ភ្ជាប់ទំនាក់ទំនងដើម្បីទទួលបានព័ត៌មានទាន់ហេតុការណ៍ ៖ @propertyarea_asia
ដោយ: គង់ លាងហួរ
អន្តរជាតិ: យោងតាមក្រុមហ៊ុនប្រឹក្សាអចលនទ្រព្យសកល JLL បានព្យាករណ៍ថា ទីផ្សារអចលនទ្រព្យពាណិជ្ជកម្មនៅក្នុងទីក្រុងតៃប៉ិរបស់កោះតៃវ៉ាន់ នឹងទទួលបានការផ្គត់ផ្គង់ការិយាល័យថ្មីកម្រិត A ចំនួន១១៨.៩៨០ម៉ែត្រការ៉េនៅក្នុងឆ្នាំ២០២៥នេះ។
ការកើនឡើងនៃថ្លៃដើមសំណង់អគារបានជំរុញឱ្យតម្លៃជួលការិយាល័យបន្តមានការកើនឡើង។ ទោះជាយ៉ាងណាក្តី ការប្រកួតប្រជែងទីផ្សារ និងភាពមិនច្បាស់លាស់នៃទស្សនវិស័យសេដ្ឋកិច្ចសកលនឹងធ្វើឱ្យកំណើនតម្លៃជួលកើនឡើងក្នុងកម្រិតមធ្យម។
-->
ដោយឡែក បើយោងតាមក្រុមហ៊ុនប្រឹក្សាអចលនទ្រព្យ CBRE បានឱ្យដឹងថា អត្រាការិយាល័យទំនេរកម្រិត A នៅទីក្រុងតៃបុិបានធ្លាក់ចុះមកនៅត្រឹម៨,៣ភាគរយនៅដើមឆ្នាំ២០២៥ ដោយសារការកើនឡើងនៃតម្រូវការជួលអគារការិយាល័យថ្មីៗពីបណ្តាក្រុមហ៊ុន ឬសហគ្រាសមួយចំនួន។
ការជួលការិយាល័យកម្រិត A នៅទីក្រុងតៃបុិមានតម្លៃជាមធ្យមចំនួនជាង២៨ដុល្លារអាមេរិកក្នុងមួយម៉ែត្រការ៉េ ខណៈការជួលការិយាល័យកម្រិត B មានតម្លៃជាមធ្យមចំនួនប្រមាណ១៧,៥ដុល្លារអាមេរិកក្នុងមួយម៉ែត្រការ៉េ។
ការកើនឡើងនៃការវិនិយោគឯកជន ដែលជំរុញដោយការជឿនលឿនផ្នែកបច្ចេកវិទ្យាបញ្ញាសិប្បនិម្មិត (Al) បានជំរុញកំណើនសេដ្ឋកិច្ចរបស់កោះតៃវ៉ាន់ដល់កម្រិត៤,៣ភាគរយក្នុងឆ្នាំ២០២៤។ សេដ្ឋកិច្ចរបស់កោះមួយនេះត្រូវបានគេព្យាករណ៍ថា នឹងកើនឡើង៣,៣ភាគរយបន្ថែមទៀតនៅឆ្នាំ២០២៥ ដោយសារការកើនឡើងជាលំដាប់នៃតម្រូវការក្នុងស្រុក និងការនាំចេញទំនិញទៅកាន់ទីផ្សារបរទេស។
លក្ខខណ្ឌដ៏អំណោយផលផ្នែកសេដ្ឋកិច្ចទាំងនេះនឹងជំរុញឱ្យទំនុកចិត្តរបស់អ្នកវិនិយោគមានភាពប្រសើរឡើង ដោយជំរុញឱ្យបណ្តាក្រុមហ៊ុននានាពិចារណាផ្លាស់ប្តូរទីតាំងការិយាល័យទៅកាន់អគារថ្មី។
អត្រាការិយាល័យទំនេរជាមធ្យមត្រូវបានគេព្យាករណ៍ថានឹងកើនឡើងក្នុងឆ្នាំ២០២៥ ខណៈអគារការិយាល័យថ្មីចំនួន៥ ស្ថិតនៅក្នុងតំបន់ពាណិជ្ជកម្មកណ្តាល (CBD)របស់ទីក្រុងតៃប៉ិ គ្រោងនឹងបញ្ចប់រួចរាល់នៅឆ្នាំនេះ។
យ៉ាងណាមិញ ស្របពេលមានការរំពឹងទុកអំពីការកើនឡើងនៃតម្រូវការជួលការិយាល័យ ក្រុមហ៊ុន CBRE រំពឹងថា ម្ចាស់អគារភាគច្រើននឹងបន្តមានប្រៀបក្នុងការចរចាជាងអតិថិជន។ ប៉ុន្តែ ម្ចាស់អគារមួយចំនួនតូចអាចនឹងបត់បែនយុទ្ធសាស្ត្ររបស់ខ្លួនឱ្យសមស្របនឹងបរិបទបច្ចុប្បន្ន៕ប្រភព: Real Estate Asia៕
