ដោយ: គង់ លាងហួរ
អន្តរជាតិ: ការបង្កើតតំបន់សេដ្ឋកិច្ចពិសេស(SEZ) រវាងប្រទេសម៉ាឡេស៊ី និងសិង្ហបុរីនៅក្នុងរដ្ឋ Johor បានបង្កជាក្តីព្រួយបារម្ភសម្រាប់ឥណ្ឌូនេសុី ដែលជាប្រទេសមានសេដ្ឋកិច្ចធំជាងគេបំផុតនៅទូទាំងតំបន់អាស៊ាន។
ក្រុមអ្នកជំនាញបានព្រមានថា ការបង្កើតតំបន់ SEZ នេះអាចធ្វើឱ្យប្រទេសឥណ្ឌូនេស៊ីជួបប្រទះការលំបាកក្នុងការទាក់ទាញការវិនិយោគធំៗ ខណៈបណ្តាប្រទេសជិតខាងទាំង២ នឹងទាញបានសក្តានុពលយ៉ាងច្រើនពីទីតាំងជាយុទ្ធសាស្ត្រនៃតំបន់សេដ្ឋកិច្ចពិសេសនេះ តាមរយៈការដាក់ចេញគោលនយោបាយលើកទឹកចិត្តដល់វិនិយោគិន។
តំបន់សេដ្ឋកិច្ចពិសេស Johor-Singapore (JS-SEZ) មានទំហំ៣.៥០០គីឡូម៉ែត្រការ៉េ។ តំបន់នេះនឹងប្រមូលផ្តុំនូវការវិនិយោគក្នុងវិស័យជាច្រើន រួមទាំងមជ្ឈមណ្ឌលទិន្នន័យ ផលិតកម្ម និងទេសចរណ៍។
-->
លោក Bhima Yudhistira នាយកប្រតិបត្តិនៃមជ្ឈមណ្ឌលសិក្សាផ្នែកសេដ្ឋកិច្ច និងច្បាប់ (Celios) ដែលមានមូលដ្ឋាននៅទីក្រុងហ្សាការតា ប្រទេសឥណ្ឌូនេស៊ី បានលើកឡើងថា “តំបន់សេដ្ឋកិច្ចពិសេសនេះនឹងបង្កជាការគំរាមកំហែងយ៉ាងធ្ងន់ធ្ងរដល់លទ្ធភាពរបស់ប្រទេសឥណ្ឌូនេស៊ីក្នុងការទាក់ទាញការវិនិយោគថ្មី”។
ជាពិសេស លោកបានគូសបញ្ជាក់ថា បណ្តាក្រុមហ៊ុននានា ដែលគ្រោងផ្លាស់ប្តូរមូលដ្ឋានផលិតកម្ម ឬទីតាំងរោងចក្រចេញពីប្រទេសចិន នឹងធ្វើពិពិធកម្មទៅកាន់តំបន់សេដ្ឋកិច្ចពិសេសរវាងម៉ាឡេសុី និងសិង្ហបុរី នៅពេលដែលសង្រ្គាមពាណិជ្ជកម្មរវាងសហរដ្ឋអាមេរិក និងចិនកើតឡើង”។
លោកបន្ថែមថា “បណ្តាក្រុមហ៊ុនផលិតកម្មជាច្រើនកំពុងស្វែងរកតំបន់ឧស្សាហកម្មថ្មី ជាពិសេសនៅក្នុងបណ្តាប្រទេសដែលមានកិច្ចព្រមព្រៀងពាណិជ្ជកម្មសេរីជាមួយនឹងសហរដ្ឋអាមេរិក”។
លោក Achmad Nur Hidayat សេដ្ឋវិទូនៅសាកលវិទ្យាល័យអភិវឌ្ឍន៍ជាតិ (UPN) ក្នុងទីក្រុងហ្សាការតា បានអះអាងថា បណ្តាក្រុមហ៊ុនឧស្សាហកម្មអេឡិចត្រូនិក និងបដិសណ្ឋារកិច្ចមួយចំនួនបានធ្វើពិពិធកម្មការវិនិយោគរបស់ខ្លួនចេញពីតំបន់ Batam របស់ឥណ្ឌូនេស៊ីទៅកាន់រដ្ឋ Johor មុនពេលកិច្ចព្រមព្រៀងបង្កើតតំបន់សេដ្ឋកិច្ចពិសេស (JS-SEZ) ត្រូវបានចុះហត្ថលេខាជាផ្លូវការកាលពីថ្ងៃទី៧ ខែមករាទៅទៀត។
សេដ្ឋវិទូជើងចាស់រូបនេះបានគូសបញ្ជាក់បន្ថែមថា ការណ៍នេះមានន័យថា ប្រទេសឥណ្ឌូនេស៊ីគួរមានការព្រួយបារម្ភខ្លាំងអំពីការបង្កើតតំបន់សេដ្ឋកិច្ចពិសេស(SEZ) រវាងប្រទេសម៉ាឡេស៊ី និងសិង្ហបុរីនៅក្នុងរដ្ឋ Johor៕ប្រភព: SCMP៕
 រវាងប្រទេសម៉ាឡេស៊ី និងសិង្ហបុរីនៅក្នុងរដ្ឋ Johor បានបង្កជាក្តីព្រួយបារម្ភសម្រាប់ឥណ្ឌូនេសុី ដែលជាប្រទេសមានសេដ្ឋកិច្ចធំជាងគេបំផុតនៅទូទាំងតំបន់អាស៊ាន។){kind=link}