ដោយ: គង់ លាងហួរ
អន្តរជាតិ: ប្រជាជនកូរ៉េខាងត្បូង ដែលមានទ្រព្យស្តុកស្តម្ភកំពុងសម្រុកស្វែងរកទិញអចលនទ្រព្យនៅក្នុងប្រទេសជប៉ុន ដោយសារតែការវិនិយោគអចលនទ្រព្យនៅជប៉ុនមានតម្លៃសមរម្យ និងទទួលបានផលចំណេញច្រើនបើធៀបនឹងទីផ្សារក្នុងស្រុក។
ការដាំក្បាលចុះនៃប្រាក់យ៉េនបាននិងកំពុងទាក់ទាញប្រជាជនកូរ៉េខាងត្បូងឱ្យដកសាច់ប្រាក់ពីធនាគារក្នុងស្រុក ឬស្នើសុំប្រាក់កម្ចីពីធនាគារនានាក្នុងប្រទេសជប៉ុនដើម្បីទិញអចលនទ្រព្យ។
បណ្តាអ្នកវិនិយោគកូរ៉េត្រូវបានគេរំពឹងថា នឹងងាកទៅទិញអចលនទ្រព្យនៅក្នុងប្រទេសជប៉ុនក្នុងមួយរយៈពេលនេះ ដោយសារតែប្រាក់យ៉េនបានបន្តធ្លាក់ថ្លៃចុះ បើទោះបីជាធនាគារកណ្តាលជប៉ុន(BOJ)បានដំឡើងអត្រាការប្រាក់នាពេលថ្មីៗនេះយ៉ាងណាក្តី។
-->
ពពុះនៃទីផ្សារលំនៅដ្ឋាន និងការដាក់ចេញបទប្បញ្ញត្តិដ៏តឹងរុឹងនៅក្នុងប្រទេសកូរ៉េខាងត្បូង កំពុងជំរុញឱ្យប្រជាជនកូរ៉េខាងត្បូងដើរចេញពីទីផ្សារក្នុងស្រុកឆ្ពោះទៅកាន់ទីផ្សារជប៉ុន។
លោក Kwon Dae-jung សាស្ត្រាចារ្យផ្នែកអចលនទ្រព្យនៅសាកលវិទ្យាល័យ Sogang បានលើកឡើងថា “អ្នកទិញប្រហែលជាមិនចង់បាត់បង់ឱកាសនៃការទិញអចលនទ្រព្យនៅក្នុងប្រទេសជប៉ុននោះទេ ព្រោះអចលនទ្រព្យនៅទីនោះមានតម្លៃសមរម្យ និងផ្តល់ប្រាក់ចំណេញខ្ពស់”។
យោងតាមទិន្នន័យបានបង្ហាញថា ជនជាតិកូរ៉េខាងត្បូងបានផ្ញើប្រាក់សរុបចំនួន៣៩,២លានដុល្លារទៅកាន់ប្រទេសជប៉ុនសម្រាប់ទិញអចលនទ្រព្យនៅទីនោះកាលពីឆ្នាំ២០២៤។ចំនួននេះមានការកើនឡើងជិត៣ដងបើធៀបនឹងចំនួន១៣,១លានដុល្លារក្នុងឆ្នាំ២០២៣។
ជាពិសេស ការផ្ទេរប្រាក់ទៅកាន់ប្រទេសជប៉ុនកាលពីឆ្នាំមុនបានគ្របដណ្តប់ចំណែក៩,៤ភាគរយនៃទំហំទឹកប្រាក់សរុប ដែលជនជាតិកូរ៉េខាងត្បូងបានផ្ញើទៅក្រៅប្រទេសសម្រាប់ការទិញអចលនទ្រព្យ។
អត្រានេះជាកម្រិតខ្ពស់បំផុតមិនធ្លាប់មានក្នុងរយៈពេល៧ឆ្នាំចុងក្រោយ។ នេះបើយោងតាមក្រសួងហិរញ្ញវត្ថុកូរ៉េខាងត្បូង។
យោងតាមអ្នកជំនាញអចលនទ្រព្យមួយរូបទៀត ដែលសុំមិនបញ្ចេញឈ្មោះបានទម្លាយឱ្យដឹងថា តម្រូវការអចលនទ្រព្យរបស់ប្រទេសជប៉ុនអាចនឹងបន្តកើនឡើង ដោយសារការវិនិយោគអចលនទ្រព្យនៅជប៉ុនអាចទទួលបានប្រាក់ចំណេញខ្ពស់ និងមានតម្លៃសមរម្យជាងអចលនទ្រព្យនៅទីក្រុងសេអ៊ូល។
អ្នកជំនាញរូបនោះបានបន្តថា “ជាឧទាហរណ៍ ការទិញអាផាតមុិននៅក្នុងសង្កាត់ ដែលមានមធ្យោបាយធ្វើដំណើរសាធារណៈ ផ្សារទំនើប និងមន្ទីរពេទ្យក្នុងទីក្រុងសេអ៊ូល ត្រូវចំណាយប្រាក់ជាង១ពាន់លានវ៉ុន(ប្រហែល៦៨៩.០០០ ដុល្លារ)”។
ផ្ទុយទៅវិញ ប្រជាជនកូរ៉េខាងត្បូងជាច្រើនអាចទិញយូនីតអាផាតមុិនបែបនេះក្នុងតម្លៃក្រោម១ពាន់លានវ៉ុននៅទីក្រុងតូក្យូ និងតំបន់ទីប្រជុំជនផ្សេងទៀតនៅប្រទេសជប៉ុន៕ប្រភព: Korea Times៕
