អាផាតមុិនខ្នាតធំមួយនៅអគារខ្ពស់កប់ពពកក្នុងទីក្រុងសុីដនីរបស់អូស្ត្រាលីគ្រោងលក់ចេញក្នុងតម្លៃជាង៥២លានដុល្លារ

ដោយ: គង់ លាងហួរ
អន្តរជាតិ: ក្រុមហ៊ុនហ្គេម និងការកម្សាន្ត Crown Resorts ឈានជិតដល់កិច្ចព្រមព្រៀងលក់ផ្ទះ Penthouse ក្នុងអគារខ្ពស់កប់ពពករបស់ខ្លួននៅទីក្រុងស៊ីដនីក្នុងតម្លៃ៨០លានដុល្លារអូស្ត្រាលី(ប្រមាណ៥២,២លានដុល្លារអាមេរិក) តិចជាងការរំពឹងទុកដំបូង។ នេះបើយោងតាមកាសែត Australian Financial Review (AFR)។

កាសែត AFR បានរាយការណ៍ថា អតិថិជនក្នុងស្រុកមួយរូបជិតនឹងទិញបានផ្ទះ Penthouse មានបន្ទប់គេងចំនួន៦ នៅជាន់ទី៨១ នៃអគារ One Barangaroo កម្ពស់២៧១ម៉ែត្រស្ថិតក្នុងទីក្រុងសុីដនីរបស់ប្រទេសអូស្ត្រាលី។

ផ្ទះទំហំ៨.៦០០ហ្វីតការ៉េនេះត្រូវបានដាក់លក់នៅលើទីផ្សារចាប់តាំងពីឆ្នាំ២០២១ នៅពេលដែលអគារ One Barangaroo ត្រូវបានបញ្ចប់ការសាងសង់។ ដើមឡើយ អគារនេះត្រូវបានរចនាឡើងសម្រាប់ទាក់ទាញជនជាតិចិនដែលមានទ្រព្យសម្បត្តិស្តុកស្តម្ភ។