ដោយ: គង់ លាងហួរ
អន្តរជាតិ: ប្រទេសកូរ៉េខាងត្បូងគ្រោងនឹងបង្កើតមូលនិធិគោលនយោបាយមួយក្នុងទំហំទឹកប្រាក់ចំនួន៣៤ពាន់លានដុល្លារ ដើម្បីផ្តល់ការគាំទ្រផ្នែកហិរញ្ញវត្ថុដល់បណ្តាក្រុមហ៊ុនបច្ចេកវិទ្យាក្នុងស្រុក ស្របពេលមានការប្រកួតប្រជែងជាសកល និងលទ្ធិគាំពារនិយម។
រដ្ឋាភិបាលកូរ៉េខាងត្បូងបានអះអាងថា “ការប្រកួតប្រជែងនៅក្នុងឧស្សាហកម្មយុទ្ធសាស្រ្តបានក្លាយជាចំណុចស្នូលនៃសន្តិសុខសេដ្ឋកិច្ចជាតិ ស្របពេលមានការកើនឡើងនៃភាពមិនច្បាស់លាស់ពីកត្តាខាងក្រៅ ក្រោមរដ្ឋបាលថ្មីរបស់សហរដ្ឋអាមេរិក។នេះជាសង្គ្រាមដែលគ្មានផ្សែងគ្រាប់កាំភ្លើង”។
ចាប់តាំងពីការវិលចូលកាន់តំណែងក្នុងសេតវិមានកាលពីខែមករា លោកប្រធានាធិបតីអាមេរិក ដូណាល់ ត្រាំ បានគំរាមកំហែងដំឡើងពន្ធគយជាបន្តបន្ទាប់លើបណ្តាដៃគូពាណិជ្ជកម្មសំខាន់ៗ និងឧស្សាហកម្មផ្សេងៗដូចជា បន្ទះឈីប យានយន្ត និងជីវឱសថ។
