ដោយៈ គង់ សូរិយា
ភ្នំពេញៈ វិស័យអចលនវត្ថុកម្ពុជា មានឱកាសរីកចម្រើនជាលំដាប់ក្នុងទស្សវត្សរ៍ចុងក្រោយនេះ ដែលជំរុញដោយការវិនិយោគបរទេស ការអភិវឌ្ឍន៍ហេដ្ឋារចនាសម្ព័ន្ធ និងកំណើនសេដ្ឋកិច្ច។
ទោះជាយ៉ាងណាក៏ដោយ ប្រាក់ចំណេញនាពេលអនាគតរបស់វាអាស្រ័យលើកត្តាសំខាន់ៗមួយចំនួន ដែលអ្នកវិនិយោគគួរពិចារណា។
សក្តានុពលសម្រាប់ការលូតលាស់
សេដ្ឋកិច្ចរបស់ប្រទេសកម្ពុជា ត្រូវបានគេរំពឹងថានឹងកើនឡើងរហូតដល់៦,៣ភាគរយនៅឆ្នាំ២០២៥នេះ និងបន្តកំណើនប្រកបដោយភាពធន់បន្ថែមទៀត ដែលជាការគាំទ្រដល់តម្រូវការអចលនទ្រព្យ ជាពិសេសនៅក្នុងតំបន់ទីក្រុង។
អ្នកវិនិយោគចិន និងបរទេសផ្សេងទៀត នឹងអាចបន្តដើរតួនាទីយ៉ាងធំ ជាពិសេសនៅក្នុងគម្រោងពាណិជ្ជកម្ម និងលំនៅដ្ឋានលំដាប់ខ្ពស់។
រដ្ឋាភិបាលកម្ពុជា បាននិងកំពុងយកចិត្តទុកដាក់ជាអាទិភាពលើការសាងសង់ហេដ្ឋារចនាសម្ព័ន្ឋ ដូចជាផ្លូវជាតិ ស្ពាន កំពង់ផែទឹកជ្រៅ និង ពិសេសការអភិវឌ្ឍន៍ដូចជាផ្លូវល្បឿនលឿន អាកាសយានដ្ឋាន និងតំបន់សេដ្ឋកិច្ចពិសេស (SEZs) បង្កើនតម្លៃអចលនទ្រព្យ។
ហេដ្ឋារចនាសម្ព័ន្ឋធំៗដូចជាផ្លូវជាតិលេខ១០ ផ្លូវជាតិលេខ៤៨ ត្រូវបានស្តារ ផ្លូវជាតិលេខ៧ ត្រូវបានពង្រីក ព្រលានយន្តហោះអន្តរជាតិតេជោបាន និងកំពុងត្រៀមចាប់ផ្តើមបើកដំណើរការជាដើម។
ទីប្រឹក្សាឧត្តមទីប្រឹក្សាសេដ្ឋកិច្ចជាតិ លោកបណ្ឌិតម៉ី កល្យាណធ្លាប់បានថ្លែងថា រដ្ឋាភិបាលកំពុងយកចិត្តទុកដាក់ លើការអភិវឌ្ឍវិស័យហេដ្ឋារចនាសម្ព័ន្ឋ ដើម្បីជម្រុញកំណើនសេដ្ឋកិច្ចជាតិ បើទោះបីវិស័យនេះត្រូវចំណាយមូលធនធំក្តី។
លោកបញ្ជាក់ថា “ដើម្បីជម្រុញការអភិវឌ្ឍសេដ្ឋកិច្ច រដ្ឋាភិបាលត្រូវតែផ្តោតលើវិស័យនេះជាអាទិភាព ដើម្បីកាត់បន្ថយតម្លៃដឹកជញ្ជូនក្នុងស្រុក និងលើកកំពស់សមត្ថភាពប្រកួតប្រជែងរបស់កម្ពុជា”។
កំណើនទេសចរណ៍ បានិងកំពុងជំរុញឱ្យមានតម្រូវការសណ្ឋាគារ រមណីយដ្ឋាន និងអចលនទ្រព្យជួលផងដែរ។
ជាក់ស្តែងកម្ពុជា បានទទួលភ្ញៀវអន្តរជាតិជាង៦លាននាក់មកទស្សនាកម្ពុជា នៅឆ្នាំ២០២៤ និងរំពឹងកើនដល់ជាង៧លាននាក់នៅឆ្នាំ២០២៥នេះ។
លោកឌិន សុមេធារិទ្ឋប្រធានសហព័ន្ឋទេសចរណ៍កម្ពុជាបានថ្លែងថា វិស័យទេសចរណ៍កម្ពុជាមានកំណើនឡើងវិញ ប៉ុន្តែនិន្នាការបានផ្លាស់ប្តូរ ដោយបច្ចុប្បន្នភ្ញៀវទេសចរណ៍បរទេសត្រឹម១ភាគបី បានធ្វើដំណើរតាមផ្លូវអាកាស។ ផ្ទុយពីមុនវិបត្តិកូវីដ១៩ ភ្ញៀវទេសចរណ៍អន្តរជាតិមកទស្សនាកម្ពុជា ដោយធ្វើដំណើរតាមផ្លូវអាកាសមាន២ភាគបី។
លោកបន្តថា “ភ្ញៀវទេសចរណ៍កាន់តែច្រើន បានចូលមកកម្ពុជាត្រឹមចំណុចព្រំដែន ដូចជាក្រុងប៉ោយប៉ែត បាវិត ជាដើម”។
ការកើនឡើងនៃអំណាចទិញក្នុងស្រុក បាននិងកំពុងជួយដល់តម្រូវការលំនៅដ្ឋាននៅកម្ពុជា ខណៈប្រទេសនេះ មានប្រជាជនវ័យក្មេងច្រើន ដោយអ្នកមានអាយុចាប់ពី៣០ឆ្នាំចុះ មានចំនួនប្រមាណ៦០ភាគរយ នៃចំនួនប្រជាពលរដ្ឋសរុប ដែលធ្វើឲ្យពួកគេត្រូវបែកពីគ្រូសារ និងត្រូវការលំនៅដ្ឋានថ្មីៗកាន់តែច្រើន។
បញ្ហាប្រឈម
ខុនដូ និងការិយាល័យលំដាប់ខ្ពស់ ក្នុងទីក្រុងភ្នំពេញអាចប្រឈមនឹងការផ្គត់ផ្គង់លើសតម្រូវការ ដែលនាំឱ្យតម្លៃធ្លាក់ចុះ ដោយបច្ចុប្បន្នខុនដូប្រមាណ៥០,០០០យូនីត បានដាក់ចូលទីផ្សារ ខណៈសម្ពាធអ្នកទិញក្នុងស្រុកថយចុះ ហើយអ្នកអភិវឌ្ឍន៍បានចាប់ផ្តើមផ្តោតលើទីផ្សារបរទេសជំនួសវិញ។
អគ្គនាយកក្រុមហ៊ុនERA Cambodia លោកខន គង្គាបានលើកឡើងថា ស្ថានភាពទីផ្សារបាន និងកំពុងមានសភាពប្រសើរឡើងបណ្តើរៗហើយ ប៉ុន្តែវាមិនទាន់មានសញ្ញានៃតម្រូវការកើនឡើងដូចមុនវិបត្តិកូវីដ១៩នៅឡើយទេ។
លោកបន្តថា “វានៅតែត្រូវការពេលវេលាបន្ថែមទៀត តែយើងចាប់ផ្តើមមានសញ្ញាប្រសើរហើយ”។
ទស្សនវិស័យនាពេលអនាគត
ទោះជាយ៉ាងណា វិស័យអចលនវត្ថុកម្ពុជា នៅតែមានសក្តានុពល សម្រាប់អត្ថប្រយោជន៍នាពេលអនាគត ប៉ុន្តែអ្នកវិនិយោគគួរតែវាយតម្លៃដោយប្រុងប្រយ័ត្ននូវហានិភ័យ និន្នាការទីផ្សារ និងបទប្បញ្ញត្តិ៕
