ដោយ: គង់ លាងហួរ
អន្តរជាតិ: ទីផ្សារការិយាល័យនៅក្នុងទីក្រុងតូក្យូរបស់ប្រទេសជប៉ុនកំពុងរីកចម្រើន ខណៈតម្លៃជួលការិយាល័យនៅក្នុងទីក្រុងមួយនេះបាននិងកំពុងបន្តកើនឡើងខ្ពស់យ៉ាងឆាប់រហ័ស ដែលជាសញ្ញាសុទិដ្ឋិនិយមរបស់អ្នកវិនិយោគ។
តួយ៉ាង កាសែតហុងកុង South China Morning Post បានដកស្រង់របាយការណ៍សិក្សាថ្មីមួយមកចុះផ្សាយថា តម្លៃជួលការិយាល័យជាមធ្យមនៅក្នុងទីក្រុងតូក្យូបានកើនឡើងចំនួន៥,២ភាគរយកាលពីត្រីមាសទី៣ ឆ្នាំមុន។
តួលេខនេះជាកំណើនដ៏ខ្ពស់បំផុតជាលើកដំបូងគិតចាប់តាំងពីត្រីមាសទី៣ដូចគ្នា កាលឆ្នាំ២០១៦។ នេះបើយោងតាមរបាយការណ៍ថ្មីរបស់ក្រុមហ៊ុនប្រឹក្សាអចលនទ្រព្យ CBRE ។
-->
ដោយឡែក ក្រុមហ៊ុនប្រឹក្សាអចលនទ្រព្យ Savill បានព្យាករណ៍ថា តម្លៃជួលការិយាល័យកម្រិត A ក្នុងទីក្រុងតូក្យូនឹងកើនឡើងដល់ចំនួន៦៧,៤៥ដុល្លារក្នុងមួយម៉ែត្រការ៉េនៅឆ្នាំ២០២៥នេះ បើធៀបនឹងតម្លៃជួលជាមធ្យមចំនួន៦៦,៤៨ដុល្លារក្នុងមួយម៉ែត្រការ៉េកាលពីឆ្នាំ២០២៤។
ចំណែក អត្រាការិយាល័យទំនេរកម្រិត A នៅក្នុងទីក្រុងតូក្យូត្រូវបានគេព្យាករណ៍ថា នឹងកើនឡើងពីអត្រាចំនួន២ភាគរយក្នុងឆ្នាំ២០២៤ ដល់អត្រា៣ភាគរយនៅក្នុងឆ្នាំ២០២៥នេះ មុនពេលធ្លាក់ចុះមកនៅត្រឹមអត្រា២,៥ភាគរយនៅឆ្នាំ២០២៦ខាងមុខ។
របាយការណ៍របស់ស្ថាប័ន CBRE បានគូសបញ្ជាក់ថា តម្លៃជួលការិយាល័យនៅក្នុងទីក្រុងតូក្យូមានការកើនឡើង ដោយសារតែបណ្តាក្រុមហ៊ុនជប៉ុននានាបានតម្រូវឱ្យបុគ្គលិករបស់ខ្លួនបំពេញការងារនៅការិយាល័យឡើងវិញ។
ជាមួយគ្នានេះ បណ្តាអង្គការនានាបានធ្វើឱ្យប្រសើរឡើងនូវបរិយាកាសការិយាល័យរបស់ពួកគេដើម្បីទាក់ទាញ និងរក្សាបុគ្គលិកដែលមានសមត្ថភាពនិងទេពកោសល្យ៕ប្រភព:SCMP៕
