ដោយ: គង់ លាងហួរ
អន្តរជាតិ: ស្របពេលដែលសង្រ្គាមក្នុងប្រទេសអ៊ុយក្រែនបន្តអូសបន្លាយអស់រយៈពេល៣ឆ្នាំ ក្រុមអ្នកមានជាជនជាតិរុស្ស៊ីកំពុងនាំយកសាច់ប្រាក់របស់ពួកគេចូលមកកាន់ប្រទេសកំណើតវិញ។ការណ៍នេះបានជំរុញឱ្យតម្រូវការលំនៅដ្ឋាននៅទីក្រុងម៊ូស្គូស្ទុះងើបឡើងវិញ។
ដោយសារត្រូវប្រឈមមុខនឹងផលលំបាកខ្លាំងក្នុងការចាយវាយនៅបរទេស ព្រោះទណ្ឌកម្មអន្តរជាតិ ក្រុមអ្នកមានជនជាតិរុស្ស៊ីជាច្រើនកំពុងបញ្ជូនសាច់ប្រាក់របស់ខ្លួនទៅកាន់ប្រទេសកំណើតវិញ ដោយងាកទៅទិញលំនៅដ្ឋានដែលមានតម្លៃខ្ពស់កប់ពពកនៅក្នុងទីក្រុងម៊ូស្គូ។
ចំណែកឯ ពលរដ្ឋរុស្ស៊ីផ្សេងទៀតកំពុងងាកទៅបោះទុនវិនិយោគទៅលើអចលនទ្រព្យ ខណៈអត្រាអតិផរណានៅប្រទេសរុស្សីបានកើនឡើង ចាប់តាំងពីរុស្ស៊ីបានបើកការឈ្លានពានលើប្រទេសអ៊ុយក្រែន។ការណ៍នេះបានបង្ខំឱ្យធនាគារកណ្តាលរុស្សុីដំឡើងអត្រាការប្រាក់ដល់កម្រិតខ្ពស់បំផុត។
-->
លោក Ekaterina Rumyantseva ស្ថាបនិកក្រុមហ៊ុនភ្នាក់ងារអចលនទ្រព្យ Kalinka Ecosystem ដែលមានមូលដ្ឋាននៅទីក្រុងមូ៊ស្គូបានអះអាងថា ទណ្ឌកម្មកំពុងត្រូវបានរឹតបន្តឹងលើពលរដ្ឋដែលមានសញ្ជាតិរុស្ស៊ីនៅជុំវិញពិភពលោក”។
លោកបន្តថា “នៅពេលនេះ ទើបមនុស្សគ្រប់គ្នាបានដឹងច្បាស់ថា ប្រទេសកំណើតរបស់អ្នកជាទីតាំងដ៏មានសុវត្ថិភាពបំផុតសម្រាប់រក្សាទុកទ្រព្យសម្បត្តិរបស់អ្នក”។
យោងតាមក្រុមហ៊ុនប្រឹក្សាអចលនទ្រព្យ NF Group ដែលពីមុនមានឈ្មោះថា “Knight Frank Russia” បានឱ្យដឹងថា លំហូរសាច់ប្រាក់ទាំងនេះកំពុងជួយធ្វើឱ្យទីផ្សារអចលនទ្រព្យនៅទីក្រុងមូ៊ស្គូមានស្ថានភាពល្អប្រសើរជាងទីផ្សារអចលនទ្រព្យនៅក្នុងទីក្រុងធំៗផ្សេងទៀត ដូចជាទីក្រុងឡុងដ៍ និងទីក្រុងហុងកុងជាដើម។
ការលក់អាផាតមុិននៅទីក្រុងម៊ូស្គូ ដែលមានតម្លៃចាប់ពី១,៩៥លានរូប្លិ៍ (ប្រហែល១៩.៣៦៥ដុល្លារអាមេរិក) ក្នុងមួយម៉ែត្រការ៉េ បានហក់ឡើងជិត៤០ភាគរយកាលពីឆ្នាំមុន ខណៈតម្លៃអាផាតមុិននៅក្នុងរដ្ឋធានីមួយនេះបានកើនឡើង២១ភាគរយដល់ទំហំទឹកប្រាក់ស្មើនឹងតម្លៃអាផាតមុិននៅទីក្រុងប៉ារីសរបស់បារាំង និងទីក្រុងឡុងដ៍របស់អង់គ្លេស។
គម្រោងផ្ទះល្វែង និងផ្ទះវីឡាជាច្រើនកំពុងរីកដុះដាលនៅទូទាំងទីក្រុងមូ៊ស្គូ ដែលសរបង្ហាញឱ្យឃើញពីគម្លាតទ្រព្យសម្បត្តិ ឬវិសមភាពសង្គមរបស់ប្រទេសរុស្ស៊ី ខណៈសង្រ្គាមកំពុងបន្តអូសបន្លាយ ដែលធ្វើឱ្យតម្លៃទំនិញនៅក្នុងប្រទេសរុស្សុីហក់ឡើងខ្ពស់៕ប្រភព: Bloomberg៕
