ដោយ: គង់ លាងហួរ
អន្តរជាតិ: យោងតាមក្រុមអ្នកវិភាគបានឱ្យដឹងថា ការស្ថាបនាគម្រោងហេដ្ឋារចនាសម្ព័ន្ធនានាប្រកបដោយមហិច្ឆតារបស់ប្រទេសហ្វីលីពីននឹងផ្លាស់ប្តូរទិដ្ឋភាពក្នុងទីផ្សារអចលនទ្រព្យ ដោយជំរុញឱ្យតម្លៃដីធ្លី និងអត្រាជួលការិយាល័យមានការកើនឡើង។
លោក Joey Roi Bondoc ប្រធានផ្នែកស្រាវជ្រាវនៃក្រុមហ៊ុនប្រឹក្សាអចលនទ្រព្យ Colliers Philippines បានថ្លែងក្នុងបទសម្ភាសន៍ជាមួយសារពត៌មាន BusinessWorld ថា “ការវិនិយោគក្នុងទំហំទឹកប្រាក់យ៉ាងធំលើហេដ្ឋារចនាសម្ព័ន្ធនឹងធ្វើឱ្យវិស័យអចលនទ្រព្យហ្វីលីពីនមានភាពទាក់ទាញ ដោយផ្តល់ផលចំណេញដល់អ្នកអភិវឌ្ឍន៍ខុនដូនៅទូទាំងប្រទេស”។
គម្រោងដឹកជញ្ជូនធំៗដូចជា រថភ្លើងក្រោមដីក្នុងទីក្រុងម៉ានីល “Metro Manila Subway” ដែលគ្រោងបញ្ចប់ការសាងសង់នៅឆ្នាំ២០២៨ ត្រូវបានក្រុមអ្នកវិភាគមើលឃើញថា នឹងផ្តល់អត្ថប្រយោជន៍ដល់តំបន់ពាណិជ្ជកម្មកណ្តាល (CBDs) ដូចជាតំបន់ Quezon City តំបន់ Ortigas និងតំបន់ Fort Bonifacio។
-->
គម្រោងផ្សេងទៀត ដែលអ្នកអភិវឌ្ឍន៍អចលនទ្រព្យកំពុងរង់ចាំការប្រកាសបើកដាក់ឱ្យដំណើរការ រួមមានដូចជា គម្រោងខ្សែរថភ្លើង MRT លេខ៧ និងលេខ៤ គម្រោងផ្លូវរថភ្លើងតភ្ជាប់ពីរដ្ឋធានីម៉ានីលទៅកាន់តំបន់ Clark គម្រោងអាកាសយានដ្ឋានអន្តរជាតិម៉ានីលថ្មី និងគម្រោងផ្លូវរថភ្លើងធុនស្រាល Cavite ដំណាក់កាលទី២។
លោក Bondoc បានគូសបញ្ជាក់បន្ថែមថា “អ្នកទិញនឹងស្វែងរកទិញលំនៅដ្ឋានក្បែរគម្រោងហេដ្ឋារចនាសម្ព័ន្ធសាធារណៈ”។
ចំពោះទីផ្សារការិយាល័យ លោក Bondoc បានអះអាងថា “ការកើនឡើងនៃតម្រូវការ និងតម្លៃជួលការិយាល័យ ដែលមានទីតាំងនៅជិតមធ្យោបាយធ្វើដំណើរថ្មី អាស្រ័យលើភាពទាក់ទាញនៃទីតាំងសម្រាប់អ្នកជួល និងអត្រាការិយាល័យទំនេរបច្ចុប្បន្ន”។
លោក Bondoc បានបន្តទៀតថា “សម្រាប់ទាំងផ្នែកការិយាល័យ និងលំនៅដ្ឋាន វាជារឿងមួយប្រាកដណាស់ដែលយុទ្ធសាស្រ្តរបស់អ្នកអភិវឌ្ឍន៍ចាប់ពីឆ្នាំ២០២៥នេះទៅ នឹងសម្របតាមផែនការជំរុញហេដ្ឋារចនាសម្ព័ន្ធរបស់រដ្ឋាភិបាលហ្វីលីពីន”។
ទោះជាយ៉ាងណាក្តី ក្រុមហ៊ុន Colliers នៅតែជំរុញឱ្យមានការប្រុងប្រយ័ត្នចំពោះទស្សនវិស័យជារួមលើសក្ដានុពលនៃតម្លៃជួលការិយាល័យ ដោយសារតែបច្ចុប្បន្ន ទីក្រុងម៉ានីលទាំងមូលមានទំហំការិយាល័យទំនេរប្រហែល២,៦លានម៉ែត្រការ៉េ៕ប្រភព: BusinessWorld៕
