ដោយ: គង់ លាងហួរ
អន្តរជាតិ: រដ្ឋាភិបាលរបស់ប្រធានាធិបតីឥណ្ឌូនេស៊ីលោក Prabowo Subianto គ្រោងនឹងបង្កើតមូលនិធិថ្មីមួយដែលមានឈ្មោះថា“Danantara”ក្នុងទំហំទឹកប្រាក់ជាង៩០០ពាន់លានដុល្លារអាមេរិក។
លោក Prabowo បានអះអាងថា មូលនិធិនេះនឹងបោះទុនវិនិយោគលើគម្រោងនៅក្នុងវិស័យផ្សេងៗ រួមមានដូចជា ថាមពលកកើតឡើងវិញ ផលិតកម្មទំនើប ឧស្សាហកម្មចម្រាញ់ប្រេងឆៅ និងផលិតកម្មចំណីអាហារ។
លោក Prabowo បានបន្តថា “គម្រោងទាំងអស់នេះនឹងចូលរួមចំណែកជំរុញគោលដៅរបស់រដ្ឋាភិបាលឥណ្ឌូនេស៊ីក្នុងការសម្រេចឱ្យបាននូវកំណើនសេដ្ឋកិច្ចចំនួន៨ភាគរយនៅឆ្នាំ២០២៩ខាងមុខ បើធៀបនឹងកំណើនសេដ្ឋកិច្ចចំនួន៥%កាលពីឆ្នាំមុន”។
-->
គម្រោងបង្កើតមូលនិធិ Danantara នេះទទួលបានការអនុម័តពីសភាឥណ្ឌូនេស៊ីកាលពីសប្តាហ៍មុន ដោយយកគំរូតាមក្រុមហ៊ុនវិនិយោគ Temasek របស់រដ្ឋាភិបាលសិង្ហបុរី។
មូលនិធិ Danantara នឹងកាន់កាប់រាល់ភាគហ៊ុនទាំងអស់របស់រដ្ឋាភិបាល ដែលមាននៅក្នុងបណ្តាក្រុមហ៊ុនរដ្ឋនានា រួមមានដូចជា ធនាគារផ្តល់ប្រាក់កម្ចីឈានមុខគេ Bank Mandiri ធនាគារ Bank Rakyat Indonesia និងធនាគារ Bank Negara Indonesia។
លោក Prabowo ក៏បានគូសបញ្ជាក់ផងដែរថា រដ្ឋាភិបាលបានសន្សំថវិកាជាង២០ពាន់លានដុល្លារអាមេរិក ឬស្មើនឹងចំណែកប្រមាណ១០ភាគរយ នៃកកញ្ចប់ថវិកាចំណាយសរុបប្រចាំឆ្នាំរបស់រដ្ឋាភិបាលឥណ្ឌូនេស៊ី។
លោកបានមានប្រសាសន៍ឱ្យដឹងបន្ថែមថា “ថវិកាសន្សំបានជាង២០ពាន់លានដុល្លារនេះនឹងត្រូវប្រើប្រាស់ដើម្បីផ្តល់ហិរញ្ញប្បទានដល់គម្រោងនានា ដូចជាការវិនិយោគលើនីកែល ទង់ដែង និងសារធាតុរ៉ែសំខាន់ៗដទៃទៀត”៕ប្រភព: Reuters៕
