ដោយ: គង់ លាងហួរ
អន្តរជាតិ: ក្រុមហ៊ុនបច្ចេកវិទ្យាយក្ស Apple បានដាក់មូលដ្ឋានផលិតកម្មដ៏ធំនៅប្រទេសចិន ដើម្បីប្រមូលផ្តុំសង្វាក់ផលិតកម្មទូរសព្ទ iPhones និងផលិតផលបច្ចេកវិទ្យាជាច្រើនផ្សេងទៀត។
ទោះបីជាយ៉ាងណាក្តី ការកើនឡើងនៃតម្លៃពលកម្ម ភាពតានតឹងពាណិជ្ជកម្ម និងការរំខានពីជំងឺរាតត្បាត បានបង្ខំឱ្យក្រុមហ៊ុនបច្ចេកវិទ្យាយក្សអាមេរិកមួយនេះពិចារណាឡើងវិញនូវយុទ្ធសាស្ត្ររបស់ខ្លួន។
ជាក់ស្ដែង បច្ចុប្បន្ន ក្រុមហ៊ុន Apple កំពុងបង្កើនការធ្វើពិពិធកម្មការផលិតរបស់ខ្លួនទៅកាន់បណ្តាប្រទេសមួយចំនួនដូចជាប្រទេសឥណ្ឌា និងវៀតណាម ដែលផ្តល់នូវការចំណាយទាប គោលនយោបាយពាណិជ្ជកម្មអំណោយផល និងមានភូមិសាស្ត្រនៅជិតទីផ្សារដែលកំពុងរីកចម្រើន។
-->
តើមានមូលហេតុអ្វីបានជាក្រុមហ៊ុន Apple ផ្លាស់ប្ដូរមូលដ្ឋានផលិតកម្មទៅប្រទេសឥណ្ឌា និងវៀតណាម?។
ការសម្រេចចិត្តរបស់ក្រុមហ៊ុន Apple ក្នុងការផ្លាស់ប្តូរមូលដ្ឋានផលិតកម្មទៅកាន់ប្រទេសឥណ្ឌា និងវៀតណាម ជាផ្នែកមួយនៃយុទ្ធសាស្រ្ត ដើម្បីកាត់បន្ថយការពឹងផ្អែកលើប្រទេសចិន។
ខាងក្រោមនេះជាមូលហេតុ ដែលនាំឱ្យឥណ្ឌា និងវៀតណាមក្លាយទៅជាតួអង្គដ៏សំខាន់នៅក្នុងខ្សែសង្វាក់ផ្គត់ផ្គង់របស់ក្រុមហ៊ុន Apple។
ទី១: ប្រសិទ្ធភាពនៃការចំណាយ និងការលើកទឹកចិត្តរបស់រដ្ឋាភិបាល។
ប្រទេសឥណ្ឌាជាប្រទេស ដែលមានកម្លាំងពលកម្មវ័យក្មេងយ៉ាងច្រើន ហើយរដ្ឋាភិបាលឥណ្ឌាក៏បានផ្តល់ការលើកទឹកចិត្តនានាដើម្បីទាក់ទាញក្រុមហ៊ុន Apple ផងដែរ។
ចំណែក ប្រទេសវៀតណាមត្រូវបានគេស្គាល់ថា ជាតំបន់ឧស្សាហកម្មអេឡិចត្រូនិកដ៏ទាក់ទាញបំផុត ដែលសមស្របនឹងស្តង់ដារខ្ពស់របស់ក្រុមហ៊ុន Apple ជាពិសេសសម្រាប់ការផលិតកាស់ AirPods និងគ្រឿងបន្លាស់។
ទី២: ភាពអំណោយផលនៃគោលនយោបាយពាណិជ្ជកម្ម។
ប្រទេសឥណ្ឌា និងវៀតណាម បានផ្តល់លក្ខខណ្ឌពាណិជ្ជកម្មល្អ បើធៀបនឹងប្រទេសចិន ដែលកំពុងប្រឈមនឹងការបង្កើនពន្ធ និងការរឹតបន្តឹងពាណិជ្ជកម្ម។ តាមរយៈការធ្វើពិពិធកម្មផលិតកម្ម ក្រុមហ៊ុន Apple អាចគេចផុតពីរបាំងពាណិជ្ជកម្មមួយចំនួន និងឈានជើងចូលទៅកាន់ទីផ្សារ ដែលកំពុងមានការរីកចម្រើនយ៉ាងឆាប់រហ័សនៅតំបន់អាស៊ី។
តើក្រុមហ៊ុន Apple ជួបប្រទះបញ្ហាប្រឈមអ្វីខ្លះ នៅពេលធ្វើការផ្លាស់ប្តូរមូលដ្ឋានផលិតកម្ម?។
ទោះបីជាការធ្វើពិពិធកម្មការផលិតអាចផ្តល់នូវអត្ថប្រយោជន៍យ៉ាងច្រើនយ៉ាងណាក្តី ប៉ុន្តែក្រុមហ៊ុន Apple ក៏ត្រូវប្រឈមមុខនឹងឧបសគ្គជាច្រើននៅក្នុងដំណើរការមួយចំនួនផងដែរ។
ទោះបីជាក្រុមហ៊ុន Apple បានផ្លាស់ប្តូរមូលដ្ឋាននៃការដំឡើងទូរសព្ទស្មាតហ្វូនរបស់ខ្លួនទៅកាន់ប្រទេសឥណ្ឌា និងវៀតណាមយ៉ាងណាក្តី ក៏ក្រុមហ៊ុន Apple នៅតែបន្តពឹងផ្អែកលើសម្ភារៈសំខាន់ៗមកពីប្រទេសចិន។
ប្រទេសចិនជាប្រភពផ្គត់ផ្គង់រ៉ែកម្រនាំមុខគេ ដែលមានសារៈសំខាន់សម្រាប់ការផលិតថ្មទូរសព្ទ iPhone។ ការពឹងផ្អែកនេះធ្វើឱ្យក្រុមហ៊ុន Apple ពិបាកផ្តាច់ខ្លួនចេញទាំងស្រុងពីខ្សែសង្វាក់ផ្គត់ផ្គង់របស់ប្រទេសចិន៕ប្រភព:CNN៕
