ដោយ: គង់ លាងហួរ
អន្តរជាតិ: បណ្តាក្រុមហ៊ុនគ្រប់គ្រងមូលនិធិធំៗនៅលើពិភពលោកនឹងមានទំនុកចិត្តឡើងវិញលើមូលបត្របំណុលរបស់ប្រទេសចិន និងបណ្តាប្រទេសអាសុីផ្សេងទៀត លុះត្រាតែវិស័យអចលនរបស់ប្រទេសចិនមានស្ថិរភាព បន្ទាប់ពីឆ្លងកាត់វិបត្តិបំណុលរយៈពេល២ឆ្នាំកន្លងមក។
បណ្តាវិនិយោគិននានានៅតែបន្តទទួលរងការខាតបង់ ដោយសារវិបត្តិសាច់ប្រាក់របស់បណ្តាអ្នកអភិវឌ្ឍន៍អចលនទ្រព្យចិន ដែលបាននាំឱ្យមានការខកខានទូទាត់សងមូលបត្របំណុលសរុបចំនួន២០០ពាន់លានដុល្លារ ក្រោយពីទីក្រុងប៉េកាំងបានប្រកាសគោលនយោបាយ“បន្ទាត់ក្រហម៣”នៅក្នុងខែសីហា ឆ្នាំ២០២០។
ការដួលរលំនៃក្រុមហ៊ុន China Evergrande ក្នុងឆ្នាំ២០២៤ ដោយសារការខកខានទូទាត់សងមូលបត្របំណុលចំនួន២០ពាន់លានដុល្លារអាមេរិក ជានិមិត្តរូបនៃវិបត្តិបំណុល ដែលក្រុមហ៊ុនអចលនទ្រព្យចិនជាច្រើនផ្សេងទៀតជួបប្រទះ បណ្តាលមកពីការខ្ចីប្រាក់ក្នុងចំនួនដ៏ច្រើនហួសហេតុ។
