ដោយ: គង់ លាងហួរ
អន្តរជាតិ: តម្រូវការលើទីផ្សារការិយាល័យនៅក្នុងទីក្រុងញូវយ៉ករបស់សហរដ្ឋអាមេរិកបានងើបឡើងដល់កម្រិតមុនផ្ទុះវិបត្តិជំងឺកូវីដ-១៩ ដោយសារបណ្តាក្រុមហ៊ុននានាបានលើកទឹកចិត្តឱ្យបុគ្គលិករបស់ខ្លួនវិលត្រឡប់ទៅបំពេញការងារនៅក្នុងការិយាល័យវិញ។
ក្នុងអំឡុងត្រីមាសទី៤ ឆ្នាំមុន តម្រូវការជួលការិយាល័យនៅក្នុងទីក្រុងញូវយ៉កបានហក់ឡើងចំនួន២៥ភាគរយបើប្រៀបធៀបនឹងឆ្នាំ២០២៣។ នេះបើយោងតាមរបាយការណ៍ស្រាវជ្រាវថ្មីពីក្រុមហ៊ុន VTS។
លោក Nick Romito នាយកប្រតិបត្តិនៃក្រុមហ៊ុនអចលនទ្រព្យ VTS បានលើកឡើងថា“ការសម្រេចចិត្តរបស់បណ្តាក្រុមហ៊ុននានាត្រឡប់ទៅបំពេញការងារនៅក្នុងការិយាល័យវិញឆ្លុះបញ្ចាំងឱ្យឃើញពីសក្ដានុពលផ្នែកវប្បធម៌ និងសន្ទុះសេដ្ឋកិច្ចរបស់ទីក្រុងញូវយ៉ក ជាពិសេសក្រុមហ៊ុននៅក្នុងវិស័យហិរញ្ញវត្ថុ និងបច្ចេកវិទ្យា”។
-->
ជាមួយគ្នានេះ យោងតាមរដ្ឋបាលទីក្រុងញូវយ៉កបានព្យាករណ៍ថា ការងារចំនួន៣៨.០០០កន្លែងនឹងត្រូវការការិយាល័យថ្មីក្នុងឆ្នាំ២០២៥ ដែលការងារភាគច្រើនកើតចេញពីវិស័យហិរញ្ញវត្ថុ សេវាកម្មអាជីវកម្ម និងបច្ចេកវិទ្យាព័ត៌មាន។
លោក Marc Holliday នាយកប្រតិបត្តិរបស់ក្រុមហ៊ុន SL Green Realty បានកត់សម្គាល់ថា បណ្តាក្រុមហ៊ុន ឬស្ថាប័នទាំងនោះនឹងបង្កើតការងារថ្មីៗបន្ថែមទៀតនៅឆ្នាំនេះ ដែលនឹងជំរុញឱ្យមានតម្រូវការជួលការិយាល័យរាប់លានម៉ែត្រការ៉េ។នេះបើយោងតាមការដកស្រង់ចុះផ្សាយដោយទីភ្នាក់ងារសារព័ត៌មានអាមេរិក CNBC។
លោក Holliday បានបន្ថែមថា “ចំនួនបុគ្គលិក ដែលមកបំពេញការងារនៅការិយាល័យកំពុងកើនឡើងជារៀងរាល់ខែ ដោយសារក្រុមហ៊ុននានាកំពុងលើកទឹកចិត្តឱ្យបុគ្គលិករបស់ខ្លួនត្រឡប់ទៅធ្វើការក្នុងការិយាល័យវិញក្នុងរយៈពេល៤ថ្ងៃទៅ៥ថ្ងៃក្នុងមួយសប្តាហ៍។ យើងរំពឹងថា តម្រូវការការិយាល័យនឹងកើនឡើងពេញមួយឆ្នាំ២០២៥”៕ប្រភពៈ CNBC៕
