រដ្ឋាភិបាលឥណ្ឌូនេសុីគ្រោងបោះផ្សាយលក់បណ្ណបំណុលដើម្បីផ្តល់មូលនិធិដល់កម្មវិធីសាងសង់លំនៅដ្ឋានតម្លៃសមរម្យ

ដោយ: គង់ លាងហួរ
អន្តរជាតិ: រដ្ឋាភិបាលឥណ្ឌូនេសុីកំពុងរៀបចំគម្រោងផ្តល់មូលនិធិដល់កម្មវិធីសាងសង់លំនៅដ្ឋានតម្លៃសមរម្យចំនួន៣លានយូនីតក្នុងមួយឆ្នាំ ក្នុងចំណោមគម្រោងមហិច្ឆិតាផ្សេងទៀត តាមរយៈការបោះផ្សាយលក់មូលបត្របំណុល ដើម្បីកាត់បន្ថយការពឹងផ្អែកលើប្រភពនៃការវិនិយោគពីបរទេស។

ប្រធានាធិបតីឥណ្ឌូនេសុីលោក Prabowo Subianto បានប្រកាសអំពីមហិច្ឆិតាក្នុងការសាងសង់ផ្ទះឱ្យបានចំនួន៣លានយូនីតក្នុងមួយឆ្នាំៗ។  ម្យ៉ាងវិញទៀត ប្រជាជនឥណ្ឌូនេសុីប្រមាណ១៥លានគ្រួសារនឹងទទួលបានលំនៅដ្ឋានសមរម្យក្នុងអំឡុងអាណត្តិ៥ឆ្នាំរបស់លោក។

លោក Hashim Djojohadikusumo បេសកជនរបស់ប្រធានាធិបតីឥណ្ឌូនេសុីបានលើកឡើងថា “យើងស្វាគមន៍ការវិនិយោគពីបរទេស។ ប៉ុន្តែ យើងមិនចង់ពឹងផ្អែកទាំងស្រុងទៅលើអ្នកវិនិយោគអន្តរជាតិសម្រាប់កម្មវិធីលំនៅដ្ឋាននោះទេ។ យើងបានធ្វើការគណនាមួយចំនួនក្នុងរយៈពេល៧ខែ ឬ៨ខែកន្លងមកនេះ។ យើងជឿជាក់ថា យើងមានសាច់ប្រាក់ងាយស្រួលដើម្បីអាចផ្តល់ហិរញ្ញប្បទាន”។