ដោយៈ គង់ សូរិយា
ភ្នំពេញៈ សម្ដេចបវរធិបតី ហ៊ុន ម៉ាណែតនាយករដ្ឋមន្រ្តីនៃកម្ពុជាបានជម្រុញ ឲ្យក្រសួងសាធារណៈការត្រូវជំរុញការសិក្សា និងពិនិត្យលទ្ធភាពស្វែងរកដៃគូវិនិយោគ និងដៃគូអភិវឌ្ឍលើការអភិវឌ្ឍប្រព័ន្ធផ្លូវដែកល្បឿនលឿន។
សម្តេចបានថ្លែង ក្នុងពិធីបិទសន្និបាតការងារក្រសួងសាធារណៈការ និងដឹកជញ្ជូនកាលពីល្ងាចថ្ងៃទី២៣ មករា ដោយបានជម្រុញឲ្យថ្នាក់ដឹកនាំក្រសួងគិតគូរឱ្យបានច្បាស់លាស់ អំពីការរៀបចំផែនការម អភិវឌ្ឍវិស័យផ្លូវដែកនៅកម្ពុជា ជម្រើសការវិនិយោគប្រសិទ្ធភាពសេដ្ឋកិច្ច និងផលប៉ះពាល់ផ្សេងៗ ដើម្បីសម្រួលដល់ការធ្វើដំណើរ ការដឹកជញ្ជូនគ្រប់ប្រភេទ និងការកាត់បន្ថយការកកស្ទះចរាចរណ៍ ជាពិសេសការជំរុញ អនុវត្តកិច្ចព្រមព្រៀងទ្វេភាគីកម្ពុជា-ថៃ ឆ្នាំ២០១៩ ស្តីពីការធ្វើចរាចរណ៍ផ្លូវដែករួមគ្នា និងការសិក្សាពិនិត្យលទ្ធភាព លើការសាងសង់ស្ថានីយរថភ្លើង អន្តរជាតិថ្មីនៅតំបន់ស្ទឹងបត់ ជំនួសឲ្យយស្ថានីយប៉ោយប៉ែត។
