ដោយ: គង់ លាងហួរ
អន្តរជាតិ: យោងតាមវិទ្យាស្ថានស្រាវជ្រាវអចលនទ្រព្យឈានមុខគេមួយបានឱ្យដឹងថា ការលក់លំនៅដ្ឋានថ្មី និងតម្លៃលំនៅដ្ឋានដែលមានស្រាប់នៅក្នុងប្រទេសចិនបានបន្តធ្លាក់ចុះព្រមគ្នានៅក្នុងខែមករា ឆ្នាំ២០២៥។
ជាក់ស្ដែង វិទ្យាស្ថាន China Index Academy បានបញ្ជាក់ឱ្យដឹងនៅក្នុងរបាយការណ៍ប្រចាំខែរបស់ខ្លួនថា “តម្លៃលំនៅដ្ឋានជាមធ្យមក្នុងមួយម៉ែត្រការ៉េបានធ្លាក់ចុះជាង៧ភាគរយនៅខែមករាបើធៀបនឹងឆ្នាំមុន ដោយផ្អែកលើការស្ទង់មតិនៅក្នុងទីក្រុងធំៗទាំង១០០របស់ប្រទេសចិន”។
វិទ្យាស្ថានស្រាវជ្រាវខាងលើបានបន្តថា ទំហំនៃការលក់លំនៅដ្ឋាន ដោយបណ្តាក្រុមហ៊ុនអភិវឌ្ឍន៍អចលនទ្រព្យលំដាប់កំពូលទាំង១០០របស់ប្រទេសចិននៅក្នុងខែមករា បានធ្លាក់ចុះប្រមាណ១៧ភាគរយបើធៀបនឹងឆ្នាំមុន។
-->
ទីផ្សារលំនៅដ្ឋានចិន ដែលធ្លាប់បានគ្របដណ្តប់ចំណែកចំនួនមួយភាគបួននៃផលទុនជាតិសរុប(GDP)របស់ប្រទេសចិន បានធ្លាក់ចូលទៅក្នុងវិបត្តិបំណុល ដែលនាំឱ្យសន្ទុះសេដ្ឋកិច្ចចិនធ្លាក់ចុះ និងជាដើមហេតុនៃការព្រួយបារម្ភសម្រាប់គ្រួសារប្រជាជនចិន ក្រុមអ្នកវិនិយោគ និងរដ្ឋាភិបាលចិន។
រដ្ឋាភិបាលថ្នាក់ជាតិនៃប្រទេសចិន និងអាជ្ញាធរមូលដ្ឋានបានបង្កើនកិច្ចខិតខំប្រឹងប្រែងដើម្បីជំរុញទំនុកចិត្ត និងលើកកម្ពស់ការទិញផ្ទះថ្មីតាមរយៈការដាក់ចេញវិធានការលើកទឹកចិត្តជាច្រើន រួមទាំងការឧបត្ថម្ភធនសម្រាប់អ្នកទិញផ្ទះ និងការផ្តល់ហិរញ្ញប្បទានដល់គម្រោងអចលនទ្រព្យជាប់គាំង។
យោងតាមការព្យាករណ៍របស់ក្រុមអ្នកវិភាគ ដែលត្រូវបានធ្វើការស្ទង់មតិដោយទីភ្នាក់ងារសារព័ត៌មាន Reuters បានឱ្យដឹងថា ការលក់ផ្ទះ និងតម្លៃផ្ទះនៅក្នុងប្រទេសចិននឹងធ្លាក់ចុះបន្ថែមទៀតនៅឆ្នាំនេះ។ប៉ុន្តែ ការធ្លាក់ចុះនេះនឹងមានល្បឿនយឺតជាងឆ្នាំ២០២៤៕ប្រភព: Reuters៕
