្រឹមតែ ១៧ខ្នងប៉ុណ្ណោះ ដែលវីឡានីមួយៗអាចមានតម្លៃចន្លោះចាប់ពី ៣លានដុល្លារអាមេរិកឡើងទៅ។
លោកអ្នកឧកញ៉ា លី ហួរ មានប្រសាសន៍ក្នុងពិធីបើកការដ្ឋានសាងសង់គំរោងថ្មីនេះនាព្រឹកថ្ងៃទី១៥ មករាថា គម្រោងនេះគឺត្រូវបានគិតគូរជាយូរមកហើយ និងមានលក្ខណៈពិសេសជាច្រើនផ្តល់ជូនអតិថិជនរបស់ខ្លួន ដោយនឹងផ្តល់នូវឯកជនភាព ដល់ម្ចាស់វីឡាទាំងអស់ ស្របពេលដែលគម្រោងនេះ មិនមានបើកឱ្យចរាចរណ៍ឆ្លងកាត់នោះទេ លុះត្រាតែមានការណាត់ជួប ជាមួយម្ចាស់គេហដ្ឋានណាមួយតែម្តង។
លោកអ្នកឧកញ៉ាបានបន្តថា គម្រោងនេះ នឹងផ្តល់នូវប្រណិតភាពដល់ម្ចាស់វីឡាទាំងអស់។
គម្រោងទី១៧ របស់បុរីវិមានភ្នំពេញ ផាឡេស នេះមានវីឡាចំនួន ២ប្រភេទ ដែលក្នុងនោះមានវីឡា ផាឡេស រាងអក្សរ I និងវីឡា ផាឡេស រាងអក្សរ L ហើយប្រភេទវីឡានីមួយៗ មានជាមួយទីធ្លារសួនខាងក្រៅផ្ទះធំទូលាយ មានចំណតរថយន្ត ទីធ្លារក្នុងរបងផ្ទះ បន្ទប់ទទួលភ្ញៀវចំនួន១ បន្ទប់គេងចំនួន៩ បន្ទប់ទឹកចំនួន១០ បន្ទប់ទទួល ទានអាហារចំនួន១ និងកន្លែងចំអិនអាហារចំនួន ៣ផងដែរ។ ក្រៅពីនេះ ប្រភេទវីឡានីមួយ ក៏មាននូវ វ៉េរង់ដា បន្ទប់សិក្សា ឃ្លាំង និងបន្ទប់ផ្សេងៗទៀត ដែលនឹងផ្តល់ជូនម្ចាស់វីឡាទាំងអស់ នូវផាសុកភាពក្នុងការរស់នៅ។
នេះជាការបើកទំព័រឆ្នាំថ្មី2025នេះ! សម្រាប់បុរី វិមានភ្នំពេញ គម្រោងទី១៧ គឺជាគម្រោងលំនៅឋានប្រភេទវីឡាទោល ខ្នាតធំស្កឹមស្កៃ ទំនើប ស៊ីវិល័យ និងប្រណិតបំផុត ដែលមានទំហំដីចាប់ពី 35m x 39m ឡើងទៅ និងទំហំផ្ទះចាប់ពី 22.5m x18m មានកំពស់៣ជាន់(១៥៥១ម៉ែត្រការ៉េ ស្ថិតក្នុងទីតាំងដ៏ល្អបំផុតនៅលើវិថី ឯ.ឧ ជាសុផារ៉ា ជាតំបន់ហ៊ុព័ទ្ធជុំវិញដោយផ្សារទំនើប ហាងទំនិញតូចធំ សាលារៀនជាតិ អន្តរជាតិ មន្ទីរពេទ្យ ស្ថាប័នរដ្ឋជាច្រើន៕
