ដោយ: គង់ លាងហួរ
អន្តរជាតិ: ទីផ្សារអចលនទ្រព្យនៅប្រទេសថៃកំពុងទទួលរងសម្ពាធពីការកើនឡើងនៃតម្លៃដី និងសំណង់ ដែលនាំឱ្យតម្លៃផ្ទះ និងតម្លៃខុនដូថ្មីហក់ឡើងខ្ពស់។ នេះបើយោងតាមរបាយការណ៍របស់មជ្ឈមណ្ឌលព័ត៌មានអចលនទ្រព្យ (REIC)។
ក្នុងរយៈពេលប៉ុន្មានឆ្នាំចុងក្រោយនេះ តម្លៃលំនៅដ្ឋាននៅប្រទេសថៃបានហក់ឡើងថ្លៃជាបន្តបន្ទាប់ ដោយសារកត្តាជាច្រើន ដូចជាការកើនឡើងនៃតម្លៃសម្ភារៈសំណង់ និងតម្លៃដីនៅក្នុងទីតាំងសំខាន់ៗ ជាពិសេសដីនៅតាមបណ្តោយខ្សែរថភ្លើងនៅទីក្រុងបាងកក។
តម្លៃខុនដូនៅខេត្តសាមុតប្រាកាន (Samut Prakan) និងខេត្ត Nonthaburi បានកើនឡើង៤,២ភាគរយនៅក្នុងត្រីមាសទី៤ នៃឆ្នាំ២០២៤ លើសពីអត្រាកំណើននៃតម្លៃខុនដូចំនួន៣,៤ភាគរយនៅក្នុងទីក្រុងបាងកក។
-->
តម្លៃខុនដូនៅតំបន់ចំនួន៣នៃទីក្រុងបាងកក រួមមានតំបន់ Huai Khwang តំបន់ Chatuchak និងតំបន់ Din Daeng ដែលមានតម្លៃចន្លោះពី៣លានបាតទៅ៥លានបាតក្នុងមួយយូនីត បានកើនឡើងក្នុងអត្រាខ្ពស់ជាងគេបំផុត។
តម្លៃផ្ទះទោល(Detached house) នៅក្នុងទីក្រុងបាងកកបានកើនឡើងយ៉ាងខ្លាំងបំផុតនៅតំបន់ Minburi តំបន់ Nong Chok និងតំបន់ Lat Krabang ដោយមានតម្លៃជាង១០លានបាតក្នុងមួយយូនីត។
ជាមួយគ្នានេះ តម្លៃផ្ទះ Townhouse នៅក្នុងតំបន់ Pra Khanong តំបន់ Bangna តំបន់ Suan Luang និងតំបន់ Prawet ក្នុងទីក្រុងបាងកកបានកើនឡើងដល់ទំហំទឹកប្រាក់ចន្លោះពី៥លានបាតទៅ៧,៥លានបាតក្នុងមួយយូនីត។
តម្លៃសម្ភារៈសំណង់នានាដូចជា តម្លៃសម្ភារៈអនាម័យបានកើនឡើង១២ភាគរយ ខណៈតម្លៃក្រឡាក្បឿងបានកើនឡើង៥,៦%។ ចំណែក តម្លៃឈើ និងផលិតផលសំណង់ធ្វើឡើងអំពីឈើ បានកើនឡើង២,២% ដោយសារការកើនឡើងនៃតម្លៃថាមពលសកល។ តម្លៃកម្លាំងពលកម្មក៏បានកើនឡើង៤%ផងដែរ។
ការកើនឡើងនៃតម្លៃសម្ភារៈសំណង់ទាំងនេះកំពុងជំរុញឱ្យតម្លៃលំនៅដ្ឋានថ្មីកើនឡើង ស្របពេលដែលអំណាចនៃការទិញរបស់អ្នកប្រើប្រាស់កំពុងធ្លាក់ចុះដោយសារតែការធ្លាក់ចុះនៃកំណើនសេដ្ឋកិច្ចថៃ៕ប្រភព: The Nation៕
