ដោយ: គង់ លាងហួរ
អន្តរជាតិ: យោងតាមសារពត៌មាន The Economic Times បានឱ្យដឹងថា អាកាសយានដ្ឋានអន្តរជាតិ Jewar នៅប្រទេសឥណ្ឌា ដែលនឹងក្លាយជាអាកាសយានដ្ឋានធំជាងគេបំផុតនៅក្នុងតំបន់អាស៊ី គ្រោងនឹងចាប់ផ្តើមដាក់ឱ្យដំណើរការចាប់ពីខែមេសា ឆ្នាំ២០២៥នេះ។
លោក Kinjarapu Rammohan Naidu រដ្ឋមន្ត្រីក្រសួងអាកាសចរណ៍ស៊ីវិលឥណ្ឌាបានគូសបញ្ជាក់ថា អាកាសយានដ្ឋាននេះកំពុងដំណើរការទៅតាមផែនការគ្រោងទុក ដោយបានធ្វើតេស្តជើងហោះហើរដោយជោគជ័យក្នុងខែធ្នូ ឆ្នាំ២០២៤។
លោកបន្តថា អាកាសយានដ្ឋាន Jewar នឹងក្លាយជាអាកាសយានដ្ឋានដ៏ធំបំផុតរបស់ប្រទេសឥណ្ឌា និងតំបន់អាស៊ី។ នៅខែមេសាខាងមុខ យើងនឹងចាប់ផ្តើមប្រតិបត្តិការហោះហើរជាទៀងទាត់ពីអាកាសយានដ្ឋានអន្តរជាតិមួយនេះ។
-->
លោករដ្ឋមន្ត្រីបានគូសបញ្ជាក់បន្ថែមថា បណ្តាក្រុមហ៊ុនអាកាសចរណ៍ឈានមុខគេ ដូចជាក្រុមហ៊ុន Air India និងក្រុមហ៊ុន IndiGo គ្រោងចាប់ផ្តើមប្រតិបត្តិការជើងហោះហើរពីអាកាសយានដ្ឋាន Jewar ដោយបង្កើនការតភ្ជាប់ជើងហោះហើរអន្តរជាតិ និងនៅក្នុងស្រុក។
អាកាសយានដ្ឋានអន្តរជាតិ Jewar ស្ថិតនៅក្នុងរដ្ឋ Uttar Pradesh នៃប្រទេសឥណ្ឌា និងមានទីតាំងនៅជិតផ្លូវល្បឿនលឿន “Noida Expressway”។
អាកាសយានដ្ឋាននេះត្រូវបានគេរំពឹងថា នឹងជួយជំរុញការតភ្ជាប់ក្នុងតំបន់ ខណៈរដ្ឋាភិបាលឥណ្ឌាកំពុងកែលម្អបណ្តាញផ្លូវថ្នល់បន្ថែមទៀត ដើម្បីធានាបាននូវមធ្យោបាយធ្វើដំណើរចូលទៅកាន់អាកាសយានដ្ឋានដោយរលូន និងសម្រួលដល់ការធ្វើដំណើររបស់អ្នកដំណើរ និងការដឹកជញ្ជូនទំនិញ។
លើសពីនេះ លោក Naidu បានប្រកាសឱ្យដឹងថា “រដ្ឋាភិបាលឥណ្ឌាគ្រោងសាងសង់អាកាសយានដ្ឋានចំនួន១០០ផ្សេងទៀតនៅទូទាំងប្រទេស ដោយបានគូសបញ្ជាក់ពីការប្តេជ្ញាចិត្តរបស់ឥណ្ឌាក្នុងការពង្រីកហេដ្ឋារចនាសម្ព័ន្ធអាកាសចរណ៍របស់ខ្លួន”៕ប្រភព:The Economic Times៕
