ដោយ: គង់ លាងហួរ
អន្តរជាតិ: យោងតាមកាសែត Jakarta Globe បានឱ្យដឹងថា មន្ត្រីជាន់ខ្ពស់នៃរដ្ឋាភិបាលឥណ្ឌូនេស៊ីបានបង្ហាញនូវក្តីសង្ឃឹមថា ប្រទេសឥណ្ឌូនេសុីនឹងអាចបង្កើនផលធៀបរវាងចំណូលពន្ធ និងផលទុនជាតិសរុបឱ្យមានកម្រិតដូចទៅនឹងប្រទេសកម្ពុជា។
ទោះបីជាឥណ្ឌូនេសុីជាប្រទេសមានទំហំសេដ្ឋកិច្ចធំជាងគេលេខ១នៅតំបន់អាស៊ានយ៉ាងណាក្តី ក៏ប៉ុន្តែផលធៀបរវាងចំណូលពន្ធធៀបទៅនឹងផលទុនជាតិសរុប (Tax-to-GDP Ratio) របស់ប្រទេសឥណ្ឌូនេស៊ីមានកម្រិតទាបខ្លាំងណាស់ បើធៀបនឹងបណ្តាប្រទេសជិតខាងក្នុងតំបន់អាស៊ាន។
លោក Hashim Djojohadikusumo ប្រេសិតរបស់ប្រធានាធិបតីឥណ្ឌូនេសុីបានអះអាងថា “ផែនការកំពុងត្រូវបានរៀបចំដើម្បីដំឡើងផលធៀបរវាងចំណូលពន្ធធៀបទៅនឹង GDP របស់ឥណ្ឌូណេស៊ី យ៉ាងហោចណាស់ឱ្យស្មើនឹងប្រទេសកម្ពុជា”។
-->
តាមរយៈការគណនាផលធៀបនេះ គេអាចធ្វើការវាស់វែងប្រាក់ចំណូលពន្ធរបស់ប្រទេសមួយ ធៀបទៅនឹងទំហំនៃសេដ្ឋកិច្ចរបស់ប្រទេសនោះ។
លោក Hashim បានថ្លែងទៅកាន់កិច្ចប្រជុំកំពូលស្តីពីសេដ្ឋកិច្ចឥណ្ឌូនេស៊ីនៅទីក្រុងហ្សាការតា ថា“ឥណ្ឌូនេស៊ីជាប្រទេសមួយ ដែលមានអត្រាពន្ធទាបបំផុតលើពិភពលោក។រដ្ឋាភិបាលនឹងអនុវត្តន៍កម្មវិធីមួយចំនួនក្នុងពេលឆាប់ៗនេះដើម្បីបង្កើនប្រាក់ចំណូលពន្ធ”។
លោក Hashim បានបន្តថា “យើងមានគោលដៅដំឡើងផលធៀបរវាងប្រាក់ចំណូលពន្ធធៀបនឹង GDP ឱ្យដល់កម្រិតដូចទៅនឹងប្រទេសកម្ពុជាចំនួន១៨ភាគរយ”។
តួយ៉ាង ប្រាក់ចំណូលពន្ធ ដែលកម្ពុជាប្រមូលបាន កាលពីឆ្នាំ២០២០កន្លងទៅមានចំណែកស្មើនឹងចំនួន១៨ភាគរយនៃទំហំផលទុនជាតិសរុបរបស់កម្ពុជា។
យោងតាមទិន្នន័យថ្មីចុងក្រោយបង្អស់របស់អង្គការសម្រាប់កិច្ចសហប្រតិបត្តិការសេដ្ឋកិច្ច និងការអភិវឌ្ឍន៍ (OECD) បានបង្ហាញថា ផលធៀបរវាងចំណូលពន្ធជាមួយនឹង GDP របស់កម្ពុជាគិតត្រឹមឆ្នាំ២០២២ មានអត្រា១៤,៧ភាគរយ ខណៈដែលប្រទេសវៀតណាមមានអត្រា១៩ភាគរយ។
លោក Hashim បានអះអាងថា លោកប្រធានាធិបតី Prabowo Subianto គ្រោងបង្កើនការប្រមូលពន្ធពីសេដ្ឋកិច្ចស្រមោល(shadow Economy)។ ពាក្យសេដ្ឋកិច្ចស្រមោលនេះសំដៅលើសកម្មភាពសេដ្ឋកិច្ច ដែលមិនត្រូវបានចុះបញ្ជីជាមួយរដ្ឋាភិបាល៕ប្រភព: Jakarta Globe៕
