តើអគារខុនដូណាខ្លះ ដែលសម្រេចបានអត្រាកំណើនតម្លៃខុនដូខ្ពស់ជាងគេបំផុតនៅក្នុងទីក្រុងគូឡាឡាំពួរ?

ដោយ: គង់ លាងហួរ
អន្តរជាតិ: អគារជាច្រើននៅទីក្រុងគូឡាឡាំពួររបស់ប្រទេសម៉ាឡេសុី ត្រូវបានសាងសង់ឡើងជាលក្ខណៈអគារបញ្ឈររាងតូចស្តើងខ្ពស់ៗ(Vertical) ព្រោះដីនៅក្នុងទីក្រុងមួយនេះមានតម្លៃថ្លៃកប់ពពក។

ក្រៅពីអគារពាណិជ្ជកម្ម អ្នកអភិវឌ្ឍន៍បានសាងសង់អគារលំនៅដ្ឋានខ្ពស់ៗគ្រប់ទម្រង់ ទំហំ និងគុណភាព ក្នុងគោលបំណងដើម្បីធ្វើការប្រកួតប្រជែងក្នុងការដាក់លក់លំនៅដ្ឋានក្នុងតម្លៃទាក់ទាញបំផុតនៅលើទីផ្សារ។

ខាងក្រោមនេះជាអគារលំនៅដ្ឋានខុនដូចំនួន៥នៅក្នុងទីក្រុងគូឡាឡាំពួរ ដែលសម្រេចបានកំណើនតម្លៃខុនដូខ្ពស់ជាងគេបំផុត៖

ចុចទីនេះដើម្បី Subscribe Telegram Channel «Property Area Asia» សម្រាប់ទទួលបានព័ត៌មានថ្មីៗ

-->

អគារខុនដូ 18 Madge របស់ក្រុមហ៊ុន KSL Holdings Bhd ឈរនៅលេខរៀងទី១។ អគារទោលកម្ពស់១២ជាន់នេះ មានទីតាំងនៅក្នុងសង្កាត់ Ampang Hilir ស្ថិតនៅភាគខាងកើតទីក្រុងគូឡាឡាំពួរ។

ប៉ុន្តែ ការផ្គត់ផ្គង់ខុនដូនៃអគារ 18 Madge មានចំនួនកំណត់ត្រឹមតែ៥០យូនីតប៉ុណ្ណោះ ជាមួយនឹងតម្លៃចំនួន១២៥៣,៩០រីងហ្គីតក្នុងមួយហ្វីតការ៉េ(ប្រហែល៣.០៤៣ដុល្លារក្នុងមួយម៉ែត្រការ៉េ) កើនឡើង១៤,៦ភាគរយ។

ចំណាត់ថ្នាក់លេខ២ បានទៅលើអគារខុនដូ The Estate មានទីតាំងនៅសង្កាត់ Bangsar ជាយក្រុងគូឡាឡាំពួរ។ អគារនេះត្រូវបានអភិវឌ្ឍន៍ឡើងដោយក្រុមហ៊ុន Bon Estates Sdn Bhd។

អគារខុនដូ The Estate មានកម្ពស់៤៦ជាន់ រួមមានខុនដូចំនួន៣២៨យូនីត ជាមួយនឹងតម្លៃចំនួន១.០០០រីងហ្គីតក្នុងមួយហ្វីតការ៉េ(ប្រហែល២.៤២៧ដុល្លារក្នុងមួយម៉ែត្រការ៉េ)កើនឡើង១២,៤ភាគរយ។

អគារខុនដូ Embassy Row ជាប់ចំណាត់ថ្នាក់ទី៣។អគារនេះត្រូវបានអភិវឌ្ឍន៍ដោយក្រុមហ៊ុន Amphil Corporation Sdn Bhd ដែលមានកម្ពស់១៧ជាន់ និងខុនដូចំនួន៥២យូនីត ជាមួយនឹងតម្លៃចំនួន១២៨៦,៦រីងហ្គីតនៅក្នុងមួយហ្វីតការ៉េ កើនឡើង១១,៣ភាគរយ។

ចំណែក អគារខុនដូ Three33 Residence របស់ក្រុមហ៊ុន TSI Domain Sdn Bhd ឈរនៅលេខរៀងទី៤ ជាមួយនឹងតម្លៃចំនួន៦៩៧,៩០រីងហ្គីតក្នុងមួយហ្វីតការ៉េ កើនឡើង១០,៨ភាគរយ។

រីឯ អគារខុនដូ Endah Regal របស់ក្រុមហ៊ុន Soon Teik Development Sdn Bhd  បានឈរនៅលេខរៀងទី៥ ជាមួយនឹងតម្លៃចំនួន៤៨២រីងហ្គីតក្នុងមួយហ្វីតការ៉េ កើនឡើង១០ភាគរយ៕ប្រភព: Edgeprop៕