ដោយៈ គង់ សូរិយា
ភ្នំពេញៈ ក្រុមហ៊ុនលំដាប់យក្សជប៉ុន Minebea (Cambodia) Co., Ltd គ្រោងពង្រីកផលិតកម្ម និងទុកវិនិយោគបន្ថែមនៅកម្ពុជា។
ព័ត៌មាននេះ ត្រូវបានលើកឡើងក្នុងជំនួបរវាងលោកជា វុទ្ធី អគ្គលេខាធិការគណៈកម្មាធិការវិនិយោគកម្ពុជា ដែលបានទទួលជួបលោក Kensuke WATANABE នាយកផ្នែករដ្ឋបាល និងធនធានមនុស្សនៃក្រុមហ៊ុន Minebea (Cambodia) Co., Ltd. ក្នុងគោលបំណងធ្វើការពិភាក្សា និងផ្លាស់ប្តូរយោបល់លើទិដ្ឋភាពច្បាប់ និងបទប្បញ្ញត្តិពាក់ព័ន្ធ ក្នុងការស្នើសុំពង្រីកបន្ថែមមុខសញ្ញាផលិតបរិក្ខារអេឡិចត្រូនិក ដែលក្រុមហ៊ុនគ្រោងនឹងបណ្តាក់ ទុនវិនិយោគបន្ថែមប្រមាណ១៥លានដុល្លារអាមេរិក។
ក្រុមហ៊ុន Minebea (Cambodia) Co., Ltd. គឺជាក្រុមហ៊ុនដ៏ធំរបស់ជប៉ុន ដែលបានបណ្តាក់ទុនវិនិយោគនៅកម្ពុជា តាំងពីឆ្នាំ២០១១ ក្នុងវិស័យផលិតគ្រឿង បង្គុំអេឡិចត្រូនិកជាច្រើនប្រភេទ ហើយដែលបច្ចុប្បន្នបានបង្កើនដើមទុនវិនិយោគ មានទំហំទឹកប្រាក់រហូតដល់ជាង៧០០លានដុល្លារអាមេរិក៕
