ភ្ជាប់ទំនាក់ទំនងដើម្បីទទួលបានព័ត៌មានទាន់ហេតុការណ៍ ៖ @propertyarea_asia
ដោយ: គង់ លាងហួរ
អន្តរជាតិ: បណ្តាវិនិយោគិនធំៗបានបង្ហាញចំណាប់អារម្មណ៍លើទីផ្សារអចលនទ្រព្យរបស់ប្រទេសជប៉ុន ខណៈប្រទេសមានសេដ្ឋកិច្ចធំជាងគេទី៤របស់ពិភពលោកមួយនេះកំពុងងើបចេញពីអន្ទាក់នៃវិបត្តិបរិត្តផរណា។
តួយ៉ាង ធនាគារវិនិយោគខ្នាតយក្ស Morgan Stanley គ្រោងនឹងកៀរគរដើមទុន១០០ពាន់លានយ៉េន(ប្រហែល៦៨៤លានដុល្លារអាមេរិក) សម្រាប់ផ្តល់មូលនិធិដល់ការវិនិយោគអចលនទ្រព្យនៅប្រទេសជប៉ុន។
ការប្រមូលដើមទុនបញ្ចូលទៅកាន់មូលនិធិនេះនឹងត្រូវបានបិទបញ្ចប់នៅខែមិថុនា ដោយរំពឹងថា នឹងប្រមូលទុនវិនិយោគបានយ៉ាងតិច១០០ពាន់លានយ៉េន ដោយផ្អែកលើការប្តេជ្ញាចិត្តរបស់វិនិយោគិននាពេលបច្ចុប្បន្ន។នេះបើយោងតាមប្រភពពីបុគ្គលចំនួន២រូប ដែលស្នើសុំមិនបញ្ចេញឈ្មោះ។
ប្រភពខាងលើបញ្ជាក់ទៀតថា មូលនិធិវិនិយោគនេះនឹងផ្តោតលើទីផ្សារការិយាល័យ និងអគារលំនៅដ្ឋាននៅក្នុងទីក្រុងធំៗរបស់ប្រទេសជប៉ុន ក៏ដូចជាការដឹកជញ្ជូន និងសណ្ឋាគារ។
ធនាគារខ្នាតយក្ស Morgan Stanley ជាក្រុមហ៊ុនគ្រប់គ្រងទ្រព្យសកម្មសកលថ្មីចុងក្រោយបំផុត ដោយបានកំណត់ចក្ខុវិស័យទៅលើទីផ្សារអចលនទ្រព្យជប៉ុន ខណៈកំណើនសេដ្ឋកិច្ច កំណើនប្រាក់ឈ្នួល និងអត្រាអតិផរណារបស់ប្រទេសនេះបានស្ទុះងើបចេញពីសភាពនៅទ្រឹង។
យោងតាមការស្ទង់មតិរបស់រដ្ឋាភិបាលជប៉ុនបានបង្ហាញឱ្យដឹងថា តម្លៃទំនិញប្រើប្រាស់នានា រួមទាំងតម្លៃអចលនទ្រព្យក្នុងប្រទេសជប៉ុនកំពុងកើនឡើងវិញនាពេលបច្ចុប្បន្ន។នេះមានន័យថា ប្រទេសជប៉ុនបានឆ្លងផុតវិបត្តិបរិត្តផរណាហើយ។
តម្លៃដីនៅទូទាំងប្រទេសជប៉ុនបានកើនឡើងចំនួន២,៧ភាគរយកាលពីឆ្នាំ២០២៤ ដែលជាល្បឿនលឿនបំផុតមិនធ្លាប់មានចាប់តាំងពីឆ្នាំ១៩៩១។ ឆ្នាំ១៩៩១ ជាឆ្នាំដែលកំណើនសេដ្ឋកិច្ចជប៉ុនចាប់ផ្តើមស្ថិតនៅទ្រឹង៕ប្រភព: Reuters៕
