ដោយ: គង់ លាងហួរ
អន្តរជាតិ: យោងតាមការណ៍បង្ហាញថា ចំណែកប្រមាណ៥០ភាគរយនៃចំនួនជនបរទេសសរុប ដែលរស់នៅក្នុងទីក្រុងគូឡាឡាំពួររបស់ប្រទេសម៉ាឡេសុីបានជ្រើសរើសជួលលំនៅដ្ឋានស្នាក់នៅចំកណ្តាលទីក្រុងមួយនេះ។
តួយ៉ាង ការជួលអាផាតមុិន ដែលមានបន្ទប់គេងទោលនៅចំកណ្តាលទីក្រុងគូឡាឡាំពួរមានតម្លៃប្រមាណ៤៦១,០៨ដុល្លារអាមេរិកនៅក្នុងមួយខែ។នេះបើយោងតាមការដកស្រង់ពីគេហទំព័រ Bamboo Routes។
ទីក្រុងមួយនេះសម្បូរទៅដោយជម្រើសម្ហូបអាហារចម្រុះ មជ្ឈមណ្ឌលផ្សារទំនើបធំៗ និងការកម្សាន្តនាពេលរាត្រីយ៉ាងរស់រវើក ដែលទាក់ទាញជនបរទេសជាច្រើនមកទស្សនា និងស្វែងរកផ្ទះស្នាក់នៅ។
-->
ជាមួយគ្នានោះ កម្មវិធីទិដ្ឋាការ “Malaysia My Second Home” កំពុងជួយទាក់ទាញជនបរទេសមកបោះទុនវិនិយោគ និងទិញផ្ទះនៅប្រទេសម៉ាឡេសុី ដើម្បីទទួលបានសិទ្ធិស្នាក់នៅរយៈពេលវែង។
កម្មវិធីទិដ្ឋាការនេះត្រូវបានដាក់ចេញដើម្បីផ្តោតជាពិសេសទៅលើការទាក់ទាញជនបរទេសដែលមានទ្រព្យសម្បត្តិស្តុកស្តម្ភ និងបង្កើនភាពទាក់ទាញនៃទីផ្សារអចលនទ្រព្យរបស់ម៉ាឡេសុី។
យោងតាមក្រុមហ៊ុនប្រឹក្សាអចលនទ្រព្យ JLL បានឱ្យដឹងថា ចំណែកជាង២៥ភាគរយនៃចំនួនគម្រោងអភិវឌ្ឍន៍លំនៅដ្ឋានថ្មីទាំងអស់នៅក្នុងទីក្រុងគូឡាឡាំពួរកំពុងផ្តោតលើផ្នែកលំនៅដ្ឋានប្រណីត។ នេះជាយុទ្ធសាស្ត្ររបស់បណ្តាអ្នកអភិវឌ្ឍន៍ក្នុងការចាប់យកឱកាសស្វែងរកផលចំណេញខ្ពស់ពីតម្រូវការរបស់ជនបរទេសលំដាប់អ្នកមាន។
យោងតាមគេហទំព័រ World Construction Network បានរាយការណ៍ឱ្យដឹងថា បច្ចុប្បន្ន ទីក្រុងគូឡាឡាំពួរមានគម្រោងលំនៅដ្ឋានជាង២៥០គម្រោង ដែលកំពុងស្ថិតនៅក្រោមការសាងសង់នៅក្នុងឆ្នាំ២០២៥នេះ។
ជាមួយគ្នានេះ គម្រោងអចលនទ្រព្យលក់រាយក៏មានការកើនឡើងផងដែរ។ យោងតាមគេហទំព័រ Real Estate Asia បានឱ្យដឹងថា ទីក្រុងគូឡាឡាំពួរ នឹងទទួលបានលំហូរនៃការផ្គត់ផ្គង់ទីតាំងលក់រាយថ្មីជាង៤,២លានហ្វីតការ៉េនៅឆ្នាំ២០២៥។
ជាធម្មតា ការអភិវឌ្ឍន៍ទីផ្សារអចលនទ្រព្យផ្នែកលក់រាយ និងលំនៅដ្ឋានតែងតែដើរទន្ទឹមគ្នា និងផ្តល់ការរីកចម្រើនដល់គ្នាទៅវិញទៅមក ព្រោះការបើកដំណើរការទីតាំងលក់រាយថ្មីនឹងជួយទាក់ទាញមនុស្សកាន់តែច្រើនមករស់នៅតំបន់ក្បែរនោះ ដែលជាកត្តាជំរុញឱ្យតម្រូវការលំនៅដ្ឋានកើនឡើង៕ប្រភព: Bamboo Routes៕
