ដោយ: គង់ លាងហួរ
អន្តរជាតិ: ស្ថាប័នជំនាញបានវាយតម្លៃថា តម្លៃដីធ្លីនៅក្នុងរដ្ឋធានីម៉ានីលរបស់ប្រទេសហ្វីលីពីនអាចនឹងធ្លាក់ចុះនៅឆ្នាំ២០២៥នេះ ដោយសារការកើនឡើងនៃចំនួនខុនដូលក់មិនដាច់ និងអត្រាការិយាល័យទំនេរ។
ការដាំក្បាលចុះនៃទីផ្សារខុនដូ និងការិយាល័យនឹងជំរុញឱ្យតម្លៃដីនៅទីក្រុងម៉ានីលបន្តធ្លាក់ចុះក្នុងរយៈពេល២ឆ្នាំជាប់ៗគ្នា។នេះបើយោងតាមក្រុមហ៊ុនប្រឹក្សាអចលនទ្រព្យ Colliers Philippines។
លោក Richard Raymundo នាយកគ្រប់គ្រងក្រុមហ៊ុន Colliers Philippines បានថ្លែងប្រាប់គេហទំព័រ Bilyonaryo.com ថា តម្លៃដីនៅរដ្ឋធានីម៉ានីលអាចនឹងធ្លាក់ចុះចាប់ពី២ភាគរយទៅ៥ភាគរយនៅឆ្នាំនេះ ដោយសារតម្រូវការធ្លាក់ចុះ និងថ្លៃដើមសំណង់កើនឡើង។
-->
លោក Raymundo បានបញ្ជាក់បន្ថែមថា “តម្លៃដីធ្លីច្បាស់ជាធ្លាក់ចុះ ខណៈតម្លៃសម្ភារៈសំណង់សំខាន់ៗបានហក់ឡើងយ៉ាងគំហុក ដោយសារតែអត្រាអតិផរណានៅតែមានកម្រិតខ្ពស់”។
តម្លៃដីជាមធ្យមនៅក្នុងតំបន់ពាណិជ្ជកម្មសំខាន់ៗចំនួន៤ នៃរដ្ឋធានីម៉ានលី រួមមានដូចជាតំបន់ Makati តំបន់ BGC តំបន់ Ortigas និងតំបន់ Manila Bay បានធ្លាក់ចុះព្រមគ្នានៅត្រីមាសទី៤ ឆ្នាំ២០២៤។
តួយ៉ាង តម្លៃដីជាមធ្យមនៅក្នុងតំបន់ពាណិជ្ជកម្ម Makati បានធ្លាក់ចុះពីតម្លៃ៩៦៧.៣០០ប៉េសូ(ប្រហែល១៦.៦២៨ដុល្លារ)ក្នុងមួយម៉ែត្រការ៉េនៅត្រីមាសទី៣ មកនៅត្រឹម៩៤០.០០០ប៉េសូ(ប្រហែល១៦.១៥៩ដុល្លារ)ក្នុងមួយម៉ែត្រការ៉េនៅក្នុងត្រីមាសទី៤ ឆ្នាំមុន។
ជាមួយគ្នានេះ តម្លៃដីជាមធ្យមនៅក្នុងតំបន់ពាណិជ្ជកម្ម BGC បានធ្លាក់ចុះពីទំហំទឹកប្រាក់៨៨៤.៥០០ប៉េសូក្នុងមួយម៉ែត្រការ៉េនៅត្រីមាសទី៣ មកនៅត្រឹម៨៤៥.៧០០ប៉េសូក្នុងមួយម៉ែត្រការ៉េនៅក្នុងត្រីមាសទី៤ ឆ្នាំមុន។
ចំណែក តម្លៃដីជាមធ្យមនៅក្នុងតំបន់ពាណិជ្ជកម្ម Ortigas បានធ្លាក់ចុះពីតម្លៃ៣៨៩.០០០ប៉េសូក្នុងមួយម៉ែត្រការ៉េនៅត្រីមាសទី៣ មកនៅត្រឹម៣៦៧.៩០០ប៉េសូក្នុងមួយម៉ែត្រការ៉េនៅក្នុងត្រីមាសទី៤ ឆ្នាំមុន។
រីឯ តម្លៃដីជាមធ្យមនៅក្នុងតំបន់ពាណិជ្ជកម្ម Manila Bay បានធ្លាក់ចុះពីតម្លៃ៣៧២.៥០០ប៉េសូក្នុងមួយម៉ែត្រការ៉េនៅត្រីមាសទី៣ មកនៅត្រឹម៣៣៧.៨០០ប៉េសូក្នុងមួយម៉ែត្រការ៉េនៅក្នុងត្រីមាសទី៤ ឆ្នាំមុន៕ប្រភព:Bilyonaryo.com៕
