តម្លៃជួលការិយាល័យនៅទីក្រុងហុងកុងក្នុងឆ្នាំ២០២៥នេះប្រឈមការដាំក្បាលចុះ១០ភាគរយ

ដោយ: គង់ លាងហួរ
អន្តរជាតិ: តម្លៃជួលការិយាល័យនៅទីក្រុងហុងកុងនៅក្នុងឆ្នាំ២០២៥នេះត្រូវបានព្យាករណ៍ថា នឹងធ្លាក់ចុះដល់កម្រិតទាបបំផុតមិនធ្លាប់មានតាំងពីឆ្នាំ២០១២។ការណ៍នឹងអាចនាំឱ្យតម្លៃអគារពាណិជ្ជកម្មនានាដាំក្បាលចុះ។

យោងតាមទីភ្នាក់ងារវាយតម្លៃចំណាត់ថ្នាក់ឥណទានសកល S&P Global Ratings បានឱ្យដឹងថា តម្លៃជួលការិយាល័យប្រភេទ Prime នៅទីក្រុងហុងកុងនឹងដាំក្បាលចុះ១០ភាគរយនៅឆ្នាំនេះ បើប្រៀបធៀបនឹងការព្យាករណ៍ពីមុនថា នឹងធ្លាក់ចុះចំនួន៥ភាគរយ។
ទីភ្នាក់ងារ S&P Global Ratings បានអះអាងថា ការបង្កើនការផ្គត់ផ្គង់បន្ទប់ការិយាល័យថ្មីៗពីគម្រោងនានាដែលទើបនឹងបញ្ចប់ការសាងសង់ នឹងដាក់សម្ពាធកាន់តែខ្លាំងទៅលើម្ចាស់អគារការិយាល័យ និងធ្វើឱ្យអ្នកជួលមានប្រៀបក្នុងការចរចាតម្លៃ។

លោក Oscar Chung អ្នកវិភាគឥណទានរបស់ទីភ្នាក់ងារ S&P Global Ratings បានលើកឡើងថា “ម្ចាស់អគារការិយាល័យនៅទីក្រុងហុងកុងកំពុងជួបប្រទះការលំបាក ដោយសារភាពមិនប្រាកដប្រជាផ្នែកសេដ្ឋកិច្ច និងការប្រកួតប្រជែងពីអគារ ដែលទើបសាងសង់រួចរាល់ថ្មីៗបន្ថែមទៀត”។