ក្រុមការងាររដ្ឋ និងឯកជនលើកឡើងពីបញ្ហាប្រឈមចាស់ ថ្មីចំនួន៦ ទាក់ទងការចុះបញ្ជីពាណិជ្ជកម្ម និងកម្មសិទ្ឋបញ្ញា

ដោយៈ និស្ស័យ

    ភ្នំពេញៈ ក្រុមន្រ្តី និងផ្នែកឯកជន បានបើកកិច្ចប្រជុំអនុក្រុមការងារ “ខ” “ផ្នែកកិច្ចសម្រួលពាណិជ្ជកម្ម លើសេវាពាណិជ្ជកម្ម ការចុះបញ្ជីពាណិជ្ជកម្ម និងកម្មសិទ្ធបញ្ញា”។

កិច្ចប្រជុំនៅថ្ងៃទី២១ កក្កដានេះ ធ្វើឡើងនៅអគ្គនាយកដ្ឋានសភាពាណិជ្ជកម្មកម្ពុជា បានរៀបចំកិច្ចប្រជុំអនុក្រុមការងារ “ខ” “ផ្នែកកិច្ចសម្រួលពាណិជ្ជកម្មលើសេវាពាណិជ្ជកម្ម ការចុះបញ្ជីពាណិជ្ជកម្ម និងកម្មសិទ្ធបញ្ញា” ក្រោមយន្តការនៃក្រុមការងារ “ឆ” “ផ្នែកផលិតកម្មកែច្នៃសម្រាប់ការនាំចេញ និងកិច្ចសម្រួលពាណិជ្ជកម្ម” នៃវេទិការាជរដ្ឋាភិបាល-ផ្នែកឯកជន ដែលដឹកនាំដោយ លោកហ៊ូ ស៊ីវយ៉ុង ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្កនាយក នៃអគ្គនាយកដ្ឋានសេវាពាណិជ្ជកម្ម និងជាប្រធានអនុក្រុមការងារ “ខ” ផ្នែករដ្ឋាភិបាល និង លោក រឿន ប៊ុនហេង ប្រធានអនុក្រុមការងារ “ខ” ផ្នែកឯកជន។

កិច្ចប្រជុំនេះក៏មានការចូលរួមផងដែរ ពីសំណាក់់មន្ត្រីពាក់ព័ន្ធនៃអគ្គនាយកដ្ឋានសេវា ពាណិជ្ជកម្មនៃក្រសួងពាណិជ្ជកម្ម និងសមាជិក សមាជិកានៃអនុក្រុមការងារ “ខ” ផ្នែកឯកជនមួយចំនួនទៀតផងដែរ។

កិច្ចប្រជុំនេះមានគោលបំណង ដើម្បីបន្តធ្វើការពិនិត្យ ពិភាក្សាលើបញ្ហាប្រឈម និងកង្វល់របស់ផ្នែកឯកជនពាក់ព័ន្ធ នឹងសេវាពាណិ​ជ្ជកម្ម ការចុះបញ្ជីពាណិជ្ជកម្ម និងកម្មសិទ្ធបញ្ញា ហើយបញ្ហាដែលមិនអាចដោះស្រាយបាន ក្នុងកម្រិតអនុក្រុមការងារនេះ និងត្រូវបញ្ជូនដោះស្រាយបន្តក្នុងក្រុមការងារ “ឆ””ផ្នែកផលិតកម្មកែច្នៃសម្រាប់ការនាំចេញ និងកិច្ចសម្រួលពាណិជ្ជកម្ម” ឆាប់ៗខាងមុខនេះ។

ជាលទ្ធផលកិច្ចប្រជុំបានដំណើរការពិនិត្យ ពិភាក្សា និងលើកឡើងនូវបញ្ហាប្រឈមចាស់ និងថ្មីមួយចំនួនរួមមាន ទី១ ការចុះបញ្ជី បង្កើត វិសោធនកម្ម និងរំលាយសាខាក្រុមហ៊ុនក្នុងស្រុក ទី២ ការស្នើសុំចុះបញ្ជីចំពោះការពង្រីកផលិតកម្ម នៃក្រុមហ៊ុនដែលជាគម្រោងវិនិយោគមានលក្ខណៈសម្បត្តិគ្រប់គ្រាន់ ទី៣ ការស្នើសុំសិទ្ធិគ្រប់គ្រងក្រុមហ៊ុន នៅក្នុងប្រព័ន្ធស្វ័យប្រវត្តិកម្ម។

ទី៤ ការផ្តល់ដល់មន្ត្រីចុះបញ្ជី នូវឈ្មោះលេខាធិការរបស់ក្រុមហ៊ុន ទី៥.​ ការចុះបញ្ជីទទួលស្គាល់អ្នកតំណាង ស្របច្បាប់ជានិតិបុគ្គលក្នុងការស្នើសុំចុះបញ្ជីពាណិជ្ជកម្ម និងទី៦ ការកំណត់ចំនួនលក្ខន្តិកៈរបស់ក្រុមហ៊ុនដែលត្រូវតម្កល់ រួមនិងបញ្ហាប្រឈមមួយចំនួនផ្សេងទៀតផងដែរ៕